Hazrat Abul Faiz Saubaan ibn Ibrāheem ‘Zun-noon’ al- Misri rahmatullāhi alaihi :

54

Laqab :
‾‾‾‾‾‾‾
Zun-Noon.
*******************
Aap ki wilaadat 180 Hijri (796 A.D.) me Akhmim (Misr /
Egypt) me hui.


*******************
Ek baar aap ek jangal se guzar rahe the ki aap ne dekha ke
aap ke kuchh dosto ko khazaane ka sandook mila tha. Unho
ne aap ko bhi us me se hissa dene ke liye kaha. Aap ne
inkar kiya. Magar us me ek takhti par ALLĀH ka naam likha
tha. Aap ne us takhti ko uthaya aur use chuma.
Us raat aap ne khwaab me ek aawaaz suni ‘Dusre logo ne
dunya ka khazaana chuna aur Tum ne hamara naam chuna.
Is liye ham ne tumhare liye ilmo hikmat ke darwaze khol
diya hain.’
*******************
Ek baar aap ek kashti me safar kar rahe the. Us me ek taajir
ka qeemati moti kho gaya. Us ne aap par moti churaane ka
iljaam lagaya. Us ke kehne par logo ne aap ko peetna shuru
kiya. Aap ne aasmaan ki taraf dekhkar kaha ‘Aye ALLĀH, Tu
jaanta hai ki main chor nahi hu.’ Itne me hazaaro machhliya
apne munh me moti lekar paani ke upar aai. Hazrat ne ek
machhli ke munh se moti lekar us shakhs ko de diya. Wo
tamam log bahot sharminda hue aur aap se maafi maangi.
Tab se aap ka laqab ‘Zun-Noon’ ho gaya.
*******************
Ek baar Eid ki raat ko aap ke nafs ne aap se kaha ‘Aap ne
kai saal se koi lazeez khaana nahi khaya. Kal eid ka din
hai. Kal to kuchh achha khaana kha lo.’ Aap ne us se kaha
‘Main aaj raat me 2 rak’at namaaz padhunga. Jis me pura
Qur’an majeed mukammal karna chaahta hu. Agar us me
tum mujhe saath do to kal main tumhe kuchh achha khaana
khila sakta hu.’
Aap ne raat me 2 rakat namaaz padhi jis me khushu’ wa
khuzu’ ke saath pura Qur’an majeed mukammal kiya.
Sub-h aap ke nafs ne kaha ‘Aaj 10 saal ke baad achha
khaana khaane ki meri khwahish puri hogi.’ Aap ne kaha
‘Ab to main tumhe is me kaamyab nahi hone dunga.’
Itne me ek shakhs khaane ka bartan lekar aaya aur kehne
laga ‘Hazrat, Main bahot ghareeb hu. Mere pariwar ne kabhi
achha khaana nahi khaaya. Maine bahot mehnat karke aaj
eid ke din unke liye achha khaane ka intazaam kiya hai.
Raat ko mere khwab me Huzoor Rasool-Allāh sallallāhu
alaihi wa sallam ki ziyarat hui aur aap ne farmaya, agar
tum roze qayaamat mujh se milna chahte ho to is khaane
ko jaakar Zun-Noon misri ko de do. Aur us se kehna kuchh
lamho ke liye apne nafs se samjhauta kar lo aur is khaane
me se kuchh lukme kha lo.’
Apne Aaqa sallallāhu alaihi wa sallam ka farmaan sunkar
aap ne us bartan me se kuchh lukme khaaye aur phir use us
shakhs ko waapas diya.
*******************
Ek baar aap apne shaagirdo ke saath Dariya e Nile me
kashti me tafreeh (sair) kar rahe the. Kuchh der baad ek
dusri kashti me kuchh log aaye jo un hazraat ka mazzaq
udane lage. Aap ke shaagirdo ne aap se unke liye bad-dua
karne ke liye kaha. Aap ne farmaaya ‘Aye ALLĀH, jis tarah
tune inhe is dunya me khush-haali ata farmai hai usi tarah
unhe us jahan me bhi bhalai ata farma.’ Sab log ye sunkar
hairaan hue.
Magar jab phir se wo kashti qareeb aai aur un me maujood
logo ne Hazrat Zun-noon misri ko dekha to wo rone lage
aur maafi maangne lage aur ALLĀH se tauba karne lage.
Aap ne apne shaagirdo se farmaaya ‘Tauba karne walo ke
liye aakhirat me bhalai hai. Is tarah tum aur wo log dono
pareshaani aur nuqsaani se bach gaye.
*******************
Ek baar ek shakhs aap ke paas aaya aur bataya ‘Bhaari
qarz ki wajah se bahot pareshaan hu.’ Aap ko raham aaya
aur ne ek patthar ko uthaaya. Jaise aap ne patthar uthaaya
wo heera ban gaya. Aap ne us shakhs ko de diya aur us ne
use bechkar apna qarz ada kiya.
*******************
Logo ne aap par zindeeq (heretic) hone ka iljaam lagaya aur
baadshah ne aap ko qaid kar liya. Aap ko 40 din tak qaid
me rakha gaya. Aap ki bahen aap ke liye khaana laati thi
magar aap roz mana karte the. Jab aap ko riha kiya gaya to
aap ki bahen ne puchha ‘Aap ne khaana kyun nahi khaaya?
Main to halaal kamaai se aap ke liye khaana laati thi.’ Aap
ne farmaaya ‘Ye sach hai. Magar tum jis darbaan ke saath
khaana bhejti thi wo zaalim tha.’
Phir baadshah aap se kuchh mushkil sawaal puchhe. Aap
ne us ke qaabil e taarif jawaab diye. Use sunkar darbaar
me maujood tamam log hairat me pad gaye. Aur baadshah
bhi aap ka mureed ho gaya aur aap ki bahut izzat karne
laga.
*******************
Aqwaal :
‾‾‾‾‾‾‾‾
(1) Insaan ki kharaabi ki wajah yehi hai ki wo ALLĀH ko
raazi karne ke bajay logo ko raazi karne me laga rehta hai,
shaitaan ke behkaane par bahek jaata hai aur maut ko
bahot door manta hai aur nek amal karne me dilchaspi nahi
rakhta aur nafs ko raazi karne ke liye Sunnat e Rasool ko
chhod deta hai aur jab koi galti ho jaaye to kehta hai ki
akaabir (Auliya wa Ulema) bhi lagzish ho jaati hai jab ki us
waqt wo un ke martabe aur kamaalat ko bhool jaata hai.
(2) Ishq e ilāhi ki daleel Sunnat e Rasool ko apnaana hai.
Sunnato ko mukammal aur mazbooti se apnaaye bagair
ishq e ilāhi mumkin nahi.
(3) Sufi wo hi hai jo us nek amal ke liye kahe jis ko wo khud
karta ho.
(4) Khalwat (tanhaai) se behtar koi cheez aisi nahi hai jo
Ikhlaas ki raah par le jaaye. Jis ne khalwat ko apnaaya us
ne ikhlaas ke sutoon ko mazboot pakad liya.
(4) 4 baaten qalb ki beemari ki nishaani hain :
[1] Wo ALLĀH ta’ala ke khauf se khaali hota hai.
[2] Wo ibaadat ki halaawat (meethaas) mehsoos nahi karta.
[3] Wo dunya ki cheezo aur waardaato se koi sabak haasil
nahi karta.
[4] Wo apne ilm ko amal me nahi laata.
(5) Insaan ki Hidaayat milne ki 3 nishaaniya hain :
[1] Museebat aur ranj ke waqt wo Sabr karta hai.
[2] Ne’amat milne par ALLĀH ta’ala ka shukr ada karta hai.
[3] Jab kisi par ghussa aata hai to us shakhs se rishta aur
ta’alluq tod nahi deta balke us ke ehsaan aur achhai yaad
karta hai.
(6) Maarifat ki 3 qisme hain :
[1] Ma’arifat-e-Tauheed – ALLĀH subhān wa ta’ala ki
wahaadaniyat ki pehchaan, jo har musalman ko hoti hai.
(Ilm-ul-Yaqeen)
[2] Ma’arifat-e- Hujjat wa Bayaan – ALLĀH subhān wa
ta’ala ke akhaam wa arkaan ki pehchaan, jo Ulema ko hoti
hai. (Haq-ul-Yaqeen)
[3] Ma’arifat-e-Sifaat – ALLĀH ta’ala ki Sifaat ki
pehchaan, jo Auliya Allāh ko hoti hai. (Ain-ul-Yaqeen).
*******************
Aap ke shaagirdo me Hazrat Sahl al-Tustari rahmatullāhi
alaihi mashhoor hain.
*******************
Aap beemaari ke sabab be-hosh the. Wisaal ke pehle aap
ne aankhen kholi to Yousuf bin Husain ne kuchh naseehat
ke liye kaha. Aap ne farmaaya ‘Mujhe guftagu me masroof
mat karo. Main Rab ta’ala ki rahmato ki baarish dekhkar
hairat me hu.’
Jab log aap ka janaaza lekar ja rahe the tab dekha ki
parindo ka ek bahot bada jhund janaaze ke upar aasmaan
me aa gaya aur janaaze ke saath saath udta hua saaya
karta raha.
Raaste me masjid ke paas se janaaza guzra to moazzin ne
jab pukaara ‘Ash’hadu al laa ilāha illallāh’ to aap ne apni
shahaadat ki ungli ko uthaya. Logo ne jaanch karne ke liye
janaaza rakhkar dekha ki shaayad aap waapas zinda hue
ho. Magar jab dekha to aap ke jism me koi harkat nahi thi.
Jab aap ki ungli ko sidhi karne ki koshish ki gai to wo nahi
hui. Aur qabr me utaarte waqt bhi wo ‘Shahaadat’ dete
rahe.
******************
Aap ka wisaal 10 Safar 245 Hijri (859 A.D.) ko hua.
Aap ka mazaar Qarafa, Cairo (Misr / Egypt) me hai.
*******************
ALLĀH ta’ala us ke Habeeb sallallāhu alaihi wa sallam ke
sadqe me
Aur Hazrat Saubaan Zun-noon al-Misri rahmatullāhi alaihi
aur Tamaam Auliya Allāh ke waseele se
Sab ko mukammal ishq e Rasool ata farmae aur Sab ke
Eimaan ki hifaazat farmae aur Sab ko nek amal karne ki
taufiq ata farmae.
Aur Sab ko dunya wa aakhirat me kaamyaabi ata farmae
aur Sab ki nek jaa’iz muraado ko puri farmae.
Aameen. —