Duniya ke tamaam haalaat khushi aur gam ke ird-gird gardish karte rehte hai, duniya apne chaahnewalon ki khwaahishaat ke mutaabiq nahi rehti balki woh Hakeem e mutlaq ALLAH TA’ALA ki hikmat ke mutaabiq rang badalti rehti hai,
Farmane ILAAHI  hai:
“Woh hamesha mukhtalif rahenge magar woh jis par Tere RAB ne rehem kiya.”(woh us se mehfooz rahenge).
Baaz mufassireen ka kehna hai ke yahaan “mukhtalif “se muraad
rizq ka ikhtilaaf hai yaani baaz gani (maaldaar) hai aur baaz faqeer hai lihaaza har shakhs ke zaroori hai jise duniya kaa maal mil jaaye aur RABB E ZULJALAAL duniya ko uska khaadim banaa de to woh shukr adaa karta rahe aur nek kaamon mein usey kharch kare kyunki achche aamaal buraaiyyon ko zer kar lete hai aur apni duniya par guroor na kare aur yeh Farmane ILAAHI is baat ko samajhne ke liye kaafi hai:
“Tumhein duniya ki zindagi fareb naa de aur naa tumhein koi fareb denewala ALLAH se fareb de.”
Aur Farmane ILAAHI hai;
“Lekin tum ne apne aap ko fitna mein daala aur tum muntazir rahe aur tumne shak kiya aur tumhein aarzuon ne fareb mein daala.”
Duniya ke fareb se gurez ke liye yeh aayatein aqalmand ko bohot kuch baseerat sikhaati hai. Un aqalmandon ki neend aur bedaari  kaisi ajeeb hai jo bewaqoofon ki shab bedaari aur koshishon par shak karte hai haalaan ke khud kuch bhi nahi kar paate.

DAANISHMAND KAUN HAI:

Farmane NABAWI ﷺ hai ke aqalmand woh hai jisne apne nafs ka muhaasba kiya aur maut ke baad ke liye amal kiye aur ahmaq (bewaqoof) woh hai jisne nafsaani khwaahishaat ki pairwi ki aur ALLAH TA’ALA se dheron duniyawi tamannaayein rakhi.

Shaayar kehta hai:

1-aur jo shakhs kisi pasandeedah cheez ki wajah se duniya ki taareef karta hai mujhe zindagi ki qasam anqareeb woh usey buraa-bhala kahega.
2-jab duniya chali jaati hai to insaan ke dil mein hasrat chord jaati hai aur jab aati hai to beshumaar dukh lekar aati hai.

Ek aur shaayar kehta hai:

1 -bakhuda agar duniya apni tamaamtar maal o mataa ke baawajood hamare liye parhezgaari ka nishaan hoti aur lagaataar uska rizq aata rehta.

2-tab bhi kisi mard e azaad ke liye uski taraf ruju’ munaasib na hota chejaaye ke ye maal hi aisa banaaya gaya ho jo kal khatam ho jaaye.

Ibne bassaam kehta hai :

1-duniya aur uske ayyaam par ta’ajjub hai, beshak ye dukhon ke liye paida  ki gayi hai.

2-iske dukh ek lamha bhi khatam nahi hote.
3- is par aur iske ajeeb haalaat par ta’ajjub hai, ye logon ki jaanlewa maashooqa hai.

Ek aur shaayar kehta hai :

1-main dekhta hun ke zamaana bakheel-tareen logon ko be-intehaa maal dene par aamaada rehta hai.

2-aur saahib e izzat aur fazeelat se zamaana duniya ko rok deta hai, maine usey kaha tum asal baat me gaur karo.

3-khabees haraam kamaai se maal ikhatta karte hai lihaaza khabees maal aur khabees logon mein jamaa hote hai.

Doosra shaayar kehta hai:

1- zamaane se pooch tu ne kisra, qaisar, unke mehlaat aur unmein rehnewaalon se kya kiya.?
2-kya in sabne tujhse judaayi ki apeel ki thi ke tu ne kisi aqalmand aur kisi bewaqoof ko nahi chorda.

Kehte hai ke ek badwi kisi qabeela mein aaya, logon ne usey khaana khilaaya aur woh khana khaa kar unke khaime ke saaye mein let gaya, phir unhone khaima ukhaad liya aur badwi ko jab bhook lagi to uski aankh khul gayi aur woh yeh kehta huwa wahaan se chal diya:
1-baa-khabar ho jao yeh duniya imaarat ke saaye ki tarah hai aur laa-muhaala ek din iska saaya zaail (khatam) ho jaayega.
2-bila shubha duniya sawaar ke liye qailoola karne ki jagah hai, usne apni haajat poori ki aur phir usey chord diya.

Kisi danaa ne apne dost se kaha tujhe muddaee (daawedaar) ne sab kuch suna diya aur bulaane wale ne sab kuch waazeh kar diya, us shakhs se badhkar aur koi museebat mein mubtala nahi jisne yaqeen e kaamil ko ganwa diya aur galat kaariyon mein mashgool huwa.
HAZRATE IBNE MASOOD رضي الله عنه  ka qaul hai ke khauf e ILAAHI ke liye ilm aur takabbur wa guroor ke liye jahaalat kaafi hai.
Farmane NABAWI ﷺ hai ke jisne duniya se mohabbat rakhi aur uski zeba o zeenat se masroor huwa , uske dil se aakhirat ka khauf nikal gaya.

Baaz Ulemaa ka qaul hai ke banda se maal o daulat ke Chale jaane par ranj o gam karne aur maal o daulat ki faraawaani mein khushi par muhaasba  kiya jaayega.
Baaz Salfe Swaaliheen  jinhein ALLAH TA’ALA ne duniya di thi ,woh haraam kardah baaton se, tumse zyada bachnewale the aur jo kaam karna tumhein naa-munaasib nazar nahi aata woh unke liye nazdeek mohlik-tareen samjhe jaate the.
HAZRATE UMAR BIN ABDUL AZIZرضي الله عنه basaa auqaat MUSA’IR BIN KADDAAM رضي الله عنه  ke yeh ash’aar padha karte the 1- aye fareb khaaye huwe tera din neend aur gaflat mein aur teri raat sone mein poori hoti hai aur maut tere liye laazmi hai.
2-zaail shuda maal tujhe fareb mein daalta hai aur ummeedein paa kar tu bohot khush hota hai jaise khwaab dekhnewala khwaab mein lutf andoz hota hai.
3- anqareeb tu apni is duniyawi mashgooliyat ko buraa samjhega, aisi zindagi to duniya mein jaanwaron ki hoti hai.

Mukashifatul quloob az hazrat imam gazali
END OF BAAB 58