allah ka farman mano na manne par waeed

84
Baab 54 Mukashifatul Quloob
MUMAAN'AT E ZULM :
Farmane ILAAHI hai; "Aur anqareeb zaalim jaan lenge kaunsi phirne ki jagah phere jayenge." Farmane NABAWI ﷺ hai ke zulm  qayamat ke din taareeki hogi. HUZOOR ﷺ ne mazeed farmaya jo shakhs ek baalisht zameen zulm se haasil kar leta hai, ALLAH TA'ALA uske gale mein saaton zameenon ka tauq daalega. Baaz kitaabon mein marqoom hai ke ALLAH TA'ALA farmaata hai, us aadmi  par zulm MERE gazab ko bhadkaa deta hai jiska MERE siwa koi  madadgaar nahi hai. Kisi shayar ne kya khoob kaha hai,
1 ) jab tu saahib e iqtedaar ho to kisi par hargiz zulm naa kar kyunki zulm ka anjaam sharmindagi hai. 2) teri  aankhein soyegi magar mazloom ki aankhein jaag kar tere liye ALLAH TA'ALA se baddua karegi aur ALLAH TA'ALA kabhi sota nahi hai. Doosra shayar kehta hai, 1) jab mazloom zameen par chale aur zaalim bure aamaal mein hadd se zyada badh jaaye, to tu usko masaib e zamana ke supurd karde kyunki zamana usey woh sabaq dega jo uske wahem o gumaan mein bhi nahi hoga.
Aslaafe kiraam mein se baaz ka qaul hai ke kamzoron par zulm naa karo warna tu badtareen taaqatwaron mein se ho jaayega. HAZRATE ABU HURAIRA رضي الله عنه ka qaul ke zaalim zulm ki wajah se jazar apne aashiyaane mein marr jaata hai. Kehte hai Tauret mein marqoom tha ke pulsiraat ke us taraf munaadi nidaa karega, aye sarkash zaalimon ! Aye badbakht zaalimon ! Beshak ALLAH TA'ALA ne APNI izzat ki qasam khaayi ke aaj zaalim ka zulm pul siraat par se nahi guzrega. (Zaalim pul siraat se nahi guzar sakenge ) HAZRATE JAABIR رضي الله عنه se marwi hai ke jab muhaajireen e habsha HUZOOR ﷺ ki khidmat mein waapas lautkar aagaye to AAPNE unse farmaya ke tumne habsha mein koi ajeeb baat dekhi ho to MUJHE batlao, HAZRATE QUTAIBA رضي الله عنه unhi muhaajireen mein se the, UNHONE arz ki YAA RASOOLALLAH ! (  ﷺ) Meri taraf tawajjoh farmaiyye, Main batlaata hun. Hum ek din baithe huwe the ke habsha ki ek boodhi aurat sar par paani ka bartan rakhe jaa rahi thi , jab woh ek habshi jawaan ke qareeb se guzri to usne khade ho kar budhiya ke dono kandhon par haath rakhkar usey dhakka diya jis se budhiya ghutnon ke bal jaa giri aur uska matka toot gaya, woh uthi aur jawaan ki taraf mutawajjah ho kar kehne lagi aye gaddaar !  Tu anqareeb jaan lega jabki ALLAH TA'ALA adaalat (insaaf) farmayega aur pehle pichle sab logon ko jamaa karega aur haath paun aadmi ke aamaal ki gawaahi denge, ALLAH ke yahaan tu bhi apna aur mera faisla kal sunlega. raawi kehte hai, HUZOOR ﷺ ne ye sunkar farmaya ke ALLAH TA'ALA aisi qaum ko kaise falaah dega jo taaqatwaron se kamzoron ko badla nahi dila sakti.
HUZOOR ﷺ se marwi hai , AAPNE farmaya paanch aadmi aise hai jinpar ALLAH TA'ALA gazabnaak hota hai , agar WOH chaahega to duniya mein unhein APNE gazab ka nishaana banaayega warna (aakhirat mein) unhein jahannam mein daalega. Haakim e qaum jo khud to doosron se apne huqooq le leta hai magar unhein unke huqooq nahi deta aur unse zulm ko dafa nahi karta. Qaum ka qaaid, log jiski pairwi karte hai aur woh taaqatwar aur kamzor ke darmiyaan faisla nahi kar sakta aur khwaahishaat e nafsaani ke mutaabiq guftagu karta hai. Ghar ka sarbaraah jo apne gharwalon aur aulaad ko ALLAH ki itaa'at ka hukum nahi deta aur unhein deeni amoor ki taaleem nahi deta. Aisa aadmi jo ujrat par mazdoor laata hai aur kaam mukammal karwa ke uski ujrat (mazdoori) poori nahi deta, Aur woh aadmi jo apni biwi ka haqq e meher dabaakar uspar zyaadati karta hai.
EK BUDHIYA PAR ZULM KE SABAB HALAAKAT :
HAZRATE ABDULLAH BIN SALAAM رضي الله عنه se marwi hai, AAPNE farmaya ALLAH TA'ALA ne jab makhlooq ko paida farmaya aur woh khade ho gaye to unhone ALLAH ki taraf sar uthaakar dekha aur kaha aye ALLAH !  TU  kis ke saath hoga ? RABB E JALEEL ne farmaaya mazloom ke saath yahan tak ke usey uska haqq diya jaaye. WAHAB BIN MAMBA رضي الله عنه kehte hai kisi zaalim baadshah ne shaandaar mahal banwaaya, ek muflis budhiya aayi aur usne mahal ke pehlu mein apni kuttiya bana li, jismein woh sukoon se rehti thi. Ek martaba zaalim baadshah ne sawaar ho kar mahal ke irdgird chakkar lagaaya to usey budhiya ki kuttiya nazar aayi ,usne poocha yeh kiski hai ? Kaha gaya yeh ek budhiya  ki hai aur woh usmein rehti hai chunaanche usne hukum diya ke isey giraa do, lihaaza usey giraa diya gaya, jab budhiya waapas aayi to usne apni giri huwi kuttiyaa dekhkar poocha isey kisne giraa diyaa hai ? Logon ne kaha isey baadshah ne dekha aur giraa diya, tab budhiya ne aasmaan ki taraf sar uthaaya aur kaha aye ALLAH !  Agar main haazir nahi thi to TU kahan tha ? ALLAH TA'ALA ne JIBRAEEL عليه السلام ko hukm diya, mahal ko uske rehnewaalon par ulat do aur aisa hi kiya gaya.
Kehte hai ke ek barmaki ameer aur uske bete ko jab ek abbaasi Ameerul muslimeen ne qaid kar diya to bete ne kaha aye abbajaan !  Hum baa-izzat hone ke baad qaid kar diye gaye hai, baap ne jawaab diya ,bete mazloomon ki faryaadein raaton ko safar karti hai, hum unse gaafil rahe magar ALLAH TA'ALA unse gaafil nahi tha. YAZEED BIN HAKEEM kaha karte the , MAIN kabhi kisise khaufzada nahi huwa albatta MUJHE ek shakhs ne dara diya yaani MAINE uspar ye jaante huwe zulm kiya ke ALLAH ke siwa uska koi madadgaar nahi hai ,woh MUJHSE kehta tha ke mujhe ALLAH kaafi hai, ALLAH TA'ALA tere aur mere darmiyaan faisla karega.
HAZRATE ABI UMAAMA  رضي الله عنه  se marwi hai zaalim qayamat ke din aayega jab woh pulsiraat par pohonchega to usey mazloom mil jaayega aur woh apne zulm ko khoob pehchaan lega, lihaaza zaalim mazloomon se najaat nahi paayenge yahan tak ke zulm ke badle unki nekiyaan le lenge aur unki nekiyaan nahi hongi to unke zulm ke baraabar apne gunaah zaalimon par daal denge yahan tak ke zaalim jahannam ke sabse nichle tabqe mein bheje jaayenge. HAZRATE ABDULLAH BIN ANEES  رضي الله عنه se marwi hai ke Maine RASOOL E AKRAM ﷺ ko yeh farmate suna hai, qayamat ke din log nange badan, nange paaun, gair makhtoon, siyaah soorton mein uthenge.
Pas munaadi nidaa karega jiski aawaaz aisi hogi jo door o nazdeek yaksaan taur par suni jaayegi, MAIN badle denewala MAALIK hun. Kisi jannati ke liye munaasib nahi hai ke woh jannat mein jaaye iske bawajood ke uspar kisi jahannami ki daadkhwaahi rehti ho, chaahe woh ek thappad hi kyun naa ho yaa us se zyada ho aur koi jahannami jahannam mein naa jaaye is haal me ke uspar kisi ka haq rehta ho , chaahe woh ek thappad ho yaa us se zyada ho aur tera RAB kisi ek par bhi zulm nahi kaarega , hum ne arz ki Yaa RASOOLALLAH ! ﷺ ye kaise ho sakega haalaanke hum to us din nange badan, nange paaun honge, AAPNE farmaya nekiyon aur buraiyyon ke saath mukammal badla diya jaayega aur tumhara RAB kisi ek par zulm nahi karega. HUZOOR ﷺ se marwi hai jo naa-haq ek chaabuk maarta hai, qayamat ke din uska badla liyaa jaayega.
HIKAYAT :
KISRA ne apne bete ke liye ek ustad muqarrar kiya jo usey taaleem deta tha aur adab sikhaata, jab woh bachcha mukammal taur par ilm wa fazl se maalaamaal ho gaya to ustad ne usey bulaaya aur bagair kisi jurm aur bagair kisi sabab ke usey intehaayi dardnaak sazaa di us ladke ne apne ustaad ke is rawaiyye ko bohot hi buraa samjha aur dil mein uski taraf se adaawat paida ho gayi yahan tak ke woh jawaan ho gaya ,uska baap marr gaya aur baap ke baad woh baadshah ban gaya. Baadshaahi sambhaalte hi usne ustaad ko bulaakar poocha AAPNE falaan din bagair kisi jurm aur bagair kisi sabab mujhe itni dardnaak sazaa kyun di thi? Ustaad ne kaha aye baadshah jab tu ilm wa fazl ke kamaal tak pohonch gaya to mujhe maaloom ho gaya ke baap ke baad tu baadshah banega, maine Socha tujhe sazaa kaa zaaiqaa (lazzat) aur zulm ki takleef se muwafiq kar dun taaki tu uske baad kisi par zulm naa kare, baadsaah ne kaha , ALLAH TA'ALA aapko jazaaye khair de aur phir unka wazeefa muqarrar kar diya aur unke akhraajaat (kharch) ki adaaygi ka hukm saadir kar diya.
END OF BAAB 54.
 

Give Your Mashwara Feedback