TAAREEF E IMAAN WA ZAMME MUNAAFIQAT
:

Jaan lijiye ke imaan ALLAH TA’ALA ki wahdaaniyat ki tasdeeq aur RASOOLON ke laaye huwe ehkaamaat ki taaeed wa tasdeeq aur aamaal ke majmue ka naam hai , farmaane ILAAHI hai :-

“Imaandaar log wohi hai jo ALLAH  aur uske RASOOL par imaan laaye phir unhone shaq nahi kiya aur raah e KHUDA mein apne maalon aur jaanon ke saath jihaad kiya , yehi log sache hain.”
doosri aayat mein irshaad hai :-
“Lekin bhalaayi uske liye hai jo ALLAH aur qayamat ke din aur farishton aur kitaabon aur NABIYON par imaan laaya.”
isi tarah ALLAH TA’ALA ne 20 sifaat maslan ahad (waada) ka poora karna, masaaib par sabr karna wagairah , imaan e kaamil ki shartein rakhi hai , fir irshaad farmaya “yehi log hai jinhone sach kiya ” ek aur aayat mein farmaane ILAAHI hai “ALLAH TA’ALA un logon ko buland karega jo tum mein se imaan laaye aur jinko ilm diya gaya hai unhe darjaat” ek aur maqaam par irshaad e ILAAHI hai “Nahi baraabar tum mein se woh shaks jisne fateh Makkah se pehle kharch kiya aur ladaayi ki”
Farmaane ILAAHI hai
“yeh log ALLAH TA’ALA ke nazdeeq maraatib par faaiz hain”.

 Farmane NABAWI ﷺ hai ke imaan barhana hai aur uska libaas taqwa hai , aur irshaad farmaya ke imaan ke kuch upar 70 darje hain aur kamtareen darja raaste se takleef pohonchaane waali cheez ko door karna hai .
yehi hadees is amr par dalaalat karti hai ke kaamil imaan amal se mashroot wa marboot hai aur imaan ka nifaaq se chutkaara aur shirk e khafi se alaahidgi par marboot hona HUZOOR ﷺ ke is farmaan se saabit hai , irshaad hota hai chaar cheezein jismein ho woh namaazi wa rozedaar hone ke baawajood khaalis munaafiq hai agarche woh khud ko momin hi samajhta rahe , jab woh baat kare to  jhoot bole , waada karke waada khilaafi kare, uske yahan amaanat rakhi jaaye to khayaanat kare aur jab jhagda kare to behuda-pan par utar aaye. Baaz riwaayaton mein hai ke jab muaahida kare to usey tod daale.

HAZRAT E ABU SAEED KHUDRI رضي الله عنه se marwi hadees mein hai , dil 4 hain, duniyaawi khwaahishaat se paak dil jis mein maarefat ka charaag raushan hai aur yehi momin ka dil hai , aisa dil jismein imaan aur nifaaq dono hon aise dil mein imaan sabze ki tarah hai jo meethe paani se nashv wa numa paata hai aur nifaaq aise zakhm ki tarah hai jo peep aur gande khoon se phailta jaata hai , un mein se jo cheez gaalib aa jaati hai dil par usi ka hukm chalta hai. doosri riwaayat ke alfaaz hain ke jo unmein se gaalib ho jaata hai woh doosre ko le jaata hai. Farmaane NABAWI ﷺ hai ke MERI ummat ke aksar munaafiq qaari hain.
ek hadees mein hai ke MERI ummat mein shirk , safaa pahaad par chalne waali choonti se bhi zyaada poshida hai.

HAZRAT E HUZAIFA رضي الله عنه farmaya karte the ke HUZOOR ﷺ ke ahad e mubaarak mein aadmi ek baat aisi karta hai jiske sabab marte waqt tak woh munaafiq ho jaata hai aur MAIN tumse waisi 10 baatein rozaana sunta hun.
Baaz Ulema ka kehna hai ke woh shaks nifaaq se bohot qareeb hai jo khud ko nifaaq se baree samajhta hai.
HAZRAT E HUZAIFA رضي الله عنه farmaate hain ke aaj HUZOOR ﷺ ke ahad e mubaarak se zyada munaafiq hain , tab munaafiq apna nifaaq poshida rakhte the aur ab zaahir karte hain , yehi nifaaq kamaal e imaani aur sidqe imaan ki zidd hai kyunki yeh poshida hai , jo us sey khaufzada hota hai woh us sey door hota hai aur us sey qareeb wohi hota hai jo khud ko us sey baree samajhta hai chunaanche HAZRATE HASAN رضي الله عنه se kaha gaya ke log kehte hain aaj nifaaq baaki nahi raha hai , AAPNE farmaaya aye bhai agar munaafiq halaaq ho jaayein to tum raaston par wehshat-zada ho jao aur AAPNE ya kisi aur ne kaha ke agar munaafiqon ke khur paida ho jaayein to hum zameen par qadmon se na chal paayein ( unki kasrat ke sabab raah chalna dushwaar ho jaaye ).

HAZRATE IBNE UMAR رضي الله عنه ne ek aadmi ko Hajjaaj ko bura-bhala kehte sun kar farmaya agar Hajjaaj maujood hota to tum yeh baatein karte? Usne kaha nahi, Aapne yeh sunkar farmaaya ke hum is cheez ko HUZOOR ﷺ ke zamaane me nifaaq me shumaar karte the.
NABI E KAREEM ﷺ farmaate hain ke jo shakhs duniya me do zabaanon waala hota hai Aakhirat me ALLAH TA’ALA usey do zabaanon waala banaayega, mazeed farmaya bad-tareen aadmi do chehron waala hai jo iske paas ek chehre se aur doosre ke paas doosre chehre se hota hai ( yaani munaafiqat karta hai).
JANAABE HASAN BASRI رضي الله عنه se kaha gaya kuch log kehte hain ke Aap ko nifaaq ka khauf nahi hai, Aapne farmaaya BAKHUDA mujhe zameen ki har bulandi ke baraabar sone ka maalik hone se yeh baat zyaada pasand hai ke Mujhe maaloom ho jaaye Main nifaaq se baree hun.

JANAAB E HASAN رضي الله عنه ka qaul hai , nifaaq ki wajah se zabaan aur dil mukhtalif hote hain , poshidaa aur zaahir ka ikhtelaaf hota hai aur aane jaane mein farq hota hai, daakhil hone ka raasta aur , aur nikalne ka aur hota hai. kisine HAZRAT E HUZAIFA رضي الله عنه se kaha ke main nifaaq se darta hun , AAPNE farmaya agar tum munaafiq hote to tumhe nifaaq ka khauf na hota kyunke munaafiq nifaaq se beparwaah hota hai.
JANAAB E IBN E ABI MULAIKA رضي الله عنه ne farmaya ke MAINE 130 aur ek riwaayat mein hai 150 SAHABA KARAAM ko paaya hai jo sab ke sab nifaaq se darte the.

Marwi hai HUZOOR ﷺ, SAHABA ki ek jamaa’at mein tashreef farma the , SAHABA KIRAAM ne ek aadmi ka tazkira kiya aur uski bohot zyaada taareef ki , sab hazraat isi tarah tashreef farma the , uske chehre se wuzu ka paani tapak raha tha , joota uske haath mein tha aur uski aankhon ke darmiyaan sajdon ka nishaan tha. SAHABA KIRAAM ne arz ki YAA RASOOLALLAH ﷺ! yeh wohi shakhs hai jiski HUMNE  AAPKE saamne taareef ki hai , HUZOOR ﷺ ne farmaya  MUJHE iske chehre par shaitaan ka asar nazar aata hai. woh aadmi aakar SAHABA ke saath mein baith gaya aur HUZOOR ﷺ ko salaam kiya. AAPNE usey dekh kar farmaya MAIN tujhe ALLAH ki kasam deta hun , bata ke jab tu ne in logon ko dekha to tere dil mein yeh khayaal aaya tha ki tu inse achha hai ? woh bola Aye ALLAH ke RASOOL ﷺ,! haan , tab AAPNE Apni dua mein farmaya aye ALLAH ! MAIN TUJHSE har us baat se jisey jaanta hun ya nahi jaanta , bakshish talab karta hun. Farmaane KHUDA E BUZURG WA BARTAR hai :-
“Aur zaahir ho jaayega unke waaste ALLAH ki taraf jisko woh gumaan nahi karte the.
“
iski tafseer mein kaha gaya hai ke unhone aise aamaal kiye jinhe woh apne gumaan ke sabab nekiyaan samajhte the magar woh gunaahon ke palde mein jaa pade.

HAZRAT E SIRRI SIQTI رضي الله عنه ka qaul hai ke agar koi insaan aise baag mein jaaye jismein har qism ke darakht ho aur un darakhton par har qism ke parinde hon jo use dekh kar yak zabaan ho kar kahein , Aye ALLAH ke wali TUJH par salaam ho aur uska dil yeh baat sun kar mutmaeen ho jaaye to goya woh un parindon ka aseer hai.
yeh tamaam aqwaal wa Ahaadees tujhe un khatraat se waaqif karaayenge jo poshida nifaaq aur shirk e khafee par muntaha hote hain aur koi bhi aqalmand is se gaafil nahi rehta yahaan tak ke HAZRAT E UMAR رضي الله عنه HAZRAT E HUZAIFA رضي الله عنه se APNE muta’alliq poocha karte (yeh riwaayat pehle bhi guzar chuki hai )

JANAAB E SULEMAAN DAARAANI  رضي الله عنه ka qaul hai ke MAINE ek ameer se aisi baat suni jo MUJHE naagawaar guzri aur MAINE usey tokne ka iraada kiya magar MUJHE andesha huwa ke kahin yeh MUJHE  qatl karne ka hukm na de de , MAIN maut se nahi balke us baat se daraa ke qatl ke waqt logon ke saamne MERE dil mein yeh baat na aa jaaye ke MAINE kaisa oomda kaam kiya hai lihaaza MAIN usey tokne se ruk gaya.
yeh nifaaq ki woh qism hai jo imaan ki asal ko nahi balke uski safaayi , kamaal , haqeeqat aur sidq ke khilaaf hai. Nifaaq ki do qismein hai , ek qism woh hai jo Deen se nikaal kar kaafiron mein shaamil kar deti hai aur un logon ke saath jod deti hai jo hamesha hamesha ke liye jahannam mein rahenge,  doosri qism woh hai jo apne rakhne waalon ko kuch muddat jahannam mein pohonchayegi ya uske buland maraatib ko kam kar degi aur usey siddeeqon ke buland-tareen maqaam se neeche gira degi.

END OF BAAB 77