hazrat isa alaihis salam story in hindi mojizat

3348
Hazrat isa alaihis salam

Hazrat maryam alaihissalam  ke paas Hazrat jibril alaihissalam ka aane ki paidaish Hazrat isa alaihis salam ka muzda

Hazrat isa Alihissalam ki padaish

Qurane kareem me he ki

“aur kitaab me maryam ko yaad karo jab apne ghar waalo se purab ki taraf ek jagah alag ho gayi,

to unse udhar ek parda kar liya to uski taraf humne apna roohani bheija wah uske saamne ek tandurast aadmi ke roop me jaahir huwa”

(surah mariyam, aayat-16, 17)

Hazrat maryam alaihissalam ne tamaam se alaaiheda(alag) ho kar beitul muqaddas ki mashriqi(purab) jaanib ko ikhteyaar kiya,

taaki ibaadat ke liye aap ko khalwat(tanhaai) haasilh ho sake, isi wajah se aap alayhis salaam ne alaaiheda(alag) parde ko bhi ikhteyaar kiya ki koi aap ki ibaadat me khalel andaaz na ho sake,

Hazrat maryam alaihissalam ko gusl khana me jaate hue ek shaksh nazar aaya, jo bada waji’a, chamakdaar aur khubsurat uska rang tha aur uske ghungariyale baal the, ye hazat jibrail alayhis salaam the,

Hazrat jibril alaihissalamHazrat maryam alaihissalam ke paas kaamil insaani shakl me the, ya’ani insaani awsaaf se koi bhi aap me kami nazar nahi aati thi balki kaamil insaan nazar aate the,

Hazrat jibril alaihissalamkaamil bashar nazar aane ke bawajood bhi noor the, Hazrat jibril alaihissalamhaqiqat me noor aur jaahir me bashar the,

(tazkiratul ambiya alayhis salaam, safa-499)

Hazrat maryam alaihissalam ka khouf aur Hazrat jibril alaihissalamka tasalli deina

Qurane majeed me he ki Hazrat isa Alaihis salam story 

“boli mei tujhse rehmaan ki panaah maangti hu agar tujhe khuda ka dar he, bola mei teire rabb ka bheija huwa hu ki mei tujhe ek suthra beita du”

(surah mariyam, aayat-18, 19)

Ek ajnabi insaan ko deikh kar Hazrat maryam alaihissalam par khouf taari ho gaya ki ma’alum nahi ye insaan meire paas kahaa se kis iraade se aa gaya.

Fouran kaha khuda ki panaah agar tu muttaqi shaksh he, rabb ka tujhe koi khouf he to door ho jaa, meire parde me khalel andaaz na ban,

Hazrat jibril alaihissalamne kaha mei tumhaare rabb ka bheija huwa hu,

Ek riwaayat me he ki Hazrat maryam alaihissalam ne rabb ki panaah talab ki to Hazrat jibril alaihissalamne muskura kar kaha mei tumhaari qameez me foonk maar kar tumhe paakiza.

aur suthra beita deine ke liye aaya hu yani aysa beita ataa karne ke liye jo gunaaho ki aaludgi se paak wa saaf hoga uske neik aamal me roz baroz izafa(badotari) hota rahega aur makaame nabuwwat par faiz hoga.

(tafseere kabeer, jild-21, safa-196)

(tafseere roohul ma’ani, jild-9, hissa-1, safa-77)

 note:Allah Deta He

Haqiqat me farzand ataa farmaane wala allah tabarak wa ta’ala he lekin Hazrat jibril alaihissalamkyuki us ataa ka sabab aur zariya he,

is liye batoure mijaaz farzand deine ki nisbat apni taraf kardi, is se ma’alum huwa ki allah ta’ala ki ne’amato me se agar kisi ne’amat ke milne ko uske zariye aur waaste ki taraf mansub kiya jaaye.

aur yaqin ho ki man’ame haqiqi allah ta’ala he to aysi nisbat durust(sahih/thik) he,

(tafseere ziyaa ul quraan, jild-3, safa-73)

(tazkiratul ambiya alayhis salaam, safa-500)

Hazrat maryam alaihissalam ki heirat aur badh gayi :-*

Quraan e majeed me he ki

“boli meire ladka kaha se hoga mujhe to kisi aadmi ne haath na lagaya na mei badkaar hu, kaha yunhi hei teire rabb ne farmaya hei.

ki ye mujhe aasaan hei aur is liye ki hum use lougo ke waaste nishaani kare aur apni taraf se ek rahmat aur yah kaam thahar chuka hei”

(surah mariyam, aayat-20, 21)

Aap ko ye soon kar itna zyada ta’ajub huwa aur aap ne ise aql se baeed(mushkil/asambhav) samajhte hue ye kaha meira beita keise hoga.

Aap ko heiraangi ki wajah se iski taraf tawajjo hi nahi rahi ki mujhe ek farishta keh raha he ki mai tumhe ek suthra beita deine ke liye aaya hu,

(tafseere roohul ma’ani, jild-9, hissa-1, safa-78)

Aap ne yahi samjha ki beita to aadat ke mutaabiq hi peida ho sakta he ya to jaiz nikaah se ya badkaari se,

aap ibaadat me mustagraq(doobi) hone ki wajah se is taraf tawajjo hi na kar saki ki rabb ta’ala ki qudrat se to kuchh baeed(mushkil/asambhav) nahi,

Bageir baapke beite ko peida karne me allah ta’ala ki qudrat ko dakhal hoga uski qudrat ke saamne koi mushkil nahi aur isko lougo ke saamne nishaani banaya ja raha he.

ki wo allah ta’ala ki kaamil qudrat ko samjhe aur ye lougo ki rehnumaai ke liye rabb ki azeem rehmat he aur rabb ke ilm e azzali ke muta’abiq use lohe mehfuz par likha ja chuka he is feishle me kisi qism ki tabdili nahi ho sakti.

(tafseere roohul ma’ani, jild-9, safa-78)

(tazkiratul ambiya alayhis salaam, safa-500, 501)

Hazrat isa alaihissalam shikam e maadar me

Qurane paak me he ki

“ab mariyam ne use peit me liya fir use liye hue ek door jagah chali gayi”

(surah mariyam, aayat-22)

Hazrat maryam alaihissalam bani israail me neik zaaheda mashoor thi aur sabko ye ilm tha ki aap ki waalida ne nazar maani jo qabul kar li gayi,

aapki tarbiyat me ambiya e kiraam alayhis salaam silaharish the, wo kefaalat hazrat zakaria alayhis salaam ko haasil hui,

aapke paas allah ta’ala ki taraf se rizq aata raha, in waaqiyaat ke shohrat ke peishe nazar aapko bahot pareshani laahaq hui ki mei rabb ki us qudrat se lougo ko keise mut’maeen karungi.

Loug meiri baat keise maanenge. Isi wajah se aapne beitul muqaddas ke hujre ko chhod kar alaaiheda(alag) door daraaz jagah ikhteyaar kiya taki waqti tour par koi mutal’a(aagaah/jaankaar) na ho sake.

(tafseere kabeer, jild-21, safa-202)

(tazkiratul ambiya alayhis salaam, safa-502)

Hazrat isa alaihis salam in hindi urdu 2 aap ki paidaish dardezeh ke waqt pareshani me izaafa :-

Qurane kareem me he ki

“fir use janne ka dard(dardezeh) ek khajoor ki jad me le aaya boli haay kisi tarah mei is se pehle mar gayi hoti aur bhuli bisri ho jaati”

(surah maryam, aayat-23)

Dardezeh(baccha peida hone ka dard) ki takleef ki wajah se jo hasrat(afsos) haasil tha usne ek khajoor ke darakht(peid) ke paas aane ke liye majboor kar diya tha.

aur is wajah se bhi aapne khajoor ke darakht ka rukh kiya taaki baate karne waalo se parda-poshi(parda-daari) rahe,

Tafseere kassaf me zikr kiya gaya he ki khajoor ka darakht sirf tana tha uper se kata huwa khushk tha aur fal bhi nahi deita tha,

Allah ta’ala ne Hazrat jibril alaihissalamko “Hazrat maryam alaihissalam” ke paas bheij kar unke girebaan me foonkne ka hukm diya,

Hazrat maryam alaihissalam bataya gaya ki allah ta’ala tumhe beita ataa karne wala he tumhe aur tumhaare beite ko jahaan waalo ke liye nishaani banaya he,

Lekin fir bhi” Hazrat maryam alaihissalam” keh rahi he “haay kisi tarah mei is se pehle mar gayi hoti” aakhir itni be-qaraari ki kya wajah thi.

Wajah waazeh he ki ye aheshaas teiz-tar ho gaya ki ab tak lougo ki nazaro se chhipi rahi aur ab baccha bhi peida ho gaya to use kaha chhupaaungi.

aur lougo ko kya moonh dikhaaungi. Siddat(shakhti) me ye alfaaz zubaan par aagaye, rabb ta’ala par koi shikwa nahi tha balki lougo ki ta’anazani ki fikr thi aur zyadatar na-samaj lougo ko shamjhaane ki fikr thi,

Rabb ta’ala ke khouf ki haalat me is tarah ke alfaaz saaleheen se adaa hote rahe he, jeisa ki hazrat abu bakar siddiq radiallaho ta’ala anho ne ek parinde ko darakht par beithe hue deikha to aap ne farmaya.

ay parinde tu kitna hi khush-bakht he ki darakht par beith kar uska fal kha raha he, kaas me bhi koi fal hota ki mujhe parinde kha jate, aapka ye kalaam khoufe ilaahi ki wajah se tha,

Hazrate umar radiallaho ta’ala anho ne ghans ka ek tinka(ghans wageira ka tukda) hath me liya aur farmaya kaas mei bhi ghans ka ek tinka hi hota kash mei kuchh na hota, aap ka ye irshaad bhi allah ta’ala ke khouf ki wajah se hi tha,

Hazrate ali radiallaho ta’ala anho ne youme jamal me farmaya kaas mei aaj se 10 saal qabl(pehle) mar chuka hota, aap ka ye kehna zaahiri fitne se pareishani ki wajah se tha…

Khyaal rahe ki agar kisi shakhsh ne “Hazrat maryam alaihissalam” ke muta’alaq ye gumaan kiya ki unhone dardezeh ya dunyawi takaalif ke peshe nazar mout ki tamanna ki thi to usne bura gumaan kiya.

(roohul ma’ani, jild-2, hissa-1, safa-82)

(tazkiratul ambiya alayhis salaam, safa-502, 503, 504)

khaane-peene ka intezaam aur mazeed tasalli :-

Qurane kareem me he ki

“to use uske tale se pookara ki gum na rakh beishak teire rabb ne niche ek naher bahaa di he, aur khajoor ki jad pakad kar apni taraf hila tujh par taazi pakki khajoore girengi,

to khaa aur pee aur aankh thandi rakh fir agar tu kisi aadmi ko deikhe to keh deina meine aaj rehmaan ka roza mana he to aaj hargiz kisi aadmi se baat na karungi”

(surah maryam, aayat-24, 25, 26)

Aapko waadi ke nesheeb(niche) se aawaz aayi tum gum na karo humne tumhaari jagah se nasheebi(niche ki) taraf ek naher bahaadi jo tumhaare hukm ke ma-tehat hogi(Hazrat jibril alaihissalamne peir ki thokar maari to ye naher jaari hui.

ya “Hazrat isa alaihis salam” ne peida hone ke baad aydi ragdi to us se jaari hui) khajoor ka khushk tana jiska sar kataa huwa he,

mousam bhi sardiyo ka he, woh in haalaat me agar fal nahi deita lekin tum use apni taraf hilaao to wo tumhe paki hui taza khajoore deiga,

khaao aur peeo ya’ani khajoore khaao jo peidaish ke waqt zacha aur baccha douno ke liye bahot mufeed giza he aur zaari suda chasma se paani peeo,

isi se andaza laga lo ki allah ta’ala ne jis tarah tumhaare khane aur peene ka intezaam farma diya he isi tarah wo khatraat jo tumhaare zehan me aa rahe he wo bhi zaaeel(mitaa) kar deiga,

tumhaare nafs ko itmenaan haasil hoga, aankho ko thandak haasil hogi, is liye hukm diya nafs ko mutmaeen rakho aur aankho ko thanddaar rakho,

Ek riwaayat ye bhi milti he ki “Hazrat isa alaihis salam” ne peida hote hi waalida ko tasalli deite hue kaha gum na kha.

Hazrat maryam alaihissalam” ne kaha keise gum na khaau jab tum meire saath honge, meira khaawand(shohar) koi hei nahi aur mei kisi ki londi bhi nahi,

lougo ke saamne kya uzr peish karungi.  Kaas mei is se pehle hi mar jaati to hazrat isaa alayhis salaam ne kaha “meira kalaam(baat) hi tumhe kefaayat(faayda) kar jaayega.”

Allah ta’ala ne” Hazrat maryam alaihissalam” ko hukm diya ki jab tum bachhe ko sath le kar jaao to koi bhi tumhe mile to tum ishaare se use batana.

ki meine nazar maani hui he ki rabb ta’ala ki razamandi ke liye roza rakhungi aur kisi aadmi se kalaam(baat) nahi karungi,

Ahle ilm hazraat ne aapko ye hukm diya gaya uski wajah bayaan karte hue bayaan kiya he ki bewaqufo se aap ko kalaam(baat) karne ki zarurat peish na aaye balki “Hazrat isa alaihis salam” khud hi kalaam(baat) karke unke ta’ano ka jawaab de,

aap ka kalaam karna aur unhe jawaab deina ta’ano ke khatm karne me nass e qatai ka darja haasil hoga.

(tafseere roohul ma’ani, jild-2, hissa-1, safa-86,87)

(tazkiratul ambiya alayhis salaam, safa-504, 505)

waapasi par lougo ki ta’ana-zani :

Qurane majeed me he ki

“to use goud me le apni qoum ke paas aayi bole ay maryam beishak tune bahot buri baat ki, ay haarun ki bahen teira baap bura aadmi na tha aur na teiri maa badkaar”

(surah maryam, aayat-27,28)

Hazrat maryam alaihissalam jab chalne-phir ne ke qaabil ho gayi to apne farzand ko goud me utha kar apne ghar louti, jab kunba(qabila/gharana) waalo ne deikha ki kunwaari maryam baccha uthaaye aa rahi he.

to unpar saktah(heirat/ta’ajub) ka aalam taari ho gaya, unhone rouna shuru kar diya aur bahot zyada sharmindagi se wo sirf itna keh sake honge ya maryam(ay maryam…),

Ek riwaayat me he ki jab bacche ko apni qoum ke paas le aayi to bani israail me ye baat mashoor ho gayi, malaamat(bura/bhala) karne ke liye mard aur aurate doud aaye, ek aurat ne thappad maarne ke liye haath uthaya to woh sukh gaya,

ek mard ne kaha ye to zeena-kaar he (maazallah..) to wo gunga ho gaya, ye deikh kar kisi ko maarne ya bura-bhala kehne ki himmat na hui aur bade naram andaaz me itna hi keh sake ay maryam beishak tune bahot bura kaam kiya he…

Hazrat maryam alaihissalam” ke ek bhai ka naam haarun tha is liye qoum ne aapko “ay haarun ki bahen” keh kar pookara, sahih hadees se bhi iski taaid hoti he,

Muslim shareef me he ki hazrat mugira bin sho’eba radiallaho ta’ala anho jab najraan gaye.

to waha ke isaaiyo ne unse puchha ki quraan me “Hazrat maryam alaihissalam” ko “haarun ki bahen” kaha gaya he haalanki haarun Hazrat maryam alaihissalam se sad-ha saal pehle guzre he wo koi jawaab na de sake,

jab waapas aaaye to baargaahe risaalat me is waaqiye ko bayaan kiya to huzoor nabi e kareem sallallaho alayhe wasallam ne farmaya.

ki bani israail ka dastoor(tour-tariqa) tha ki woh apne baccho ke naam ambiya alayhis salaam ke aur pehle buzurgo ke naam par rakha karte the,

Is se pata chalta he ki “Hazrat maryam alaihissalam” ke ek bhai the, jin ka naam barkat ke liye hazrat harun alayhis salaam ke naam par rakha gaya tha,

Jin alfaaz se loug “hazrat maryam alaihi Hazrat maryam alaihissalam” salaam ko aar(tang/badnaami) dila rahe he wo ye he ki teira baap bura aadmi na tha aur teiri maa badkaar(bure kaam karne waali) na thi.

(tazkiratul ambiya alayhdis salaam, safa-506, 507)

Hazrat maryam alaihissalam” ne ishaara bacche ki taraf kar diya :-

Qurane e majee me he ki

“is par maryam ne bacche ki taraf ishara kiya wah bole hum keise baat kare us se jo paalne me baccha he”

(surah maryam, aayat-28)

Hazrat “Hazrat maryam alaihissalam” ko allah ta’ala ka hukm tha ki aap ne kisi se baat nahi karna balki ishaare se batana he ki meine allah ta’ala ke liye roza ki nazarmaani hui he,

kisi se bolna nahi, isi irshaad ke muta’abiq aap ne “Hazrat isa alaihis salam” ki taraf ishara kar diya ki is se baat karke puchh lo,

Baaz riwaayat me he ki aapne bacche ki taraf ishaara kiya ki us se baat karo to wo ek dusre ko kehne lage ki ye to humaare sath mazaaq kar rahi he is se humaari touhin kar rahi he, hame ghatiya samajh rahi he,

Humne aaj tak ayse baccho se kabhi kalaam(baat) nahi kiya aur naa hi aysi umr ke baccho me jawaab deine ki taaqat hoti he, ay maryam bacche ki taraf tumhaara ishaara karna sarasar mazaaq hi nazar aata he.

(tazkiratul ambiya alayhis salaam, safa-507, 50

Aap k Bachpan k Mojizat

Hazrat isa alaihis salam”  ka bachpan me baat karna :-

Quraane azeem me he ki

“bacche ne farmaya mei hu allah ka banda usne mujhe kitaab di aur mujhe geib ki khabre bataane wala(nabi) kiya,

aur usne mujhe mubaarak kiya mei kahi hu aur mujhe namaaz wa zakaat ki taakid farmaayi jab tak jiyu,

aur apni maa se achha sulook karne wala aur mujhe zabardast bad-bakht na kiya, aur wahi salaamati mujh par jis din mei peida huwa aur jis din maru aur jis din zinda uthaya jaau”

(surah maryam, aayat-30,31,32,33)

Hazrat isa alaihis salam” doodh pee rahe the, jab aapne bani israail ki baat sooni ki woh keh rahe he hum bacche se keise baat kare. To aapne doodh pina chhod diya unki taraf muta’wajje(dhyaan/tawajjo) hue,

baayi(left) haath par sahara laga kar apni shahaadat ki ungli se ishaara karke baat karna shuru kar diya,

(subhan allah…)

Sabse pehle aylaan farmaya “mei allah ta’ala ka banda hu..” (aap alayhis salaam ka ye farmaan un lougo ka radd karta he jinhone aapko baad me khuda mana he..)

Fir farmaya “usne mujhe kitaab di aur mujhe nabi banaya” aap alayhis salaam ke is irshaad ka matlab ye tha

“beishak allah ta’ala mujhe mab’us farmaayega ya’ani aylaane nabuwwat ka hukm deiga aapne jab ye baat mukkammal ki to uske baad khamosh ho gaye.

aur aam baccho ke haal ki taraf lout kar aagaye, fir jab aapki umr 30 saal ki hui to allah ta’ala ne aap ko nabi bana kar mab’us farmaya,

ek riwaayat me he ki aapko allah ta’ala ne maa ke peit me hi injeel padha di aur nabuwwat ataa farma di,

Aap alayhis salaam ko nabuwwat ya kitaab ataa to usi waqt farma di jab aap maa ke peit me the, albatta lougo ko tablig karne aur aylaane nabuwwat ka hukm baad me diya gaya, tamaam ambiya alayhis salaam ki surate haal yahi he,

Fir farmaya “aur usne mujhe mubaarak kiya mei kahi bhi hu”

Ya’ani mujhe allah ta’ala ne deen par qaraar pakadne wala banaya aur mei lougo ko deen ki ta’alim du, unko raahe

haqq ki taraf bulaau, ya’ani jab woh apni khawaahisaate nafsaaniya ki wajah se bhatak jaaye to mei unhe seedhi raah dikhaau,

Fir farmaya “aur mujhe namaaz wa zakaat ki taakid farmaayi jab tak jiyu”

Ya’ani allah ta’ala ne mujhe hukm diya he ki mei baalig hone ke baad namaaz adaa karu aur lougo ko zakaat adaa karne ki nasihat karu,

Yaad rahe ki ambiya e kiraam alayhis salaam par zakaat laazim nahi hoti kyuki allah ta’ala ne unko duniya ke maal se paak rakha hota he,

agar unke paas koi maal aa bhi jaaye to wo tamaam allah ta’ala ki raah me kharch kar deite he, wo ek saal jama karke rakhte hi nahi ki un par zakaat laazim aaye,

isi wajah se unke maal ka batoure wiraasat taqseem nahi kiya jata kyuki unke haath me maal dar-haqiqat allah ta’ala ka maal hota he wo uske maalik hi nahi hote,

Fir farmaya “aur apni maa se achha sulook karne wala” is kalaam se ishaara tha ki meiri maa paak daaman he.

is liye allah ta’ala ne ma’sum rasool ko unki farmaan-bardaari ka hukm diya agar ma’azallah isme koi aiyb hota to ma’sum rasool ko unki ta’zim ka kabhi hukm na diya jata,

Fir farmaya “aur mujhe zabardast bad-bakht na kiya” ya’ani allah ta’ala ne mujhe muta’kabbir(takabbur/itraane wala) nahi banaya.

balki khuzu’a(aa’jizi) karne wala aur apni maa ke saamne aa’jizi ka izhaar karne wala banaya he agar mei muta’kabbir hota to na-farmaan aur bad-bakht hota,

 aap ko masih kehne ka raaz

Hazrat isa alaihis salam part 1

Hazrat isa alaihis salam part 2 yahi he

Fir farmaya “aur wahi salaamati mujh par jis din mei peida huwa aur jis din maru aur jis din zinda uthaya jaau”

yaha 2 ihtemaal(gunjaaish) he, ek ye ki hazrat isaa alayhis salaam ne qoum ko bataya ki rabb ta’ala ne mujhe in teen awqaat(waqto)

me salaamati ataa farmaadi he aur dusra I htemaal(gunjaaish) ye he ki aapne duaa ki ho ki ay allah

jis tarah tune yahya alayhis salaam ke muta’aliq khud bataya ki meine unhe salaamati ataa farmaayi he.

ayse mujhe bhi ataa farma de, aap ki duaa ko qabul karke allah ta’ala ne aapko in teeno awqaat me salaamati ataa farma di.

(tazkiratul ambiya alayhis salaam, safa-508 to 512)

Aam tour par itni chhoti umr ke bacche bol nahi paate, kisi se baat nahi kar paate, magar ye allah ta’ala ke nabi Hazrat isa alaihis salam he, jinhone itni chhoti umr me lougo se baat ki…

Allahu akber…

Hazrat isa alaihis salam ko “maseeh(مسیح) kyu kaha gaya…??

Isme chand wajah he..

1) jab koi shaksh aaafat-zada hota ya’ani kisi bhi marz(beemaari) me mubtila hota to aap us par hath feirte the to usko shifaa haasil ho jati,

2) aap chunki ek jagah par nahi rehte the balki firte rehte the is liye aap ko “maseeh” kaha gaya,

3) aap allah ta’ala ki raza ke liye yateemo ke sar par haath feirte is liye aap “maseeh” hue,

4) aapse gunaaho aur gunaaho ke bouz, gunaaho ki aaludgi(gandagi) ko mita diya gaya tha, ya’ani aapko rabb ta’ala ne gunaaho se door rakha huwa tha,

5) aapke qadmo se neseeb ko mitaya huwa tha ya’ani aapke qadam bilqul seedhe the, aam aadmiyo ki tarah nahi the ki qadmo ke talwo ka kuchh hissa zameen par nahi lagta kyuki usme neseeb hota he,

6) aapko zeitun ka mubaarak teil allah ta’ala ki taraf se laga diya gaya tha jo tamaam ambiya e kiraam alayhis salaam ko lagaya jata tha jis se farishto ko pata chal jata tha ki is hasti ko “nabi” bana diya jaayega,

7) Hazrat jibril alaihissalam ne aapko apne paro se mis kiya tha taki aap sheitaan ke mis se mehfuz rahe,

8) aap jab waalida ke peit se baahar tashreef laaye to aap ko teil laga huwa tha aam bachcho ki tarah aapke baalo ko teil lagaane ki zarurat dar-peish nahi aayi.

(tafseere kabeer, jild-8, safa-52)

(tazkiratul ambiya alayhis salaam, safa-513, 514)-

Hazrat isa alaihis salam” ke alqaab :-

“kalimatullah(کَلِمَۃُ اللہ)”, “masih”, “wajih”, “muqarrab”, “saaleh”, “mahad wa kohulat me muta’kalim”..

Quraane paak me he ki

“aur yaad karo jab farishto ne mariyam se kaha ay mariyam allah tujhe bashaarat deita he apne paas se ek kalime ki jiska naam hei masih isaa Hazrat maryam alaihissalam ka beita rudaar(ba-izzat) hoga.

duniya aur aakhirat me aur qurb wala, aur lougo se baat karega paalne me aur pakki umr me aur khaaso me hoga”

(surah aale imraan, aayat-45,46)

Hazrat isa alaihis salam” ko “kalema(کلمہ) kyu kaha gaya..??

Iski kayi wajah he

Hazrat isa alaihis salam” peidaaish bageir baap ke waaste ke allah ta’ala ke kalme “kun” se hui, aap ki takhleeq me jab baap ka waasta nahi,

nutfe ka istemaal nahi faqat allah ta’ala ke kalme “kun” se hui to is wajah se aap ko kalma “kun” kaha gaya ya’ani “kalamatullah” se peida-shuda jeisi makhluq ko khalq, maqdur ko qudrat keh diya jata,

Hazrat isa alaihis salam” bachpan ki haalat me kalaam farmaya is liye aapko “kalema” keh diya gaya,

kalema ma’ani aur haqaaiq ka faida deita he, isi tarah Hazrat isa alaihis salam haqaaiq aur asraare ilaahiya ki rehnumaai farmaate rahe lihaza aapko “kalema” keh diya gaya,

Hazrat isa alaihis salam”I bashaarat aapke aane se pehle ambiya alayhis salaam ki kitaabo me aa chuki thi, jab aap tashreef laaye to kaha gaya ki ye wahi “kalema” he jo pehle zikr kiya gaya he, is lihaaz se aap ka naam “kalema” rakh diya gaya,

Khyaal rahe ki “kalema” se muraad is maqaam par kalaam(baat) he, allah ta’ala ka kalaam qadeem he, aap allah ta’ala ka kalaam nahi balki allah ta’ala ke kalaam se peida hone ki wajah se “kalimatullah(کَلِمَۃُ اللہ)” hue he.

(tafseere kabeer, jild-8, safa-38)

(tazkiratul ambiya alayhis salaam, safa-512, 513)

Aage aur bhi alqaab ki tafseel aa rahi he.

Hazrat isa alaihis salam” ko wajeeh kyu kaha gaya.

wajeeh ka ma’ani saahibe martaba, shaahibe sharaafat aur shaahibe qadr wa manzelat he,

ye us waqt kaha jata he jab kisi shaksh ka martaba lougo ya baadshaho ke nazdik zyada buland wa bala ho aur baaz ahle lugaat ne bayaan kiya he ‘wajeeh’ ka ma’ani batoure iste’aarah karam aur kamaal liya jata he,

Hazrat isa alaihis salam”  duniya me ‘wajeeh’ the kyuki aap mustajaabud da’waat the, aap ki duaa se allah ta’ala ne murdo ko zinda kiya, maadar-zaad andho ko nazar ataa farmaayi, baras(safeid kodh) waale marizo ko baras(safeid kodh) se naja’at di,

duniya me aap ke ‘wajeeh’ hone ki aur wajah ye bhi thi ki allah ta’ala ne aap ko un tamaam ayub(khraabi) se bari rakha.

jo yahud aap par lagaate the ya’ani aap ka haqiqat me ayub se bari hona hi ‘wajeeh’ hone ka sabab tha, agarche aap par yahud aiyb lagaate rahe lekin aapki shaan me koi farq na aa saka,

jeisa ki hazrat musaa alayhis salaam ko allah ta’ala ne ‘wajeeh’ banaya agarche aap par bhi yahud aiyb lagaate rahe aakhirat me bhi aap ‘wajeeh’ honge.

kyu ki allah ta’ala ne aap ki ummat ke momino ko haqq raah par chalne waalo ka shafee’a banaya, aap ki shafa’at ko dusre tamaam ambiya e kiraam alayhis salaam ki shafa’at ki tarah qabul kiya jaayega,

allah ta’ala ne jab farishto ki azeem madah(ta’aruf) karte hue unhe apne muqarribeen kaha to aap ko bhi yahi siffat ataa farmaayi kyuki aap bhi buland martaba aur rafi-ul-darjaat he.

aur farishto ke sath hi zinda rahenge aur aakhirat me jis shakhs ko ‘wajeeh’ banaya gaya use muqarrab to hona hi he kyuki use jannat ke aa’la martabe ataa honge.

(tafseere kabeer, jild-8, safa-53,54)

(tazkiratul ambiya alayhis salaam, safa-514,515)

Hazrat isa alaihis salam ka laqab ‘rooh’ :-

Quraane paak me he ki

“maseeh isaa mariyam ka beita allah ka rasool hi he aur uska ek kalema ki mariyam ki taraf bheija aur uske yaha ki ek rooh”

(surah nisha, aayat-171)

Hazrat isa alaihis salam” ko ‘rooh’ kehne ki chand wajah he..

aam lougo ki aadat jaari he ki tahaarat ke aa’la darje ki ta’arif karni ho to use rooh keh deite he,

jab Hazrat isa alaihis salam ki takhleeq baap ke nutfe se nahi balki nafkhe jibrail alayhis salaam(hazrate jibrail alayhis salaam ki foonk) se hui to yaqinan aap ki siffat ‘rooh’ se bayaan ki gayi,

Hazrat isa alaihis salam” makhluq ke deen ke zinda rehne ka sabab bane jiska deen zinda rahe use ‘rooh’ keh liya jata he,

‘rooh’ ba-ma’ani rehmat ke bhi istemaal hota he, yaha ‘rooh’ se muraad rehmat he, chunki isaa alayhis salaam bhi allah ta’ala ki taraf se makhluq ke liye rehmat bana kar bheije gaye,

aap unko deen wa duniya me neiki ke raaste ki hidaayat karte to isi wajah se aap alayhis salaam ko ‘rooh’ kaha gaya,

rooh kalaam arab me foonk ke ma’ani me bhi istemaal he, aap ko ‘rooh’ is liye kaha gaya ki aap allah ta’ala ke hukm aur uske izn(ijaazat) se nafkhe jibrail alayhis salaam(hazrate jibrail alayhis salaam ki foonk) se peida hue,

shareef, qudsi, buland martaba rakhne waali rooho me se aapki rooh bhi he, ya’ani aapki rooh azeem rooh he, is liye allah ta’ala ka qurb haasil he, isi liye aapko ‘rooh’ keh diya gaya.

(tafseere kabeer, jild-8, safa-115)

(tazkiratul ambiya alayhis salaam, safa-517)

‘roohe quddus’ se aapki imdaad ki gayi :–

Quraane azeem me he ki

“وَ اَیَّدۡنٰہُ بِرُوۡحِ الۡقُدُسِ”

“aur paak rooh se uski madad ki”

(surah al baqara, aayat-87)

Is “رُوۡحِ الۡقُدُس(paak rooh)” se muraad kya he..??

Isme mukhtilaf(alag alag) aqwaal(baate) he lekin in tamaam wajaho se aapko imdaad(madad) di gayi,

Is ‘رُوۡحِ الۡقُدُس’ se muraad Hazrat jibril alaihissalamhe, ya’ani jibrail alayhis salaam Hazrat isa alaihis salam ki imdaad(madad) farmaate rahe,

Hazrat jibril alaihissalamko jo allah ta’ala ke yahaa shara’afat(izzat) aur buland martaba haasil he isi wajah se ‘رُوۡحِ الۡقُدُس’ kaha gaya.

aur jis tarah badan ko rooh ke zariye zindagi haasil hoti he ayse hi jibrail alayhis salaam ke zariye deen ko zindagi haasil hoti rahi kyuki aap tamaam ambiya e kiraam ke paas wahi(khuda ta’ala ka peigaam) laate rahe,

jiske zariye ambiya e kiraam alayhis salaam ihyaa e deen(deen ko zinda karne) ka fariza(zimmedari) sar-anjaam deite rahe agarche tamaam farishto ko roohaaniyat haasil he.

Follow us on insta

lekin jibrail alayhis salaam ko tamaam se zyada aur kaamil roohaaniyat haasil he isi wajah se aapko ‘رُوۡحِ الۡقُدُس’ ka laqab ataa kiya gaya,

Zyadatar hazraat ne ‘رُوۡحِ الۡقُدُس’ se muraad jibrail alayhis salaam hi liye he ki aap ki taaid(madad) hazrat isaa alayhis salaam ko hameisha haasil rahi kyuki aap jaha jate jibrail alayhis salaam unke saath hi chalte aur jami’a ahwaal(tamaam haalaat) me aapka sath deite rahe aur aasmaan me bhi aapke sath gaye.

(tafseere kabeer, jild-3, safa-177)