namaz ki fazilat in hindi urdu namaz ka bayan Farmane ILAAHI hai :
Tehqeeq Namaaz musalmaanon par waqt e muqarrar par likhi huwi hai.
Aur farmane NABAWI ﷺ hai , ALLAH TA’ALA ne bandon par 5 namazein farz ki, jo shakhs unhein baa’azmat samajhte huwe mukammal sharaaiton ke saath adaa karta hai, ALLAH TA’ALA ka uske liye waada hai ke
WOH us shakhs ko jannat mein daakhil farmayega aur jo unhein adaa nahi karta ALLAH TA’ALA ka uske liye koi waada nahi hai, chaahe to usey azaab de aur agar chaahe to jannat mein daakhil farma de.
Farmane NABAWI ﷺ hai ke 5 namazon ki misaal tum mein se kisi ek ke ghar ke saath behne wali wasee’ kushgawaar paani ki neher jaisi hai jisse woh din mein 5 martaba nahaata hai, kya uske jism par mayl baaqi rahega ? SAHABA E KIRAAM ne arz ki nahi, AAPNE farmaya jaise paani mayl kuchail ko bahaa le jaata hai usi tarah 5 namazein bhi gunaahon ko bahaa le jaati hai.
NAMAZ GUNAHON KA KAFFARA HAI :
HUZOOR ﷺ ka irshaad e giraami hai ke namazein apne waqton ke beech paaye jaanewale gunaahon ka kaffara hai basharte ke kabeera gunaahon se parhez kiya jaaye jaisa ke farmane ILAAHI hai :
Beshak nekiyaan buraaiyyon ko khaa jaati hai.
Matlab ye hai ke woh gunaahon ka kaffara ho jaati hai, goya ke gunaah the hi nahi.
Bukhari wa Muslim aur digar as-haabe sunan wagaira ne HAZRATE IBNE MAS’OOD رضي الله عنه se riwaayat ki hai ke ek shakhs ne kisi aurat ka bosaa le liya aur HUZOOR ﷺ ki khidmat mein haazir ho kar ye waqiyaa keh sunaaya, goya woh uska kaffara poochna chaahta tha , jab HUZOOR ﷺ par ye aayat naazil hui :
Aur qaayam kar namaaz din ke dono atraaf mein.
To us shakhs ne arz ki ke ye mere liye hai ? AAPNE farmaya MERE har us ummati ke liye hai jisne aisa kaam kiya.
NAMAZ KI TAAKEED MEIN IRSHAAD E NABAWIYA:
Musnad Ahmed aur Muslim Shareef mein HAZRATE ABU UMAAMA رضي الله عنه se marwi hai ke NABI E KAREEM ﷺ ki khidmat mein ek aadmi haazir hua aur arz ki ke mujhpar hadd jaari farmaiyye usne ek ya do martaba yahi baat kahi magar HUZOOR ﷺ ne tawajjoh nahi farmayi, phir namaz padhi gayi, jab namaz se AAP faarig huwe to farmaya woh aadmi kahan hai ? Usne arz ki main haazir hun YAA RASOOLALLAH !
AAPNE farmaya tu ne mukammal wuzu karke hamare saath abhi namaz padhi hai ? Usne arz ki jee haan ! AAPNE farmaya tu gunaahon se aisa paak hai jaise teri maa ne tujhe janaa tha, aaindaa aisa naa karna ! Us waqt HUZOOR ﷺ par ye aayat naazil hui ki “nekiyaan gunaahon ko le jaati hai ” aur AAPKA irshaad hai ke hamare aur munaafiqon ke darmiyaan farq ishaa aur fajr ki namaz hai woh unmein aane ki taaqat nahi rakhte.
HUZOOR SARWARE KAAINAAT ﷺ ka irshaad hai, jo shakhs ALLAH TA’ALA se is haalat mein mulaaqaat kare ke usne namazein zaaya (barbaad) kardi hon to ALLAH TA’ALA uski nekiyon ki parwaah nahi karega.
Farmane NABAWI ﷺ hai ke namaaz deen ka sutoon hai , jisne usey chord diya usne deen (ki imaarat ) ko dhaa diya.
HUZOOR ﷺ se poocha gaya ke kaunsa amal afzal hai ? to AAPNE farmaya namaz ko unke auqaat (waqton) mein adaa karna.
Farmane NABAWI ﷺ hai jisne mukammal paakeezgi ke saath sahi auqaat mein hamesha paanch namaazon ko adaa kiya qayamat ke din namazein uske liye Noor aur hujjat hongi aur jisne unhein zaaya kar diya woh firaun aur haamaan ke saath uthaaya jaayega.
HUZOOR ﷺ ka irshaad hai ke namaz jannat ki kunji hai. mazeed farmaya ke ALLAH TA’ALA ne tauheed ke baad namaz se zyada pasandeedah koi amal farz nahi kiya aur ALLAH TA’ALA ne pasandeedgee hi ki wajah se farishton ko isi ibaadat mein masroof farmaya hai, lihaaza unmein se kuch ruku mein , kuch sajde mein, baaz qiyaam mein aur baaz qu’ood ki haalat mein ibaadat kar rahe hai.
Farmane NABAWI ﷺ hai “jisne jaan boojh kar namaaz chord di woh hadde kufr ke qareeb hogaya ” yaani woh Imaan se nikalne ke qareeb hogaya kyunki usne ALLAH TA’ALA ki mazboot rassi ko chord diya aur deen ke sutoon ko giraa diya jaise us shakhs ko jo sheher ke qareeb pohonch jaaye, kaha jaata hai ke woh sheher mein pohonch gaya hai, daakhil hogaya hai, isi tarah is hadees mein bhi farmaya gaya hai.
Aur HUZOOR ﷺ ne farmaya ke jisne jaan boojh kar namaaz chord di woh MOHAMMAD ﷺ ki zimmedaari se nikal gaya.
HAZRATE ABU HURAIRA رضي الله عنه ka farmaan hai jisne behtareen wuzu kiya phir namaaz ke iraade se niklaa woh namaaz mein hai jab tak ke woh namaaz ke iraade se masjid ki taraf chalta rahe, uske ek qadam ke badle neki likhi jaati hai aur doosre qadam ke badle mein ek gunaah mitaa diya jaata hai. jab tum mein se koi ek iqaamat sune to uske liye taakheer (der karna) munaasib nahi hai,
tum mein se woh zyada ajar (sawaab) paata hai jiska ghar door hota hai , poocha gaya ABU HURAIRA iski kya wajah hai ? AAPNE farmaya zyada qadam chalne ki wajah se usey ye fazeelat haasil hai.
Aur RASOOLALLAH ﷺ ne farmaya tanhaayi ki ibaadat se afzal koi amal nahi hai jiski badaulat ALLAH TA’ALA ka qurb jald haasil ho jaaye.
Aur HUZOOR NABI E KAREEM ﷺ ka irshaad hai ke aisa koi musalmaan nahi hai jo raza’e ILAAHI ke liye sajda karta hai aur uske har sajde ke badle mein uska ek darjaa buland naa hota ho aur ALLAH TA’ALA uska ek gunaah naa mitaa deta ho.
Marwi hai ke ek shakhs ne HUZOOR ﷺ se arz ki ke mere liye dua farmaiyye ke ALLAH TA’ALA mujhe AAPKI shafaa’at ke mustahiqeen mein se banaaye aur jannat mein AAPKI sohbat naseeb farmaye, HUZOOR ﷺ ne farmaya ke kasrat e sujood se meri madad chaaho (yaani kasrat se ibaadat karo ).
Ye bhi kaha gaya hai ke insaan sajde mein RAB ke bohot qareeb hota hai chunaanche farmane ILAAHI hai :
“Aur sajda kar aur qareeb ho jaa.”
Farmane ILAAHI hai :
“Unki nishaani unke chehron par sajdon ke asraat hai.”
Is aayat ki tafseer mein mukhtalif aqwaal hai , ye ke is se muraad chehron ka woh hissa hai jo sajdon ke waqt zameen se lagta hai, yaa ye ke is se muraad khushu wa khuzu ka Noor hai jo baatin se zaahir par chamakta hai aur uski shuaaen chehron par numaaya hoti hai aur yahi baat zyada sahi hai.
Yaa ye ke is se muraad woh Noor hai jo wuzu ke nishaanaat par qayamat ke din unke chehron par chamkega.
Farmane NABAWI ﷺ hai jab insaan sajde ki aayat padhkar sajda karta hai toh shaitaan rote huwe alaahida ho jaata hai aur kehta hai, haaye afsos isey sajdon ka hukm diya gaya aur isne sajda karke jannat paa li aur mujhe sajde ka hukm diya gaya tha magar maine naafarmaani ki aur mere liye jahannam banaaya gaya.MAZAMMATE UJOOB (GHAMAND) WA TAKABBUR baab 42
NAMAAZ KE BAARE MEIN IRSHAADAAT E BUZURGAANE DEEN :
HAZRATE ALI BIN ABDULLAH BIN ABBAS رضي الله عنهمم se marwi hai ke AAP har roz hazaar (1000) sajde karte the isliye log unhein SAJJAAD (zyada sajda karnewala) kaha karte the.
Marwi hai ke HAZRATE UMAR BIN ABDUL AZEEZ رضي الله عنه hameshaa mitti par sajda kiya karte the. JANAAB YUSUF BIN ASBAAT رحمت لله عليه farmaya karte Aye jawaanon ! marz se pehle tandrusti ko ganeemat samajhte huwe aage badho, siwaaye ek aadmi ke aur koi aisa nahi hai jispar MAIN rashk karta hun, woh hai ruku aur sajdon ko mukammal karnewala, yehi MERE aur uske darmiyaan haail ho gaye hai.Masjid ki Fazilat ka bayan
HAZRATE SAEED BIN JUBAIR رضي الله عنه farmate hai ke sajdon ke siwa MUJHE duniya ki kisi cheez se uns nahi hai.Nabi alaihissalam mard ko dekh kar kya farmate? 03Hadise nabwi
HAZRATE AQBAA BIN MUSLIM رحمت لله عليه ne kaha hai, ALLAH TA’ALA ko bande ki is aadat se badh kar koi aur cheez zyaada pasand nahi hai jisme woh ALLAH TA’ALA ki mulaaqaat ko pasand karta hai aur aisa koi lamha nahi hai jisme insaan ALLAH ke qareebtar ho jaata hai jabke woh sar ba-sujood ho jaata hai.islamic hadees in hindi zikrullah kya he
HAZRATE ABU HURAIRA رضي الله عنه ka farmaan hai insaan sajde ki haalat mein RAB se bohot qareeb ho jaata hai, lihaaza sujood mein bohot zyaada duayein maanga karo.
END OF BAAB 48.