KHAUF E ILAAHI Allah ka khof allah ka dar

BAAB 2

KHAUF E ILAAHI
Janaab Allaama Abul-lais rehmatullaah alaih kehte hai ke saatwein aasmaan par ALLAH ke aise farishte hain ke unhe ALLAH TA’ALA ne jab se paida kiya hai, baraabar sajde me hai aur ALLAH TA’ALA ke azaab se intehaayi khauf-zadaa hain, qayaamat ke din jab woh sajde se sar uthaayenge to kahenge,
“Aye ALLAH! Tu paak hai, hum Teri kama haqqahu ibaadat nahi kar sake.”
ALLAH TA’ALA ka farmaan hai:
Wo farishte apne RAB se darte hai aur jis cheez ka unhe hukm diya gaya hai wahi karte hai aur 1 pal bhi Meri naa-farmaani me nahi guzaarte.
RASOOL E AKRAM sallallahu alaihi wasallam ne irshaad farmaaya:
Jab koi banda ALLAH ke khauf se kaanpta hai to uske gunaah uske badan

se aise jhad jaate hain jaise darakht ko hilaane se uske patte jhad jaate hain.
HIQAAYAT:
 1 naujawaan 1 aurat ki mohabbat me giraftaar ho gaya, woh aurat kisi qaafile ke saath baahar ke safar par rawaana ho gayi, jawaan ko jab maaloom huwa to wo bhi qaafile ke saath chal pada. jab qaafila jungle me pahoncha to raat ho gayi, raat ko unhone wahin padaao kiya, jab sab log so gaye to wo naujawaan chupke se us aurat ke paas pahoncha aur kehne laga main tujh se be-intehaa mohabbat karta hun aur isi liye main qaafile ke saath aa raha hun. aurat boli jaa kar dekho koi jaag to nahi raha hai? jawaan ne maare khushi ke saare qaafile ka chakkar lagaaya aur waapas aakar kehne laga ke sab log be-khabar pade so rahe hai, aurat ne poocha ALLAH TA’ALA ke baare me tera kya khayaal hai? kya WOH bhi so raha hai? jawaan bola! ALLAH to na kabhi sota hai, na hi USE kabhi oongh aati hai, tab aurat boli ! log so gaye to kya huwa, ALLAH to jaag raha hai, hamein dekh raha hai, US se darna hum par farz hai, jawaan ne jaise hi ye baat suni KHUDA ke darr se kaanpne laga aur bure iraade se tauba karke ghar waapas chala gaya.
kehte hai ke jab woh jawaan maraa to kisi ne usko khwaab me dekh kar poocha, sunao kya guzri?
Jawaan ne jawaab diya maine ALLAH TA’ALA ke khauf se ek gunaah ko chhoda tha,
ALLAH TA’ALA ne usi wajah se mere tamaam gunaahon ko baksh diya.

SUBHANALLAH
HIQAAYAT:

Majmaul lataaif me hai ki bani israail me ek qaseerul ayaal (zyaada aulaad waala) aabid tha, use tangdasti ne gher liya, jab bohot pareshaan hua to apni aurat se kaha jao, kisise kuch maang kar lao. aurat ne ek taajir ke yahan ja kar khaane ka sawaal kiya, taajir ne kaha agar tum meri aarzu poori kar sakti ho to jo chaaho le sakti ho, aurat bechaari chupchaap khaali haath ghar laut aayi. bachhon ne jab maa ko khaali haath aate dekha to bhook se chillaane lage aur kehne lage ammi ! Hum bhook se mar rahe hain, hamein kuch khaane ko do, aurat dobaara usi taajir ke yahan laut gayi aur khaane ka sawaal kiya, taajir ne phir wohi baat ki jo pehle keh chuka tha, aurat razaamand ho gayi magar jab ye dono takhliya (tanhaayi) me pahonche to aurat khauf se kaanpne lagi, taajir ne poocha kis se darti ho?
Usne kaha main us RABBE lam yazal ke khauf se larzaan ( kaanpti) hun jisne hamein paida kiya. tab taajir bola jab tum itni tangdasti aur muflisi me bhi KHUDA ka khauf rakhti ho, to mujhe bhi ALLAH ke azaab se darna chaahiye, ye kaha aur aurat ko bohot sa maal wa manaal dekar izzat ke saath rawaana kiya.
ALLAH TA’ALA ne Paigambar-e-waqt MOOSA alaihissalaam par WAHI bheji ke fulaan ibne fulaan ke paas jao aur use Mera salaam keh do aur kehna ke Maine uske tamaam gunaahon ko maaf kar diya hai. MOOSA alaihissalaam ALLAH ke hukm ke mutaabiq us taajir ke paas aaye aur poocha kya tumne koi azeem neki anjaam di hai jiski wajah se ALLAH TA’ALA ne tumhaare tamaam gunaahon ko maaf kar diya hai aur jawaab me taajir ne upar bayaan kiya hua saara waaqiya keh sunaya.

SUBHANALLAH.
HUZOOR sallallahu alaihi wasallam farmate hain:
Farmaane ILAAHI hai-
“Main apne kisi bande par do khauf aur do aman (sukoon) jama nahi karta.
Jo shakhs duniya me Mere azaab se darta hai, Main use aakhirat me be-khauf kar dunga, lekin jo duniya me Mere azaab se be-Khauf rehta hai Main use aakhirat me khaufzada karunga.”( uspar azaab naazil karunga)
ALLAH TA’ALA ka irshaad hai :
“Tum logon se nahi, Mujh se daro.”
Ek aur me hai:
“Agar tum momin ho to logon se nahi Mujhse daro.”
HAZRAT E UMAR RADIYALLAHU ANHU AUR KHASHIYAT E ILAAHI

HAZRAT E UMAR radiyallahu anhu jab QUR’AN MAJEED ki koi aayat sunte to khauf se behosh ho jaate. Ek din ek tinka me lekar kaha kaash! Main ek tinka hota, koi kaabil e zikr cheez na hota, kaash Mujhe meri maa na janti (paida karti) aur KHUDA ke darr se Aap itna roya karte the ke Aap ke chehre par aasuon ke behne ki wajah se do kaale nishaan pad gaye the.
HUZOOR sallallahu alaihi wasallam ne farmaya:
Jo shakhs khauf e KHUDA se rota hai wo jahannam me hargiz daakhil nahi hoga, usi tarah jaise ke doodh dobaara apne thanon me nahi jaata.
Dakaaikul akhbaar me hai ke qayaamat ke din ek shakhs ko laaya jayega, jab uske aamaal tole jayenge to buraayion ka palda bhaari ho jayega chunaanche use jahannam me daalne ka hukm milega, us waqt uski palkon ka ek baal ALLAH ki baargaah me arz karega ke Aye RABBE ZUL JALAAL! TERE RASOOL sallallahu alaihi wasallam ne farmaya tha jo ALLAH ke darr se rota hai uspar jahannam ki aag haraam kar deta hai, aur main tere khauf se roya tha, ALLAH TA’ALA ka dariya e Rehmat josh me aaya aur us shakhs ko ek ashkbaar (ronewaale) baal ke badle jahannam se bacha liya jayega, us waqt HAZRAT E JIBRAEEL alaihis salaam pukaarenge “fulaan bin fulaan ek baal ke badle najaat paa gaya.”
Hidaayatul Hidaaya me hai ki qayaamat ke din jab jahannam ko laaya jayega to us se haibatnaak aawaazein niklegi jis ki wajah se log us par se guzrane me ghabraayenge.
Jab log jahannam ke kareeb aayenge to us se sakht garmi aur khaufnaak aawaazein sunenge jo 500 saal ke safar ki doori se sunaayi deti hongi, jab har NABI nafsi nafsi aur HUZOOR sallallahu alaihi wasallam ummati ummati keh rahe honge us waqt jahannam se ek bohot hi buland aag baahar niklegi aur HUZOOR sallallahu alaihi wasallam ki ummat ki taraf badhegi, AAP ki ummat us ki Mudafiyaat ( bachaoo) me kahengi
“Aye aag! Tujhe Namaaziyon, sadqa denewalon, Roza daaron aur Khauf e KHUDA rakhnewaalon ka waasta, waapas chali ja!” Magar aag baraabar badhti chali jaayegi, tab Hazrat e JIBRAEEL alaihis salaam , yeh kehte hue ki jahannam ki aag Ummat e MUHAMMAD sallallahu alaihi wasallam ki taraf badh rahi hai, AAP ki khidmat me paani ka ek pyala pesh karenge aur arz karenge, Aye ALLAH ke NABI ! is se aag par cheente maariye.
AAP aag par paani ke cheente maarenge to woh aag fauran bujh jaayegi, us waqt AAP sallallahu alaihi wasallam JIBRAEEL se us paani ke baare poochenge, JIBRAEEL kahenge HUZOOR ! yeh khauf e KHUDA se ronewaale AAP ke gunahgaar ummatiyon ke aansu the, mujhe hukm diya gaya ki main ye paani AAPKI khidmat me pesh karun aur AAP us se jahannam ki aag ko bujha dein.
SUBHANALLAH.
HUZOOR sallallahu alaihi wasallam dua maanga karte the “AYE ALLAH ! Mujhe aisi aakhen ataa farma jo Tere khauf se rone waali hon.”
Hadees Shareef me hai “koi aisa banda e momin nahin jis ki aakhon se khauf e KHUDA se makkhi ke par ke baraabar aansu bahein aur us ki garmi us ke chehre par pahonche aur use kabhi jahannam ki aag chhue.”
Janaab Mohammad bin Almunzar rehmatullah alaih jab khauf e KHUDA se rote to apni daadhi aur chehre par aansu malaa karte aur kehte “maine suna hai ke wujood ke jis hisse par aansu lag jaayeinge use jahannam ki aag nahin chhuegi.”
Har momin ke liye zaroori hai ke wo azaab e Ilaahi se darta rahe aur apne aapko khwaahishaat e nafsaani se rokta rahe.
Farmaane ILAAHI hai:
“Pas jis kisi ne naafarmaani ki aur duniya ki zindagi ko sabkuch jaana uska thikaana jahannam hai aur jo apne Rab ke saamne khade rehne se daraa aur apne nafs ko khwaahishaat se rok diya to uski panaahgaah Jannat hai.”
Jo insaan azaab e ILAAHI se bachna chaahe aur sawaab o rehmat ka ummeedwaar ho use chaahiye ke dunyavi masaaib par sabr kare.
ALLAH ki ibaadat karta rahe aur gunaahon se bachta rahe.
 Zehrur-riyaaz me ek Hadees hai ke jab Jannati Jannat me daakhil honge to farishte unke saamne tarah tarah ki ne’matein pesh karenge. Unke liye farsh bichaayenge, mimbar rakhe jaayenge aur unhe mukhtalif qism ke khaane aur phal pesh kiye jaayenge, us waqt Jannati hairaan baithe honge.
ALLAH TA’ALA farmayega;
aye MERE bandon hairaan kyun ho? Ye bahist jaa e hairat nahi hai, us waqt momin arz karenge BAAR E ILAAHA Tu ne ek waada kiya tha jiska waqt aa pahoncha hai, tab farishton ko hukm e ILAAHI hoga ke unke chehron se parde utha lo, farishte arz karenge, ye TERA deedaar kaise karenge, haalaan ke ye gunahgaar the?
Us dam farmaane ILAAHI hoga tum hijaab utha do, ye zikr karnewaale, sajda karnewaale aur MERE khauf se ronewaale the aur MERE deedaar ke ummeedwaar the, us waqt parde utha diye jaayenge aur Jannati ALLAH ka deedaar hote hi sajde me gir jaayenge.
Farmaane ILAAHI hoga sar utha lo ye Jannat daar e Amal nahi daar e Jazaa hai aur wo apne RAB ko be-Kaif dekhenge.
Rab farmayega
“MERE bandon tum par salaamati ho, MAIN tumse raazi hun kya tum MUJH se raazi ho?
Jannati arz karenge, AYE hamaare RAB! hum kaise raazi nahi honge haalaan ke TU ne hamein woh ne’matein di jinhe naa kisi aankh ne dekha, naa kisi kaan ne suna aur naa hi kisi dil me inka tasawwur guzra aur yahi is farmaane ILAAHI ka maqsood hai ke ALLAH unse raazi huwa aur woh ALLAH se raazi huwe aur salaamun qaulam mir rabbir raheem.

End of Baab 2.