aulad ke huqooq hadees Ma baap k haq hadis nabi
 BAAB 89 Mukashifatul Quloob
Yeh baat zahen-nasheen rakhni chaahiye ke jahaan azeez o aqaarib ke huqooq ki taakeed ki gayi hai, wahan zawil-erhaam ko khusoosiyat se zikr kiya gaya hai.
Farmaane NABAWI ﷺ hai ke koi beta apne baap ka haq adaa nahi kar sakta yahaan tak ke woh baap ko gulaam paaye aur phir usey khareed kar aazaad kar de.
Farmane NABAWI ﷺ hai ke waalidain se neki, namaaz, roza, sadqa , hajj, umrah aur raah e KHUDA mein jihaad karne se afzal hai.
HUZOOR ﷺ ka irshaad hai ke jis shakhs ne is haal mein subah ki ke uske waalidain us sey raazi hon uske liye jannat ke do darwaaze khol diye jaate hai aur jo isi haalat mein shaam karta hai uske liye bhi usi tarah ke do darwaaze khol diye jaate hai, agar waalidain mein se ek zinda ho to ek darwaaza khola jaata hai , agarche waalidain zyaadati karein, agarche woh zyaadati karein, agarche woh zyaadati karein, aur jisne is haal mein subah ki ke uske waalidain us par naaraaz hon to uske liye jahannam ke do darwaaze khol diye jaate hai , aur jo shaam isi haalat mein karta hai uske liye bhi jahannam ke do darwaaze khul jaate hai, agar waalidain mein se ek ho to ek darwaaza khulta hai agarche woh zyaadati karein, agarche woh zyaadati karein, agarche woh zyaadati karein.
Farmane NABAWI ﷺ hai ke jannat ki khushbu 500 saal ke safar ki doori se paayi jaati hai magar waalidain ka naafarmaan aur qataa rehmi karnewala us khushbu ko nahi paayega.
Farmane NABAWI ﷺ hai ke apne maa, baap, behen aur bhai se ehsaan kar, phir qareebi pas qareebi (shakhs iska mustahiq) hai.
Marwi hai ke ALLAH TA’ALA ne MOOSA عليه السلام se farmaya Aye MOOSA ! Jisne waalidain ki farmabardaari ki aur MERI naafarmaani ki, MAINE usey nekon mein likha hai aur jo waalidain ki naafarmaani karta hai magar MERA farmabardaar hota hai MAINE usey naafarmaanon mein likh diya hai.
Riwaayat hai ke jab HAZRATE YAQOOB عليه السلام, HAZRATE YUSUF عليه السلام ke yahaan tashreef laaye to WOH UNKE istiqbaal ke liye khade naa huwe chunaanche ALLAH TA’ALA ne HAZRATE YUSUF عليه السلام ki taraf Wahi ki ke kya TUM APNE waalid ke liye khade hone ko bohot badi baat samajhte ho? MUJHE Apne izzat o jalaal ki qasam ! MAIN TUMHARE sulb mein se NABI paida nahi karunga.
hadis nabi ﷺ hai ke jab koi shakhs apne musalmaan waalidain ki taraf se sadqa karta hai , to uske waalidain ko uska ajr milta hai aur unke ajr mein kami kiye bagair us aadmi ko bhi unke baraabar ajr milta hai.
HAZRATE MAALIK BIN RABEE’AA رضي الله عنه se marwi hai ke RASOOLALLAH ﷺ ke saath baithe huwe the ke banu salma ke ek aadmi ne aa kar arz ki YAA RASOOLALLAH ﷺ ! Koi aisi neki hai jo main apne waalidain ke liye unki wafaat ke baad karun? AAPNE farmaya haan unke liye dua karo , bakshish talab karo, unke kiye huwe waadon ko poora karo , unke doston ki izzat karo aur unke rishtedaaron se silaa rehmi karo.
hadis nabi ﷺ hai , sabse badi neki yeh hai ke insaan apne baap ki wafaat ke baad uske doston se husne sulook kare. Mazeed irshaad hua ke bete ka maa se neki karna dohraa ajr rakhta hai. Ek aur irshaad hai ke maa ki dua jald qubool hoti hai , poocha gaya YAA RASOOLALLAH ﷺ ! Aisa kyun hai? AAPNE farmaya ke isliye ke maa , baap se zyada meherbaan hoti hai aur riham ki dua kabhi zaaya nahi hoti.
Ek shakhs ne HUZOOR ﷺ se sawaal kiya ke main kis sey neki karun? AAPNE farmaya apne waalidain se neki kar, usne arz ki YAA RASOOLALLAH ﷺ ! Mere waalidain nahi hai, AAPNE farmaya apni aulaad se neki kar kyunki jis tarah waalidain ka tujh par haq hai usi tarah aulaad ka bhi tujh par haq hai.
hadis nabi ﷺ ka farmaan hai ke ALLAH TA’ALA us baap par rehem farmaye jisne apne bete se neki mein ta’aawun kiya (usey nek amal par ubhaara) aur amal e bad ki soorat mein adaayegi e huqooq ka baar uspar nahi hai. HUZOOR ﷺ farmate hai ke aulaad ko atiyaat mein baraabar ka shareek karo aur yeh bhi kaha gaya hai ke tere liye tera beta gul e naaz bu hai , saat baras tak woh tera khaadim hai , uski khushbu soongh , phir woh tera shareek hai yaa tera dushman hai.

BACHCHE KA AQEEQA SAATWEIN ROZ KIYA JAAYE :

HAZRATE ANAS رضي الله عنه se marwi hai ke HUZOOR ﷺ ne farmaya ke saatwein din bachche ka aqeeqa kiya jaaye, uska naam rakha jaaye aur uske baal wagairah door kiye jaaye aur jab woh 6 saal ka ho to baap usey adab sikhaaye, jab woh 9 saal ka ho to uska bichauna alaahida karde, jab 13 baras ka ho to usey namaaz ke liye maare aur jab woh 16 saal ka ho to baap uski Shaadi karde, phir AAPNE HAZRATE ANAS رضي الله عنه ka haath pakadkar farmaya ke MAINE TUJHE adab sikhaaya, taaleem di aur TERI Shaadi kardi, MAIN duniya ke fitne aur aakhirat ke azaab se TERE liye ALLAH ki panaah chaahta hun.
NABI E KAREEM ﷺ ka irshaad hai ke baap par aulaad ka yeh haq hai ke woh unhein behtareen adab sikhaaye aur unke oomda naam rakhe , ek aur farmaan hai ke ladka aur ladki aqeeqa se girwi hai, saatwein din unke liye koi jaanwar zabah kiya jaaye aur uska sar moonda jaaye.
Ek aadmi ne HAZRATE ABDULLAH BIN MUBARAK رضي الله عنه ke saamne apne kisi ladke ki shikaayat ki , AAPNE farmaya kya tumne us par bad-dua ki hai ? usne kaha haan, AAPNE farmaya tu ne usey barbaad kar diya hai , aulaad ke saath nek sulook aur narmi karni chaahiye.
JANAAB E AQRA’ BIN HAABIS رضي الله عنه ne HUZOOR ﷺ ko apne nawaase HAZRATE HASAN رضي الله عنه ko choomte huwe dekha to kaha ke mere dus (10 ) bete hain magar maine kabhi kisi ko nahi chooma, HUZOOR ﷺ ne farmaya beshak jo rehem nahi karta us par rehem nahi kiya jaata.
HAZRATE AYESHA SIDDIQUA رضي الله عنها se marwi hai ke ek din HUZOOR ﷺ ne MUJHSE farmaya ke USAMA ka munh dho daalo , MAINE karaahat se uska munh dhona shuru kiya to HUZOOR ﷺ ne MERE haath pe haath maara aur USAMA ko pakad kar UNKA munh dhoya phir usey chooma.
HAZRATE E HASAN رضي الله عنه (kamsini mein ) ladkhadaate huwe masjid mein daakhil huwe aur HUZOOR ﷺ mimbar par tashreef farma the, AAPNE mimbar se utar kar UNHEIN uthaaya aur yeh aayat e mubaraka tilaawat farmaayi :-
“Siwaaye iske nahi ke tumhare maal aur aulaad fitna hai.”
HAZRATE E ABDULLAH BIN SHADDAAD رضي الله عنه se marwi hai ke HUZOOR ﷺ logon ko namaz padha rahe the ke achaanak HAZRATE IMAM E HUSAIN رضي الله عنه sajde ki haalat mein AAPKI gardan par sawaar ho gaye , AAPNE sajda taweel kar diya , logon ne samjha shaayad koi baat ho gayi hai , jab AAPNE namaaz poori kar li to SAHABA ne arz ki YAA RASOOLALLAH ﷺ ! AAPNE bohot taweel sajda kiya , yahan tak ke HUM samjhe koi baat waaqe’ ho gayi hai , AAPNE farmaya MERA beta mujh par sawaar ho gaya to MAINE jaldi karna munaasib na samjha taake woh apni khushi (haajat) poori kar le.
Is hadees mein kai fawaaid hain , ek yeh ke jab tak aadmi sajde mein rehta hai usey ALLAH TA’ALA ka qurb haasil rehta hai. Is hadees se aulaad se narmi aur bhalaayi aur ummat ki taaleem , sab baatein saabit hoti hai.
HUZOOR ﷺ ka irshaad hai ke aulaad ki khushbu Jannat ki khushbu hai.
END OF BAAB 89 Mukashifatul Quloob