Yateemo ka maal khane se bacho or bhalai karo

BAAB 67

YATEEM SE BHALAAYI AUR US PAR ZULM SE EHTERAAZ ( BACHNA ):
Bukhari shareef ki Hadees hai ke MAIN aur yateem ki kafaalat karnewala Jannat mein aise honge aur phir AAPNE shahaadat ki ungli aur darmiyaani ungli ko thoda saa khol kar unki taraf ishaara farmaya.

Muslim shareef ki Hadees hai ke HUZOOR ﷺ ne farmaya, MAIN aur yateem ki parwarish karnewala , chaahe woh yateem uska azeez ho yaa koi gair , Jannat mein aise honge jaise yeh do ungliyaan, aur Maalik ne shahaadat ki ungli aur darmiyaani ungli ki taraf ishaara kiya.
Bazaaz ki Hadees hai ke jisne kisi yateem ki parwarish ki , chaahe woh yateem uska azeez hi kyun naa ho , pas woh aur MAIN Jannat mein aise honge jaise yeh dono ungliyaan mili huwi hai aur jisne teen betiyon ki parwarish ki woh Jannat mein hoga aur usey raahe KHUDA mein rozedaar aur namaazi mujaahid ke baraabar sawaab milega.

Ibne Maaja  Shareef ki Hadees hai ke jis shakhs ne teen yateemon ki parwarish ki zimmedaari utha li woh us shakhs ki tarah sawaab paayega , jo raat ko ibaadat karta hai aur din mein roza rakhta hai aur raahe KHUDA mein jihaad karne ke liye talwaar lekar nikal khada hota hai , MAIN aur woh Jannat mein aise do bhai honge jaise yeh do ungliyaan mili huwi hai, phir AAPNE shahaadat ki ungli aur darmiyaani ungli ko milaaya.
Tirmizi ne ba-sanad e sahih riwaayat ki hai ke jis shakhs ne kisi musalmaan yateem ke khaane peene ke maamle mein kafaalat ki to ALLAH TA’ALA usey Jannat mein bhejega magar yeh ke woh koi aisa gunaah kare jo bakshish ke laayak naa ho .
Tirmizi ki ba-sanad e hasan riwaayat hai ke jis kisi ne yateem ki parwarish ki yahan tak ki woh apne pairon par khada hone ke laayak ho gaya to ALLAH TA’ALA uske liye Jannat Waajib kar deta hai.

Ibne Maaja ki hadees hai, HUZOOR ﷺ ne farmaya ke musalmanon ka sabse behtar ghar woh hai jismein kisi yateem se achcha sulook kiya jaata hai aur ek musalmaan ka bura ghar woh hai jismein kisi yateem ko dukh aur takleef pohonchaayi jaati hai.
ABU YO’ALA ne ba-sanad e Hasan riwaayat ki hai,  HUZOOR ﷺ ne farmaya MAIN pehla shakhs honga jiske liye jannat ka darwaza khulega magar ek aurat ko  APNE aage dekhkar poochunga tum kaun ho aur MUJHSE pehle kyun jaa rahi ho? Woh kahegi main aisi aurat hun jo apne yateem bachchon ki parwarish ke liye ghar baithi rahi .
Tibraani ki riwaayat hai jisme ek ke siwa sab raawi sikah (mazboot) aur iske bawajood yeh riwayat matruk (tarq kiya huwa) nahi hai. Qasam hai US zaat ki jisne MUJHE haq ke saath mab’oos farmaya hai, ALLAH TA’ALA qayamat ke din us shakhs par azaab nahi karega jisne yateem par rehem kiya aur us sey narm  guftagu ki aur uski yateemi aur kamzori par rehem karte huwe aur ALLAH TA’ALA ke diye huwe maal ki wajah se usey apni panaah mein le liya aur uspar zyadati  wa zulm nahi kiya.

IMAM AHMED رضي الله عنه wagairah ki Hadees hai ke jis shakhs ne ALLAH ki khushnoodi ke liye kisi yateem ke sar par haath phera to usey har us baal ke badle mein jo uske haath ke neeche aaya , nekiyaan milegi aur jis shakhs ne kisi yateem se neki ki Yaa uski parwarish ki to MAIN aur woh Jannat mein do ungliyon ki tarah honge .
Muhaddiseen ki ek jamaa’at ne ye Hadees riwaayat ki hai aur Haakim ne usko sahi kaha hai ke ALLAH TA’ALA ne HAZRATE YAAQOOB عليه السلام se farmaya ke TERI aankhon ki beenaayi chali jaane, kamar jhuk jaane aur YUSUF عليه السلام ke saath bhaiyyon ke naa-rawa (naa-zeba) sulook karne ki wajah yeh hai ke UNKE yahaan ek martaba bhooka rozedaar yateem aaya , UNHONE gharwalon ke ta’awun se bakri zibah karke khaayi magar yateem ko khana naa khilaaya pas ALLAH TA’ALA ne UNHEIN khabar di ke MAIN APNI makhlooq me se usey sabse zyada mehboob rakhta hun jo yateemon aur miskeenon se mohabbat rakhta hai aur UNHEIN hukm diya ke khaana taiyyar karo aur miskeenon, yateemon ko bulaakar khilao , chunaanche UNHONE aisa hi kiya.

SAHEEHAIN ne HAZRATE ABU HURAIRAH رضي الله عنه se riwaayat ki hai ke HUZOOR ﷺ ne farmaya ke bewa, yateem  aur miskeen ki parwarish karnewala aisa hai jaise raahe KHUDA mein jihaad karne wala hota hai . raawi kehta hai, gaaliban AAPNE  ye bhi farmaya ke woh us shakhs ki tarah ajr (sawaab) paata hai jo raaton  ko ibaadat karta hai aur din mein roze se rehta hai.
IBNE MAAJA ki Hadees hai ke bewa aur miskeen ki dekh-bhaal karnewala mujaahid fi sabeelillaah hai aur us shakhs ki tarah hai jo raaton ko ibaadat karta hai aur din ko roza rakhta hai.
Buzurgaane salaf mein se ek se manqool hai ke main ibtedaayi zindagi mein sharaab ka aadi aur badkaar tha , maine ek din kisi yateem ko dekha to us se nihaayat achcha bartao kiya jaise baap apne bete se karta hai balki us sey bhi oomdah (achha) sulook kiya. Jab main soya to khwaab mein dekha ke jahannam ke farishte intehaayi bedardi se mujhe ghaseet-te huwe jahannam ki taraf le jaa rahe hai aur achaanak woh yateem darmiyaan mein aagaya aur kehne laga isey chord do taaki main RAB se iske baare mein guftagoo kar lun magar UNHONE inkaar kardiya , tab nidaa aayi isey chord do , HUMNE us yateem par rehem karne ki wajah se usey baksh diya hai , phir main jaag pada aur usi din se main yateemon ke saath intehaayi baa-waqaar sulook karta hun.

Saadaat ke khaate peete gharaanon  mein se ek ghar mein SAYYED-ZAADIYAN rehti thi, KHUDA ka karna aisa huwa ke unka baap faut (inteqaal) ho gaya aur woh kamsin jaanein yateem aur faqr o faaqa ka shikaar hogayi yahaan tak ke unhone sharm ki wajah se apna watan chord diya ,watan  se nikal kar kisi sheher ki veeraan masjid mein theher gayi , unki maa ne unhein wahin baithaya aur khud khaana lene ke liye baahar nikal gayi.
Chunaanche woh sheher ke ek ameer shakhs ke paas pohonchi jo musalmaan tha, aur usey apni saari sarguzasht  sunaayi magar  woh naa maanaa aur kehne laga tum aise gawaah lao jo tumhare bayaan ki tasdeeq kare tab main tumhari imdaad karunga aur woh aurat yeh kehkar wahaan se chal di  ke main gareebul watan gawaah  kahan se laun? Phir woh ek majoosi ke paas aayi aur usey apni kahaani sunaayi, chunaanche us majoosi ne uski baaton ko sahi samajh kar apne yahaan ki ek aurat ko bheja ke isey aur uski betiyon ko mere ghar pohoncha do , us shakhs ne unki izzat aur ehteraam mein koi kasar naa kiya , jab aadhi raat guzar gayi to us musalmaan ameer ne khwaab mein dekha ke qayamat qaaim ho gayi hai aur NABI E KAREEM ﷺ ne Apne sar e mubarak par liwa-ul-hamd baandhaa hai aur ek azeemush-shaan mahal ke  qareeb khade hai us ameer ne aage badhkar poocha YAA RASOOLALLAH ﷺ ! yeh mahal kiska hai? AAPNE farmaya ek musalmaan mard ke liye hai, ameer ne kaha main KHUDA ko ek maanne  wala musalmaan hun aur HUZOOR ﷺ ne yeh sun kar farmaya ke tum is baat ke gawaah lao ke waaqai tum musalmaan ho. woh bohot pareshaan huwa to HUZOOR ﷺ ne usey us SAYYEDA aurat ki baat yaad dilaayi jisse usne gawaah maange the.

Ameer ye sunte hi achaanak  jaag khada huwa aur usey intehaayi gam wa andoh ne aa ghera, woh us SAYYEDA aurat aur unki bachchiyon ki talaash mein nikal khada huwa  aur talaash karte karte us majoosi ke ghar jaa pohonchaa aur us sey kaha ke yeh SAYYEDZAADI aur uski bachchiyon ko mujhe de do magar majoosi ne inkaar kar diya aur bola maine inke sabab azeem barkatein paayi hai, ameer ne kaha mujhse 1000 dinaar lelo aur inhein mere supurd kar do lekin usne phir bhi inkaar kardiya. tab us ameer ke dil mein usey tang karne ka khayaal aaya aur majoosi uski buri neeyat dekh kar bola jinhein tum lene aaye ho , main unka tumse zyaada haqdaar hun aur tu ne khwaab mein jo mahal dekha hai woh mere liye banaaya gaya hai , kya tujhe apne musalmaan hone ka fakhr hai , ba-Khuda main aur mere ghar wale us waqt tak nahi soye,  jab tak ke hum sab us SAYYEDA ke haath par islaam nahi laaye aur maine bhi teri tarah khwaab mein RASOOLALLAH ﷺ  ki ziyaarat ki hai aur AAPNE mujhse farmaya kya SAYYEDZAADI aur USKI betiyaan tere paas hai? MAINE arz kiya jee haan YAA RASOOLALLAH ﷺ ! AAPNE farmaya yeh mahal tere aur tere gharwalon ke liye hai. Musalmaan ameer ye baat sunte hi waapas laut gaya aur ALLAH TA’ALA behtar jaanta hai ke woh kis hirmaan wa yaas ke saath waapas huwa hoga.

END OF BAAB 67