HAZRATE ABU UMAAMA BAAHILI رضي الله عنه se marwi hai ke SA’LBA BIN HAATIB رضي الله عنه ne RASOOLALLAH ﷺ ki khidmat mein arz kiya YAA RASOOLALLAH! ﷺ mere liye dua karein, ALLAH TA’ALA mujhe maal de. AAPNE farmaya aye SA’LBA ! thoda maal
jiska tu shukr adaa karta hai, us maal e kaseer se  behtar hai jiska tu shukr adaa nahi kar sakta. SA’LBA ne arz kiya yaa RASOOLALLAH! ﷺ mere liye ALLAH TA’ALA se maal ki dua kijiye, AAPNE farmaya aye SA’LBA !kya tere pesh e nazar meri zindagi nahi hai, kya tu is baat par raazi nahi ke teri zindagi NABI ki zindagi jaisi ho, ba-Khuda agar MAIN chaahun ke MERI saath sone aur chaandi ke pahaad chale to chalenge. SA’LBA ne arz kiya us zaat ki qasam jisne AAPKO NABI E BARHAQ banaakar bheja hai. Agar AAP mere liye ALLAH se maal ki dua kare to main us maal se har haqdaar ka haq poora karunga aur main zaroor karunga, zaroor huqooq adaa karunga, HUZOOR ﷺ ne dua ki ke Aye ALLAH! SA’LBA ko maal ataa kar.

Chunaanche usne bakriyaan li aur woh aise badhi ke jaise keede makaude badhte hai aur unke liye Madine mein rehna mushkil ho gaya, chunaanche SA’LBAرضي الله عنه Madine se nikal kar Madine ke qareeb ek waadi mein aagaye aur teen Namaazein chord kar sirf do Namaazein Zohar aur Asar jamaa’at ke saath padhne lage, bakriyaan aur badhi aur woh kuch aur door ho gaya yahan tak ke woh sirf Namaze  Juma mein shareek hota aur bakriyaan baraabar badhti gayi, yahan tak ke unki masroofiyat ki wajah se uski Juma ki jamaa’at  bhi choot gayi aur woh Juma ke din Madine se aanewale sawaaron se Madine ke haalaat pooch leta aur HUZOOR ﷺ ne uske muta’alliq poocha ke SA’LBA BIN HAATIB ka kya banaa?  Arz ki gayi ke Yaa RASOOLALLAH! ﷺ Usne bakriyaan khareedi aur woh itni badhi ke unka Madine mein rehna dushwaar ho gaya aur uske tamaam haalaat batlaaye gaye, AAPNE sunkar farmaya Aye SA’LBA! Afsos,  Aye SA’LBA! Afsos, afsos aye SA’LBA. !
Raawi kehte hai ke tab Qur’an majeed ki ye aayat naazil hui:
“Unke maal se sadqa lijiye
unke zaahir aur baatin ko paak kijiye unke sadqaat aur unke liye dua kijiye,
Beshak AAPKI dua unke liye taskeen hai.”
Aur ALLAH TA’ALA ne sadqaat ke faraaiz naazil kiye.

HUZOOR ﷺ ne Juhaina aur Banu Sulaim ke do aadmiyon ko sadqaat ki wasooliyaabi par muqarrar farmaya aur unhein sadqaat ke ahkaamaat aur sadqaat ki wasooli karne ki ijaazat likh kar rawaana farmaya ke jao aur musalmaanon se sadqaat wasool karke lao aur farmaya ke SA’LBA BIN HAATIB aur falaan aadmi ke paas jaana jo bani Sulaim se ta’alluq rakhta hai aur unse bhi sadqaat wasool karna.
Chunaanche ye dono hazraat SA’LBA ke paas aaye aur usey HUZOOR ﷺ ka farmaan padhwaakar sadqaat (bakriyon ki zakaat) ka sawaal kiya.
SA’LBA ne kaha yeh to tax hai ,yeh to tax hai, yeh to tax hi ki ek shakl hai, tum jao, jab tum faarig ho chuko to mere paas phir aana. Phir ye hazraat Banu Sulaim ke us aadmi ke paas aaye jiske baare me
HUZOOR ﷺ ne farmaya tha, jab usne suna to usne apne aala qism ke oonton ke paas jaakar unme se sadqa ke liye alaahida kar diye aur unhein lekar un hazraat ki khidmat me aaya, un hazraat ne jab woh oont dekhe to bole, tumhare liye yeh oont dena zaruri nahi hai aur naa hi hum tumse oomda aur achhe qism ke oont lene aaye hain. Us shakhs ne kaha inhe le lijiye, mera dil inhi se khush hota hai aur main yeh aap hi ko dene ke liye laaya hun.

Jab yeh hazraat sadqaat ki wasooli se faarig ho chuke to SA’LBA ke paas aaye aur us se phir sadqaat ka sawaal kiya, SA’LBA ne kaha mujhe khat dikhao aur usne khat dekhkar kaha ye tax hi ki ek shakl hai, tum jao taaki main is baare mein kuch gaur kar sakun, lihaaza ye hazraat waapas rawaana ho gaye aur HUZOOR ﷺ ki khidmat mein haazir huwe , HUZOOR ﷺ ne unse baat-cheet karne se pehle mehez unhein dekhte hi farmaya, Afsos aye SA’LBA! Aur banoo Sulaim ke us shakhs ke liye dua farmaayi , phir un  hazraat  ne AAP ﷺ ko, SA’LBA aur SULAIMI ke mukammal haalaat sunaaye, ALLAH TA’ALA ne SA’LBA ( رضي الله عنه ) ke baare mein yeh aayaat naazil farmayi :
“Aur baaz unmein se woh hai jisne ALLAH se ahad kiya ke agar ALLAH  hamein APNE fazl se ataa farmayega to albatta hum sadqa denge  aur Swaliheen mein se honge, pas jab unko ALLAH TA’ALA ne APNE fazl se ataa kiya to unhone bukhl kiya, maal ke saath aur phir gaye aur munh phernewale hain, pas nifaaq unke dilon mein qayamat ke din tak asar de gaya, ba-sabab iske ke unhone ALLAH se kiye huwe waade ke khilaaf kiya aur ba-sabab iske ke woh jhoot bolte the.”

HUZOOR ﷺ ki khidmat mein us waqt SA’LBA ka ek rishtedaar baitha huwa tha, usne SA’LBA ke muta’alliq naazil honewali aayaat ko suna to uthkar SA’LBA ke paas gaya aur us se kaha teri waalida maari jaaye ! ALLAH TA’ALA tere baare mein falaan falaan aayaat naazil ki hai. SA’LBA ne yeh suna to HUZOOR ﷺ ki khidmat mein haazir huwa aur sadqa qubool karne ki darkhwaast ki, HUZOOR ﷺ ne farmaya MUJHE ALLAH TA’ALA ne tera sadqa lene se manaa kar diya hai.
SA’LBA yeh sunte hi apne sar mein khaak daalne laga . HUZOOR ﷺ ne farmaya teri yeh kartoot ? MAINE tujhse pehle hi keh diya tha magar tu ne MERI baat nahi maani thi.
Jab HUZOOR ﷺ ne sadqa lene se bilkul inkaar kar diya to woh apne thikaane par laut aaye, jab HUZOOR ﷺ wisaal farma gaye to woh apne sadqaat lekar HAZRATE ABUBAKR  رضي الله عنه  ki khidmat mein haazir huwa magar UNHONE bhi lene se inkaar kar diya, phir HAZRATE UMAR  رضي الله عنه ke khilaafat ke zamaane me haazir huwa magar UNHONE bhi lene se inkaar kar diya, yahaan tak ke HAZRATE USMAN GANI رضي الله عنه ke Khalifa banne ke baad SA’LBA ka inteqaal ho gaya.

EK IBRAT ANGEZ WAAQIYA :

Jareer ne Lais se riwaayat ki hai ke ek shakhs HAZRATE ISAA  عليه السلام ki sohbat mein aaya aur kehne laga main AAPKI sohbat mein hamesha AAPKE saath rahunga, lihaaza HAZRATE ISAA  عليه السلام aur woh aadmi ikatthe rawaana ho gaye. Jab ek darya ke kinaare pohonche to khaana khaane ke liye baith gaye, unke paas teen rotiyaan thi , jab do rotiyaan khaa chuke aur ek roti baaqi reh gayi to HAZRATE ISAA  عليه السلام darya par paani peene tashreef legaye. Jab AAP paani peekar waapas tashreef laaye to roti maujood nahi thi , AAPNE poocha roti kisne li hai? Woh aadmi bola ke mujhe maaloom nahi.
Raawi kehte hai ke HAZRATE ISAA  عليه السلام  usey lekar aage chal pade aur AAPNE hirni ko dekha, jo do bachche saath liye jaa rahi thi. AAPNE uske ek bachche ko bulaaya, jab woh aaya to AAPNE usey zabah kiya aur gosht  bhun kar khud bhi khaaya aur us shakhs ko bhi khilaaya, phir bachche se farmaaya ALLAH ke hukm se khada ho jaa. Chunaanche hirni ka bachcha khada ho gaya aur jungle ki taraf chal diya, tab AAPNE us aadmi se kaha MAIN tujhse US ZAAT ke naam par sawaal karta hun JISNE tujhe yeh mo’ajiza dikhlaaya , roti kisne li thi ? Woh aadmi bola mujhe maaloom nahi.

Phir AAP rawasna ho gaye aur ek jungle mein pohonche , jab dono baith gaye to HAZRAT E ISAA  عليه السلام ne mitti aur reth ki dheri banaakar farmaya ke ALLAH ke hukm se sona ho jaa, chunaanche woh sona ban gayi aur AAPNE uski ek jaisi 3 dheriyan banaayi aur farmaya tihaayi meri , tihaayi teri aur tihaayi us shakhs ki hai jisne woh roti li thi, tab woh aadmi bola woh roti maine li thi , AAPNE us se farmaya yeh sona tamaam ka tamaam tera hai aur usey wahin chhod kar AAP aage rawaana ho gaye.
us shakhs ke paas do aadmi aa gaye , unhone jab jungle mein ek aadmi ko tan e maal o mataa ke saath dekha to unki niyyat badal gayi aur unhone iraada kiya ke isey qatl karke maal samet lein, us aadmi ne jab unki niyat bhaanp li to khud hi bol uthaa ke yeh maal hum teeno hi aapas mein baraabar taqseem kar lete hain , phir unhone apne mein se ek shakhs ko sheher ki taraf rawaana kiya taake woh khaana khareed laaye.
jis shakhs ko unhone sheher ki taraf khaana laane ke liye bheja tha , uske dil mein khayaal aaya ke main is maal mein unko hissedaar kyun banne dun , main khaane mein zeher milaaye deta hun taake woh dono hi halaaq ho jaaye aur maal akela main hi le lun ,chunaanche usne aisa hi kiya.
raawi kehte hain ke idhar jo do aadmi jungle mein baithe huwe the , unhone iraada kar liya ke hum usey ek tihaayi kyun dein? , jyunhi woh aaye hum usey qatl kar de aur daulat hum dono aapas mein taqseem kar lein , chunaanche jab woh aadmi khaana lekar aaya to unhone usey qatl kar diya aur baad mein khaana khaaya jise khaate hi woh dono bhi mar gaye aur sone ki dheriyaan usi tarah padhi rahi aur jungle mein 3 laashein reh gayi.
HAZRAT E ISAA عليه السلام ka phir wahaan se guzar huwa aur un ki yeh haalat dekh kar apne saathiyon se farmaya dekho yeh duniya hai , is sey bach ke rehna.

HIKAYAT:

ZUL QARNAIN aise logon ke paas pohonche jinke paas duniyawi maal o mataa bilkul nahi tha, Unhone apni qabrein taiyyaar kar rakhi thi, jab subah hoti to woh qabron ki taraf aate ,unki yaad taaza karte, unhein saaf karte aur unke qareeb namaazein padhte aur jaanwaron ki tarah kuch ghaas-paat kha lete aur unhone guzar basar sirf zameen se ugnewaali sabziyon wagairah par mehdood kar rakhi thi. ZUL QARNAIN ne unke Sardaar ko ek aadmi bhejkar bulaaya lekin Sardaar  ne kaha ZUL QARNAIN ko jawaab dena ke mujhe tumse koi kaam nahi hai, agar tumhein koi kaam hai to mere paas aa jao, ZUL QARNAIN ne jawaab sunkar kaha ke waaqai usne sach kaha hai, chunaanche ZUL QARNAIN uske paas aaya aur usne kaha maine tumhari taraf aadmi bhejkar tumhein bulaaya magar tumne inkaar kar diya lihaaza main khud aaya hun. Sardaar ne kaha agar mujhe tumse koi kaam hota to zaroor aata, ZUL QARNAIN  ne kaha maine tumhein aisi haalat mein dekha hai ke kisi aur qaum ko is haalat mein nahi dekha, sardaar ne kaha AAP kis haalat ki baat kar rahe hai? ZUL QARNAIN ne kaha, yahi ke tumhare paas duniyawi maal o mataa aur maal o manaal kuch bhi nahi hai jis se tum faaida utha sako. Sardaar ne kaha hum sona chaandi ka jama karna bohot buraa samajhte hai  kyunki jis shakhs ko yeh cheezein milti hai woh unmein magan ho jaata hai aur us cheez ko  jo inse kahin behtar hai, bhool jaata hai.

ZUL QARNAIN ne kaha tumne qabrein kyun taiyyaar kar rakhi hai?har subah unki ziyaarat karte ho, unhein saaf karte ho aur unke qareeb khade ho kar Namaaz padhte ho. Sardaar ne kaha yeh isliye ke jab hum qabron ko dekhenge aur duniya ki aarzoo karenge to yeh qabrein hamein duniya se be-niyaaz kar dengi aur hamein hirs o hawa se rok dengi, ZUL QARNAIN ne poocha maine dekha hai ke zameen ke sabze ke ilaawa tumhari koi giza nahi hai., tum jaanwar kyun nahi rakhte taaki tum unka doodh duho, unpar sawaari karo aur unse faaida haasil kar sako. Sardaar ne kaha hum is cheez ko achcha nahi samajhte ke hum unki peton ko unki qabrein banaaye aur hum zameen ki sabzon se kaafi giza haasil kar lete hai aur yeh insaan ki guzre auqaat ke liye kaafi hai, jab khaana halaq se utar jaata  hai ( chaahe woh  kaisa hi ho) phir uska koi mazaa baaqi nahi rehta.
Phir us Qaaid (sardaar) ne ZUL QARNAIN ke peeche haath badhaa kar ke ek khopdi uthaayi aur kaha ZUL QARNAIN ! Jaante  ho yeh kaun hai ? ZUL QARNAIN ne kaha nahi ! yeh kaun hai ? Qaaid ne kaha yeh duniya ke baadshaahon mein se ek baadshah tha, ALLAH TA’ALA ne usey duniyawaalon par shaahi ataa farmaayi thi lekin usne zulm o sitam kiya aur sarkash ban gaya. Jab ALLAH TA’ALA ne us ki yeh haalat dekhi to usey maut de di aur yeh ek gire pade paththar ke maanind be-waq’at ho gaya, ALLAH TA’ALA ne uske aamaal shumaar kar liye hain taaki usey Aakhirat mein sazaa de.

Phir Usne ek aur khopdi uthaayi jo bosidaa thi aur kaha ZUL QARNAIN jaante ho yeh kaun hai ? ZUL QARNAIN ne kaha nahi ! Batao yeh kaun hai ? Qaaid ne kaha yeh ek baadshah hai jise pehle baadshah ke baad hukumat mili, yeh apne peshtar baadshahon ka makhlooq par zulm o sitam aur zyadatiyaan dekh chuka tha lihaaza usne tawaazo’ ki , ALLAH ka khauf kiya aur mulk mein adal o insaaf  karne ka hukm diya,  phir yeh bhi mar kar aisa hogaya jaisa tum dekh rahe ho aur ALLAH TA’ALA ne iska shumaar farma liya hai, yahaan tak ke usey aakhirat mein unka badla dega. phir woh ZUL QARNAIN ki khopdi ki taraf mutawajjah huwa aur kehne laga yeh bhi unhi ki tarah hai., ZUL QARNAIN khayaal rakhna ke tum kaise aamaal kar rahe ho ? ZUL QARNAIN ne uski baatein sunkar kaha kya tum meri dosti mein rehna chaahte ho ? Main tumhein apna bhai aur wazeer yaa jo kuch ALLAH TA’ALA ne MUJHE maal o manaal  diya hai ,usmein apna shareek banaa Lunga. Sardaar ne kaha main aur Aap sulah nahi kar sakte aur naa hi hum ikatthe reh sakte hai, ZUL QARNAIN ne kaha woh kyun ?Sardaar ne kaha isliye ke log tumhare dushman aur mere dost hai, ZUL QARNAIN ne poocha woh kaise ? Sardaar ne kaha woh tumse tumhara mulk, maal aur duniya ki wajah se dushmani rakhte hai aur chunke maine in cheezon ko chord diya hai lihaaza koi ek bhi mera dushman nahi hai aur isiliye mujhe kisi cheez ki haajat nahi hai aur naa mere paas kisi cheez ki kami hai. raawi kehta hai ke ZUL QARNAIN yeh baatein sunkar intehaayi mutaassir huwa aur hairaan waapas laut aaya.

Kisi shaayar ne kya hi achcha kaha hai:

1- Aye woh shakhs jo duniya aur uski zeenat se nafaa andoz hota hai aur duniyawi lazzaton se uski aankhein nahi soti.

2- Tujhe naamumkin cheezon ke husool mein mashgool kar diya hai, jab tu ALLAH ki baargaah mein haazir hoga to kya jawaab dega?

Doosre shayar ka qaul hai:

1-Maine duniya ke jaahilon ko bohot martaba ataa karne aur ahle fazl se Kinaara-kashi karnewaalon par malaamat ki to usne mujhse kaha ke meri majboori suniye.

2-Jaahil mere bete hai lihaaza main unhein sar bulandi deti hun aur muttaqi ahle fazl meri saukan aur aakhirat ke  farzand (bete) hai (lihaaza main unse gurez karti hun).

Janab e Mehmood Baahili ka qaul hai:

1- beshak duniya aaye yaa jaaye insaan ke liye har haal mein fitna wa aazmaayish hai.

2- jab duniya aati hai to daaimi shukr saath laati hai (tu shukr adaa kar) aur jab jaaye to sabr aur saabit qadmi ka muzaahira kar.

END OF BAAB 59. Mukashifatul Quloob az hazrat imam gazali