Alqaab :
‾‾‾‾‾‾‾‾
Saabir Piya, Makhdoom-ul-aalam.
*************
Aap ki wilaadat 19 Rabi’ ul awwal 592 Hijri (22 February
1196 A.D.) ko Kotwaal (Multan) me hui.


Aap ke waalid ka naam Hazrat Sayyed Abul Raheem bin
Hazrat Abdul Wahhaab bin Ghaus e aazam Abdul Qadir
Jeelani rahmatullāhi alaihi aur waalida ka naam Bibi Haajra
urfe Jameela Khaatoon bint Jamaal-ud-deen Sulaimān hai.
Aap Hasani saadaat hain.
*************
Aap ke waalid ke inteqaal ke baad 600 Hijri (1204 A.D.) me
aap ki waalida aap ko Pakpattan parwarish ke liye apne
bhai Baba Fareed Mas’ood Ganje shakar rahmatullāhi alaihi
ke paas le gai aur aap ko un ki khidmat me rakha.
Kuchh waqt baad aap ki waalida aap se milne aai to dekha
ke aap kuchh kamzor ho gaye hain. Unho ne Baba Fareed
se shikaayat ki to unho ne farmaaya ke ‘Maine use langar
ki zimmedaari di hai. Is liye use khaana khaane ki koi
pareshaani nahi honi chaahiye.’
Jab aap se puchha gaya to aap ne farmaaya ke ‘Mujhe
langar ki zimmedaari di gai hai. Lekin mujhe us me se
khaane ke liye nahi kaha gaya.’ Phir jab puchha ke ‘Tab
tum kya khaakar guzara karte ho?’ To aap ne farmaaya ke
‘Jab main faarig hota hu to jangal me chala jaata hu aur
waha jo kuchh khaane ke liye mile kha leta hu.’
Is ke baad aap ‘Saabir’ (Patient) ke naam se mashhoor ho
gaye.
*************
Aap ne Baba Fareed rahmatullahi alaihi se ilm haasil kiya.
Aap bahut hi zaheen the aur hamesha ibaadat aur zikre
ilāhi kiya karte the.
Aap jab bade hue to aap ki waalida ne Baba Fareed ko apni
beti Khadeeja ka nikaah Saabir piya se karane ke liye
guzaarish ki. Baba Fareed ne farmaaya ke ‘Ye munaasib
nahi hai kyun ki Saabir tasawwuf aur ishq e ilāhi me kho
chuka hai. Jab tak wo nikaah karna na chaahe tab tak ye
mumkin nahi hai.’
Magar is ke baad aap ki waalida ke baar baar kehne par
Baba Fareed ne apni beti ka nikaah Saabir piya se karaaya.
Us raat ko jab aap apne kamre me gaye to aap ne ek aurat
ko waha dekha. Lekin aap puri raat muraaqaba aur ibaadat
me lage rahe. Aakhir me unki biwi ne aap se puchha ke
‘Aap meri taraf dekhte kyun nahi?’ Aap ne puchha ‘Tum
kaun ho?’ Us ne kaha ‘Main aap ki biwi hu.’ Aap ne
farmaaya ‘Ye kaise ho sakta hai ke mere dil me do cheez ki
mohabbat ek saath rahe, Jab ke main to ek ki mohabbat me
gum ho chuka hu.’ Ye kehte hue jaise hi aap ne apni biwi ki
taraf dekha to wo us noor ki tajalli bardaasht na kar saki
aur jalne lagi.
*************
649 Hijri (1253 A.D.) me Baba Fareed ne aap ko Kaliyar ke
wali aur nigehbaan banakar bheja.
Aap jab Kaliyar pahunche to Gulzari naam ki ek aurat ke
waha rooke.
Aap ne Kaliyar me islaam ki isha’at shuru ki.
Kaliyar ka Qaazi Tabrak aap se hasad rakhta tha. Ek baar
Jumeraat ko jab aap masjid me taqreer farma rahe the, tab
Tabrak ke kehne par raeese Kaliyar ne aakar aap se kaha
ke ‘Meri bakari 3 mahine pehle goom ho gai hai. Agar tum
us ke baare me bata sakte ho to ham tumhe apna Imaam
maanenge.’
Aap ne aasman ki taraf dekhkar farmaaya ‘Jinho ne is ki
bakari ko khaya hai wo sab aage aa jaaye.’ 27 aadami
waha aa pahunche. Lekin unho ne is se inkaar kiya. To aap
ne raeese Kaliyar ko us ki bakari ko pukaarne ke liye kaha.
Us ne kaha ‘Harmana Harmana! Tum kaha ho?’ Tab un
logo ke pait me se bakari bolne lagi ke ‘Mujhe ye log
maarkar kha gaye hain.’
Phir bhi wo log aap ko pareshan karte rahe.
Ek baar aap namaaz e jum’ah ke liye masjid me gaye aur
pehli saf me khade hue to us ne aap ko pichhe jaane ke liye
kaha aur kaha ke ‘Aage ki saf me sirf ameer log namaaz
padhenge.’ Jab sab log sajde me gaye to aap ne masjid ke
farmaya ke ‘Sab log sajda kar rahe hain, tu bhi sajda kar
le.’ Ye sunkar masjid tutkar gir gai aur waha maujood sab
log us ke neeche dab gaye. Jab Gulzari ko pata chala to wo
bhagkar masjid me aai kyun ke uska beta bhi waha namaaz
padhne ke liye aaya tha. Aap ne use apne bete ko un murdo
ke bich me se baahar nikalne ke liye kaha. Us ne apne bete
ko talaash karke nikala to dekha ke wo zinda ho gaya tha.
Is ke baad aap 12 saal tak ek guler ke darakht ke neeche
khade hokar ibaadat e ilāhi ki.
*************
Aqwaal :
‾‾‾‾‾‾‾‾
(1) Agar aa’la martaba paana chahte ho to Saadgi aur
Sachai apnao.
(2) Murshid ke paas mureed ki khaamiyo ko sudharkar
raahe haq dikhane ki salaahiyat honi chahiye.
*************
Aap Hazrat Baba Fareed-ud-deen Mas’ood Ganje-Shakar
Chishti rahmatullāhi alaihi ke mureed aur khalifa hain.
Aap se Silsila ‘Chishtiya Saabiriya’ jaari hai.
Aap ke khalifa Hazrat Khawaja Shams-ud-deen Turk
Panipati rahmatullāhi alaihi hain.
*************
Hazrat Saabir piya rahmatullāhi alaihi ke ek mureed ne aap
se sawaal kiya ke ‘Aap mujhe samjhaye ke ‘Fana aur Baqa
kya hai?’ Aap ne use kaha ke ‘Tum kuchh din intazaar karo,
main baad main tumhe bataunga.’
Uske kuchh din baad aap ka inteqal ho gaya. Aap ne wisaal
se pehle wasiyat ki thi ke ‘Mere inteqal ke baad mujhe ek
kamre me rakh dena aur kuchh waqt guzarne ke baad ek
naqaabposh shakhs aakar mera ghusl aur takfin karga. Is
ke baad wo hi meri namaaz e janaaza padhaega.’
Logo ne aisa hi kiya. Aap ko ek kamre me rakh diya. Kuchh
der baad ek naqaabposh shakhs aaya aur kamre me jaakar
aap ko ghusl diya aur takfin kiya Phir bahar aakar usne
namaaz e janaaza padhaai aur jab ghode par sawaar hokar
jaane lage to us mureed ne use roka aur kaha ke ‘Aap kaun
hain ye to hame bataa’iye ya kam se kam apna naqaab
hataakar apna chehra dikha de to hame pata chale ke
hamare peer ki namaaz e janaza kis ne padhaai?’
Tab us naqaabposh shakhs ne apna naqaab uthaaya to sab
ne dekha ke wo shakhs ‘Hazrat Saabir piya’ hi the.
To us mureed ne hairat se puchha ke ‘Ye kya muamala
hai?’
To Hazrat Saabir piya ne use kaha ke ‘Kuchh din pehle tune
puchha tha ke Fana aur Baqa kya hai aur Maine kaha tha
ke tujhe kuchh din baad bataunga. To ye mera jawaab hai.
Jo janaaze me leta hai wo ‘fana’ hai aur jo tere saamne
khada hai wo ‘baqa’ hai.’
*************
Aap ka wisaal 13 Rabi’ ul awwal 690 Hijri (16 March 1291
A.D.) ko 98 baras ki umr me hua.
Aap ka mazaar Kaliyar (Uttarakhand) me hai.
*************
ALLĀH ta’ala us ke Habeeb sallallāhu alaihi wa sallam ke
sadqe me
Aur Hazrat Khwaja Saabir piya rahmatullāhi alaihi ke aur
Ahle bait aur Auliya Allāh ke waseele se
Sab ko mukammal ishqe Rasool ata farmae aur Sab ke
Eimaan ki hifaazat farmae aur Sab ko nek amal karne ki
taufiq ata farmae.
Aur Sab ko dunya wa aakhirat me kaamyaabi ata farmae
aur Sab ki nek jaa’iz muraado ko puri farmae.
Aameen.

%d bloggers like this: