BAAB 43 ZINDAGI KE BAARE MEIN GAUR WA FIKR

556

ALLAH TA’ALA ne Quran e Majeed mein bohot se maqaamaat par insaan ko gaur wa fikr karne ka hukm diya hai chunaanche farmaan e ILAAHI hai :
“Beshak zameen o aasmaan ki paidaaish aur raat din ke ikhtelaaf mein” (ahle baseerat ke liye nishaaniyaan hai )

yaani raat din ke ek doosre ke peeche aane jaane mein aqalmandon ke liye gaur wa fikr ki daawat hai kyunki jyunhi ek jaata hai , doosra aa jaata hai , chunaanche irshaad e ILAAHI hai :
ALLAH TA’ALA Woh hai jisne raat aur din ko ek doosre ke peeche aane wala kar diya hai.
JANAABE ATA’ رحمت لله عليه ka qaul hai ke pehli aayat mein ikhtelaaf se muraad noor wa zulmat , kami aur zyaadati hai .
kisi ne kya khoob kaha hai;
1 )aye raat ki ibtedaayi hissa mein khush khush sone wale , kabhi subah ko masaib bhi naazil ho jaaya karte hain.
2 ) raat ke pehle pehar ki paakeezgi se khush na ho , raat ke bohot se aakhri hisse jahannam ke sholon ko bhadka dete hain .
doosra shaayar kehta hai;
1) beshak raatein logon ki manzil hain
2) chhoti raatein gamon ki wajah se taweel ho jaati hai aur taweel raatein musarrat ki wajah se chhoti maaloom hoti hain.

OOLUL ALBAAB KAUN HAI ?

Aur ALLAH TA’ALA ne gaur o fikr karne waalon ki tareef ki chunaanche farmaan e ILAAHI hai:
yeh woh log hain jo khade hue , baithe hue aur pehlu ke bal lete hue ALLAH ko yaad karte hain aur zameen o aasmaan ki paidaaish mein gaur o fikr karte hain ( aur kehte hain ) aye hamare PARWARDIGAAR ! TU ne unko be-faida paida nahi kiya.

ZAAT E BAARI MEIN GAUR O FIKR KI MUMAANIYAT :

HAZRAT E IBNE ABBAS رضي الله عنه
se marwi hai ke kuch logon ne ALLAH TA’ALA ki zaat wa sifaat mein gaur o fikr kiya to HUZOOR ﷺ ne farmaaya makhlooq e KHUDA ke ahwaal mein gaur o fikr karo , ALLAH ki zaat mein gaur o fikr na karo kyunki tum USKI bemisaal qudrat par qaadir nahi ho sakte .

HUZOOR ﷺ se marwi hai ke ek din AAP ek aisi jamaat ke paas gaye jo gaur o fikr mein doobi huwi thi , AAPNE poocha kya baat hai tum bolte kyun nahi ho ? unhone jawaab diya hum ALLAH TA’ALA ke baare mein gaur o fikr kar rahe hain , AAPNE farmaaya achcha ! lekin makhlooq e KHUDA mein gaur o fikr karo , KHAALIQ E QAAYNAAT ki zaat mein gaur o fikr mat karo , phir AAPNE farmaya magrib mein ek safed buraaq nooraani zameen hai ,suraj ka wahan tak chaalees dinon ka safar hai , wahan ALLAH TA’ALA ne ek makhlooq paida farmaayi hai , woh jabse paida huwe hain unhone ek lamha bhi ALLAH TA’ALA ki naafarmaani nahi ki , logon ne poocha HUZOOR ! unmein shaitaan ka guzar nahi hai ? AAPNE farmaaya unhe shaitaan ki paidaaish ka ilm hi nahi , poocha gaya woh AADAM عليه السلام ki aulaad mein se hai ? AAPNE farmaya unhein to AADAM عليه السلام ki paidaaish ka bhi ilm nahi hai .

HAZRAT E ATA’ رحمت لله عليه se marwi hai ke ek din main aur UBAID BIN UMAIR HAZRAT E AISHA رضي الله عنها ki khidmat mein haazir huwe , AAPKE aur hamare darmiyaan parda padaa hua tha , unhone poocha Ubaid ! tum hamari mulaaqaat ko kyun nahi aate ? UBAID ne kaha main HUZOOR ﷺ ke is farmaan ki wajah se der se haazir hota hun ke HUZOOR ﷺ ne farmaya :
“Taakheer se mulaqaat karo , mohabbat badegi .”
IBN E UMAIR bole AAP hamein HUZOOR ﷺ se mushaahida ki hui ajeeb baaton se koi ajeeb baat batlaayein. HAZRAT E AISHA رضي الله عنها ro padi aur farmaya HUZOOR ﷺ ki har baat ajeeb thi .

ek martaba HUZOOR ﷺ raat ko mere yahan tashreef laaye aur mere saath aaraam farma huwe , thodi der ke baad farmaya ke Mujhe ijaazat do taake Main ALLAH TA’AALA ki ibaadat karun. Chunaanche AAP ek mashkeeza ki taraf gaye , wuzu farmaya aur namaz mein khade ho gaye . namaz shuru karte hi AAPNE rona shuru kiya yahan tak ke AAP KI mubarak daadhi aansuon se tar ho gayi , phir sajda kiya yahan tak ke rote rote zameen geeli ho gayi , salaam ke baad AAP pehlu ke bal let gaye taa aañki HAZRAT E BILAL رضي الله عنه ne subah ki azaan de di aur AAPKO namaz ke liye bulaaya aur arz ki YAA RASOOLALLAH ! AAP kis liye rote hain halaanke ALLAH TA’ALA ne AAPKE sabab AAPKE aglon aur pichlon ki khataayein maaf farmaayi . AAPNE farmaya afsos ! BILAL tum mujhe rone se rokte ho halaanke ALLAH TA’ALA ne aaj ki raat Mujh par yeh aayat naazil farmaayi hai :
beshak zameen o aasmaan ki paidaaish aur raat din ke ikhtelaaf mein aqalmandon ke liye nishaaniyaan hai .
phir irshaad farmaya, us shakhs par afsos hai jisne yeh aayat padhi aur usmein gaur o fikr nahi kiya.
IMAM E AUZAAYI رضي الله عنه se poocha gaya ke in aayaat mein gaur o fikr karne se kya muraad hai ? to Unhone jawaab diya in aayaat ko padho aur phir inhein samajhne ki koshish karo .

MOHAMMED BIN WAASE’ رحمت لله عليه se marwi hai ke basraah ka ek shakhs HAZRAT E ABU ZAR رضي الله عنه ki wafaat ke baad UNKI zaujaaye mohtarmaa ki khidmat mein haazir huwa aur unse HAZRAT E ABUZAR رضي الله عنه ki ibaadat ke muta’alliq poocha , unki zauja ne jawaab diya ke woh saara din ghar ke kone mein baithe gaur o fikr kiya karte the .
JANAAB E HASAN رحمت لله عليه ka qaul hai ke ek lamha ka gaur o fikr raat bhar ki ibaadat se behtar hai , HAZRAT E FUZAIL ka qaul hai ke gaur o fikr ek aaina hai jo tujhe teri nekiyaan aur buraaiyaan dikhaata hai .
JANAB E IBRAHIM رحمت لله عليه se kaha gaya ke AAP bohot zyada gaur o fikr karte hain , UNHONE kaha ke gaur o fikr aqal ka magz hai . JANAB E SUFIYAAN BIN UYAINAH رحمت لله عليه shayar ke is sher ko aksar bataur e tamseel pesh kiya karte the .
1) jab aadmi mein gaur o fikr karne ka maadda ho to usey har cheez mein ibratein nazar aati hain.

HAZRATE ISAA عليه السلام KA HAWAARIYON KO JAWAAB:

JANAAB TAAOOS رحمت لله عليه se marwi hai ke hawaariyon ne HAZRATE ISAA عليه السلام se kaha ke aaj roo e zameen par AAP jaisa koi aur bhi hai ? AAPNE farmaya jiska bolna zikre ILAAHI mein ho , jiski khaamoshi gaur o fikr mein aur jiski nigaah nigaahe ibrat ho, woh mujh jaisa hai.
JANAAB e HASAN رحمت لله عليه ka qaul hai ke jis shakhs ki guftagu hakeemaana nahi wo lagv hai, jiski khaamoshi gaur o fikr ki khaamoshi nahi hai wo bhool hai aur jiski nigaah nigaahe ibrat nahi wo behuda hai.
Farmane ILAAHI hai :
“Albatta MAIN apni nishaaniyon se zameen par naahaq takabbur karnewalon ko pher dunga.”
JANAAB e HASAN رحمت لله عليه kehte hai ke is aayat ke maana ye hai ke “MAIN unke dilon mein gaur o fikr karne ki salaahiyat hi nahi rehne dunga.”

HAZRATE ABU SAEED KHUDRI رضي الله عنه se marwi hai, HUZOOR ﷺ ne farmaya ke apni aankhon ko ibaadat ka hissa do , arz ki gayi HUZOOR! Unka ibaadat se kya hissa hai ? AAPNE irshaad farmaya Quran e Majeed ko dekhna, usmein gaur o fikr karna aur uske ajaaibaat mein sabaq haasil karnewaali nigaah se gaur o khauj karna.
MAKKA MUAZZAMA ke qareeb jungle mein rehnewaali aurat se marwi hai , usne kaha agar nekon ke dil gaur o fikr mein doob kar gaib ke pardon mein poshida un in’aamaat ko dekh lein jinko ALLAH TA’ALA ne unke liye taiyyaar kiya hai to unki dunyawi zindagi unpar bhaari ho jaaye aur duniya unki nazron mein bilkul haqeer ho jaaye.

HAZRATE LUQMAAN tanhaayi mein baith kar bohot der tak gaur o fikr mein doobe rehte, UNKA khaadim wahan se guzarta aur kehta ke AAP hamesha tanhaa baithe rehte hai, agar logon ke saath baitha karein to AAP unse ulfat haasil kare, AAP jawaab mein farmate ke taweel tanhaayi daaimi gaur o fikr ataa karti hai aur taweel tafakkur Jannat ka raasta hai.
JANAAB E WAHAB BIN MAMBA رضي الله عنه ka qaul hai ke jis shakhs ka gaur o fikr badh jaata hai usey ilm ataa hota hai aur jise ilm ataa hota hai wo amal karta hai .
HAZRATE UMAR BIN ABDUL AZIZ رضي الله عنه ka qaul hai ke ALLAH TA’ALA ki ne’maton mein gaur o fikr karna sabse afzal ibaadat hai.
HAZRATE ABDULLAH BIN MUBARAK رضي الله عنه ne ek din SAHAL BIN ALI رضي الله عنه ko khaamosh aur mutafakkir dekh kar poocha kahan tak pohonche ho ? Wo bole ke pul siraat ke muta’alliq gaur o fikr kar raha hun.

JANAAB E BISHAR رحمت لله عليه ka qaul hai ke agar log ALLAH TA’ALA ki azmat mein gaur o fikr karein to kabhi bhi ALLAH TA’ALA ki na farmaani na karein.
HAZRATE IBN E ABBAS رضي الله عنهما ka qaul hai ke aisi do rakaatein jo huzoor e qalb aur intehaayi gaur o fikr se padhi jaaye , woh saari raat ke behuzoor e qalb ibaadat se afzal hai.
JANAAB E ABU SHURAIH رحمت لله عليه chale jaa rahe the ke achaanak chaadar lapet kar baith gaye aur rona shuru kar diya , rone ka sabab daryaaft kiya gaya to unhone kaha main apni guzashta umr, qaleel nekiyon aur maut ke jald aane par gaur karke ro raha hun.
ABU SULEMAAN رحمت لله عليه ka qaul hai aankhon ko rone ka aur dilon ko gaur o fikr karne ka aadi banao , mazeed farmaaya duniya ke baare mein gaur o fikr aakhirat ke liye ek parda hai aur nekon ke liye azaab hai lekin aakhirat ke muta’alliq gaur o fikr ilm ka waaris banaata hai aur dilon ko zinda karta hai.

JANAB E HAATIM. رحمت لله عليه ka qaul hai ke ibrat haasil karne se ilm badhta hai , zikr se mohabbat badhti hai aur gaur o fikr se khauf e KHUDA badhta hai.
HAZRAT E IBNE ABBAS رضي الله عنهما ka qaul hai ke nekiyon mein gaur o fikr nekiyon ki targeeb deta hai aur gunaahon par pashemaani gunaah chhordne par aamaada karti hai.
riwaayat hai , ALLAH TA’ALA ne apni baaz kitaabon mein farmaya hai ke MAIN har aalim wa daanishmand ka kalaam nahi , uski niyyat aur mohabbat dekhta hun , agar uski niyyat wa mohabbat MERE liye hoti hai to MAIN uski khaamoshi ko gaur o fikr ki khaamoshi , uski guftugu ko hamd karaar deta hun agarche woh khaamosh baitha hua ho.
JANAB E HASAN رحمت لله عليه ka qaul hai ke aqalmand hamesha zikr se fikr ki jaanib aur gaur o fikr se zikr e KHUDA ki jaanib ruju hote hain yahan tak ke unke dil bolte hain aur ilm o hiqmat ki baatein karte hain .

IS’HAAQ BIN KHALAF رحمت لله عليه kehte hain ke JANAAB DAWOOD TAAI ek chaandni raat mein chhat par baithe , ALLAH TA’ALA ke ajaaibaat e arz o samaa mein gaur o fikr kar rahe the aur woh aasmaan ki taraf dekh kar ro rahe the yahan tak ke bekhudi ki haalat mein hamsaaya ke ghar mein gir pade , makaan ka maalik apne bistar se barahna talwaar lekar jhapta, woh samjha shayad koi chor aa gaya hai lekin jab usne aap ko dekha to talwaar niyaam mein karke poocha , Aapko kisi ne chatt se dhakka diya hai ? AAPNE farmaya mujhe maaloom nahi.
JANAB E JUNAID رحمت لله عليه ka qaul hai ke behtareen aur oomda majlis , gaur o fikr hai jo tauheed ke maidaan mein anjaam di jaaye aur mohabbat ke samandar se mohabbat ke jaam peena behtareen sharaab aur maarefat ki muattar hawaaon se lutf andoz hona sab hawaaon se behtar hai aur ALLAH TA’ALA se ajr e hasan ki ummeed rakhna umdagi mein bemisaal hai, phir farmaya woh dil kaisa behtareen hai jo un majaalis ka shanaasa hai aur usey khushkhabri ho jo mohabbat ke un lazeez tareen jaamon se kaam wa dehen ki tawaazo’ karta hai.

IMAAM E SHAAFAI رضي الله عنه ka qaul hai ke guftagu par khaamoshi se aur husool e ilm ke liye gaur o fikr karne se imdaad talab karo. mazeed farmaya kaamon ke baare mein achhi tarah soch samajh lena dhoka se bachaata hai aur oomda raai sharmindagi aur hadh se zyada badh jaane se bacha leti hai, kaamon mein tafakkur aur gaur o khauj hoshiyaari paida karta hai , daanaaon ke mashware aur zihaanat e nafs ki paaidaari aur baseerat ki quwwat hai lihaaza iraada karne se pehle soch , kaam karne se pehle gaur o fikr kar aur qabl az waqt mashwara haasil kar.
mazeed farmaaya ke fazaail chaar hain, pehli hikmat , jiska daar o madaar gaur o fikr par ho , paakbaazi jiska daar o madaar shehwat se ijtenaab hai , quwwat jiska daar o madaar gussa par hai , adl jiska daar o madaar quwaa e nafsaani ke aitedaal par hai.

END OF BAAB 43

Give Your Mashwara Feedback