BAAB 6
GAFLAT
Gaflat se sharmindagi badhti hai aur ne'mat zaail ( mit-ti hai ) hoti hai, khidmat ka jazba maand (feeka) padh jaata hai, hasad zyada hota hai aur malaamat wa pashemaani (pachtaawe) ki faraawaani hoti hai.
SABSE BADI HASRAT;
ek nek aadmi ne apne ustaad ko khwaab mein dekha aur poocha aapke nazdeek sabse badi hasrat kaunsi hai? ustaad ne jawaab diya gaflat ki hasrat sabse badi hai.
riwaayat hai ke kisi shakhs ne HAZRAT E ZUNNOON MISRI REHMATULLAAH ALAIH ko khwaab mein dekha aur sawaal kiya ke ALLAH TA'ALA ne aapke saath kya sulooq kiya? to unhone jawaab diya ke ALLAH ne mujhe apni baargaah mein khada kiya aur farmaya aye jhoote daawedaar ! tu ne Meri mohabbat ka daawa kiya aur phir Mujhse gaafil raha.
SHEYR; jiska mafhoom yun hai:
"Tu gaflat mein mubtala hai aur tera dil bhoolne wala hai, umr khatam ho gayi aur gunaah waise ke waise hi maujood hai"
HIKAAYAT;
Ek swaleh ( nek ) aadmi ne apne baap ko khwaab mein dekh kar poocha aye abbajaan! Aap kaise hain aur kya haal hai? Baap ne jawaab diya humne zindagi gaflat mein guzaari aur gaflat hi mein mar gaye.
MAUT KE PYAAMBAR;
ZEHRUR-RIYAZ mein hai ke HARATE YAQOOB ALAIHISSALAAM ka malakul maut se bhaichaara tha, ek di malakul maut haazir huwe to HAZRATE YAQOOB ALAIHISSALAAM ne poocha tum mulaaqaat ke liye aaye ho yaa rooh qabz karne ko? IZRAAEEL ne kaha sirf mulaaqaat ke liye aaya hun, AAPNE farmaya mujhe ek baat kehni hai. Malakul maut bole kahiye kaunsi baat hai? HAZRATE YAQOOB ALAIHISSALAAM ne farmaya jab meri maut qareeb aa jaye aur tum rooh qabz karne ko aane wale ho to mujhe pehle se aagaah kar dena. Malakul maut ne kaha behtar!
Main apni aamad (aane) se pehle aapke paas do teen qaasid bhejunga. jab HAZRATE YAQOOB ALAIHISSALAAM ka aakhri waqt aaya aur Malakul maut rooh qabz karne ko pohonche to AAP ne kaha Tum ne to waada kiya tha ke apni aamad se pehle meri taraf qaasid bhejoge. IZRAEEL ne kaha maine aisa hi kiya tha , pehle to AAP ke siah (kaale ) baal safed hue, ye pehle qaasid tha, phir badan ki chusti wa tawaanaayi ( taaqat) khatm hui, ye doosra qaasid tha, aur baad mein AAPKA badan jhuk gaya , ye teesra qaasid tha.
AYE YAQOOB ALAIHISSALAAM har insaan ke paas mere bhi teen qaasid aate hai.
SHEYR; jinka mafhoom diya ja raha hai:
"zamana guzar gaya aur gunaahon ko chhod gaya , maut ka qaasid aa pohoncha aur dil (KHUDA se) gaafil hi raha."
"Teri dunyaawi ne'matein dhoka aur fareb hai aur duniya mein tera hamesha rehna muhaal aur kazb (dhoka) mehez hai."
SHAIKH ABU ALI DAQQAAQ REHMATULLAAH ALAIH kehte hain ki main ek aise beemaar mard e swaaleh ( nek mard) ki ayaadat ko gaya jinka shumaar mashaikh e kabaar ( bade mashaaikh ) mein hota tha , maine unke girdaan (paas) shaagirdon ko baithe hue dekha , SHAIKH ABU ALI REHMATULLAAH ALAIH ro rahe the, maine kaha aye shaikh ! Kya aap duniya par ro rahe hain? Unhone farmaya nahi, main apni namaazon ke qazaa hone par ro raha hun, maine kaha aap to ibaadat guzaar shakhs the phir namaazein kis tarah qazaa hui? Unhone farmaya maine har sajda gaflat mein kiya aur har sajde se gaflat mein sar uthaya aur ab gaflat ki haalat mein mar raha hun phir ek aah bhari aur ye ash-aar padhe;
"Maine apne hashr, qayaamat ke din ,aur qabr mein rehne ke baare mein socha."
"Jo izzat o waqaar waale wajood ke saath mitti ka raheen (girwi) hoga aur mitti hi uska takiya hoga."
"Maine yaume hisaab ki tawaalat ke baare mein socha aur us waqt ki ruswaayi ka khayaal kiya jab naama e aamaal mujhe diya jaayega."
"Magar AYE RABBE ZUL JALAAL! meri ummeedein Teri rehmat ke saath hai , Tu hi mera KHAALIQ aur mere gunaahon ko bakshne wala hai.
MEHEZ DAAWA BEKAAR HAI:
UYUNUL AKHBAAR me hai HAZRAT E SHAQEEQ BALKHI REHMATULLAHI ALAIH farmate hai, log teen baatein mehez zabaani karte hai magar amal uske khilaaf karte hai.
1) ye kehte hai ke hum ALLAH TA'ALA ke bande hai lekin kaam gulaamon jaise nahi karte balki aazaadon ki tarah apni marzi par chalte hai.
2) ye kehte hai ke ALLAH TA'ALA hi hamein rizq (rozi) deta hai lekin unke dil duniya aur mataa e duniya (duniya ki daulat) jama kiye begair mutmaeen nahi hote aur ye unke iqraar ke saraasar khilaaf hai.
3) teesre kehte hai ke aakhir hamein mar jaana hai magar kaam aise karte hai jaise unhe kabhi marna hi nahi.
Aye mukhatab ! Zara soch to sahi, ALLAH ke saamne tu kaunsa munh lekar jaayega aur kaunsi zabaan se jawaab dega? Jab WOH tujhse har chhoti-badi cheez ke mutalliq sawaal karega ,un sawaalaat ke liye abhi se achcha jawaab talaash karle (taaki us waqt sharmindagi na uthana padhe) .
FARMANE ILAAHI HAI;
Aur ALLAH se daro, beshak tum jo kuch karte ho ALLAH us se aagaah hai aur khabar rakhta hai.
Phir ALLAH ne mominon ko samjhaya ke wo USKE ahkaamaat ko na chhode aur har haalat mein USKI wahdaaniyat (ek hone ) ka iqraar karte rahein.
ITAA'ATE ILAAHI KA SAMRAAH:
Hadees shareef mein aaya hai ke Arshe Ilaahi ke paaye par tehreer hai ke jo MERI itaa'at karega MAIN uski baat maanunga, jo MUJH se mohabbat karega , MAIN use apna mehboob banaunga, jo MUJH se maangega MAIN use ataa karunga aur jo bakshish ki talab karega MAIN use baksh dunga.
Is farmane NABAWI sallallahu alaihi wasallam ki raushni mein har zee hosh ( samajhdaar) aur daanishmand (aqalmand) ke liye zaroori hai ke wo khauf aur bharpoor khuloos ke saath ALLAH TA'ALA ki ibaadat karta rahe aur raazi ba-qazaa rahe. Uske naazil qarda masaaib (USKI di hui museebaton) par sabr kare, USKI ne'maton ka shukr karte huwe kam-o- besh par qaane (raazi) ho jaaye. ALLAH TA'ALA farmata hai jo MERI qaza' (MERI di hui museebaton) par raazi, masaaib par saabir nahi aur ne'maton ka shukr nahi adaa karta aur kam-o-besh par qana'at nahi karta, wo MERE siwa koi aur RAB talaash kar le.
HARATE HASAN BASRI KA EK DILNASHEEN JAWAAB :
Ek shakhs ne janaab HAZRAT E HASAN BASRI REHMATULLAH ALAIH se kaha ke ta'ajjub hai ke main ibaadat mein lutf nahi paata. AAPNE jawaab diya shaayad tu ne kisi aise shakhs ko dekh liya hai jo ALLAH se nahi darta.
Haq e bandagi ye hai ke ALLAH ki raza ke liye tamaam cheezon ko chhod diya jaaye.
Kisi shakhs ne janaab ABI YAZEED REHMATULLAAH ALAIH se kaha ke main ibaadat mein kaif o suroor (mazaa) nahi paata ? Unhone jawaab diya, ye isliye hai ke tu ibaadat ki bandagi karta hai, ALLAH TA'ALA ki bandagi nahi karta , tu ALLAH ki bandagi kar phir dekh ibaadat mein kaisa mazaa aata hai.
ALLAH KI IBAADAT YA MAKHLOOQ KI IBAADAT:
Ek shakhs ne namaz shuru ki, jab,"iyya ka naa budu " padha to uske dil mein khayaal aaya ke main khaalisatan ALLAH hi ki ibaadat kar raha hun. gaib se aawaaz aayi tu ne jhoot bola hai tu to makhlooq ki ibaadat karta hai, tab usne makhlooq se qata ta'alluq kar liya aur namaz shuru ki, jab phir usi aayat par pohoncha to wohi dil mein guzra, phir nida aayi tu apne maal ki ibaadat karta hai, usne saara maal raahe KHUDA mein kharch kar diya aur namaz ki neeyat ki, jab usi aayat par pohoncha to phir khayaal aaya ke main haqeeqatan ALLAH ki ibaadat karnewala hun, nida aayi tum jhoote ho, tum apne kapdon ki ibaadat karte ho, us waqt us banda e khuda ne badan ke kapdon ke alaawa sab kapde raah e khuda mein luta diye, ab jo namaz mein us aayat par pohoncha to aawaaz aayi ke ab tum apne daawe mein sachhe ho.
NASEEHAT PAR GULAM KO AAZAAD KARNA;
RAUNAQUL MAJAALIS mein hai ke ek shakhs ki abaayein (ek libaas) gum ho gayi aur yeh pata nahi chal raha tha ke unko kaun le gaya, jab us shakhs ne namaz shuru ki to usey yaad aagaya, jyun hi namaz se faarig hua, gulaam ko aawaaz di ke jao falaan aadmi se abaayein le aao, gulaam ne kaha aapko ye kab yaad aaya? Usne kaha mujhe namaz mein yaad aaya, gulam ne fauran jawaab diya tab to aap ne namaz abaa ke liye padhi, ALLAH ke liye nahi, ye baat sunte hi us shakhs ne us gulaam ko aazaad kar diya.
Chunaanche har zee-fahem (samajhdaar) ke liye zaroori hai ke wo duniya ko tark karde aur ALLAH ki ibaadat karta rahe, mustakbil ke baare mein gaur o fikr karta rahe aur apni aakhirat sanwaarta rahe jaisa ke farmane ILAAHI hai,
"jo shakhs aakhirat ki kheti ki fikr karta hai to HUM uski kheti zyada karte hai aur jo shakhs duniya ki kheti ka iraada karta hai HUM use usmein se kuch denge aur aakhirat mein uska kuch hissa nahi."
yaani uske dil se aakhirat ki mohabbat nikaal di jaati hai, isiliye HAZRATE ABUBAKR SIDDIQUE RADIYALLAAHU TA'ALA ANHU ne HUZOOR SALLALLAAHU ALAIHI WASALLAM ki zaat par chaalees hazaar dinaar ailaaniya aur chaalees hazaar dinaar poshida taur par kharch kar diye the yahaan tak ke unke paas kuch bhi baaqi na raha.
HUZOOR E AKRAM SALLALLAAHU ALAIHI WASALLAM aur AAPKE EHLE BAIT duniya aur uski khwaahish se mukammal parhez karte the, isiliye HAZRAT E FATIMA RADIYALLAHU TA'ALA ANHA ka jahez sirf mendhe ki ek rangi hui khaal aur ek chamde ka takiya tha jis mein khajoor ki chhaal bhari hui thi.
End of baab 6.
%d bloggers like this: