Hazrat musa Alaihis salam  islamic story in hindi  Aaj se inshaallah allah ta’ala ke pyaare nabi Hazrat musa Alaihis salam  aur hazrat harun alayhis salaam ke baare me waaqiyaat aayenge…
Aap lougo se guzaarish he ki post padhte rahe aur aage dusre musalmaan bhaiyo tak pahonchate rahe…

 bani israaeel :

Hazrat yaaqub alayhis salaam ki aulaad ko bani israaeel kaha jata he kyunki ‘israaeel’ hazrat yaaqub alayhis salaam ka ‘laqab’ he ya aap ka dusra naam he,
lafz ‘israaeel’ me ek qoul ye he ki ye ajami lafz he, ‘israa’ aur ‘eel’ se murakkab he, ‘israaeel’ ke 4 ma’ani bayaan kiye gaye he,
Abd(banda, ibaadat karne wala),
Safwa(barguzida)
Insaan aur
Muhaajir(hijrat karne wala),Aur ‘eel’ ka ma’ani he allah ta’ala,
Is lihaaz par hazrat yaaqub alayhis salaam ka ye naam is liye huwa ki allah ta’ala ki ibaadat guzaar aur uski barguzida aur uske peida karda azeemul martabat insaan aur allah ta’ala ki taraf ruju’a karne wale yaani hijrat karne waale bhi the,
Baaz hazraat ne kaha ki ye lafz arabi he, ‘israa’ ka ma’ani he raat ko le jaana aur ‘eel’ ka ma’ani he allah ta’ala ,
ab is lihaaz par hazrat yaaqub alayhis salaam ka naam rakha gaya ki allah ta’ala ne aapko raat ke waqt apni taraf ruju’a karaya ki aap uski taraf hijrat karne waale hue.
(tafseere qurtubi, jild-1, safa-331)
(tazkiratul ambiya alayhis salaam, safa-369)

Hazrat musa Alaihis salam  “hazrat harun  Alaihis salam  ”

 hazrat musa alaihas salam

Hazrat musa Alaihis salam  ke waalid imraan he, jo apne qabile ke sardaar the, laavi bin yaaqub ki aulaad se the,
Hazrat musa Alaihis salam  ki waalida ke naam me ikhtelaaf he, yaarkhaa, ayaarkhat, nokhaanaz, lawkhaa, mariyam, sahi qoul pehla he yaani ‘yaarkhaa’, (tafseere naeemi me ‘aaiz’ likha he).
(tafseere jalaalein, safa-326)

”hazrat harun  Alaihis salam  ”

H”hazrat harun  Alaihis salam  ” Hazrat musa Alaihis salam  ke sage bhai he, bahot bade housla-mand aur bard-baar(maherbaan) the, bani israaeel aapse bahot mohabbat karte the,
Ek riwaayat me aaya he ki hazrat haarun alayhis salaam Hazrat musa Alaihis salam  se 3 saal bade the.
(tafseere saawi bar jalaalein, safa-141)
(tazkiratul ambiya alayhis salaam, safa-369, 370)
saamri  jadugar
Saamri jisne bani israaeel ko bachhade(bull) ki pujaa par lagaa diya tha(jiska zikr inshaallah aage aayega) uska naam bhi musa tha,
saamri ke naam wa nasab aur jaaye-sukunat(rehne ki jagah) ke baare me aqwaal mukhtelaf(alag alag) he,
sabse zyada waajeh qoul yahi he ki uska naam Hazrat musa Alaihis salam  aur uske baap ka naam zafar tha aur wo bani israaeel ka ek qabila ‘saamra’ tha.
us qabile ki munaasebat se uski jaaye-sukunat(rehne ki jagah) ka naam bhi ‘saamra’ huwa, isliye usko saamri kehte he, ye shakhs khud aur uska sara qabila ke tamaam loug gaay ki parastish(pujaa) kiya karte the,
ye saamri us zamaane me peida huwa jab ki firoun bani israaeel me peida hone waale har ladke ko zabah kar deita tha, jab ye peida huwa to uski maa ne use pahaad ki gaar me chhupa diya,
bani israaeel ke is qism ke baccho ki tarbiyat ke liye hazrat jibrail alayhis salaam ko allah ta’ala ne muqarrar farmaya tha,
us musa bin zafar yaani saamri ki tarbiyat ke liye bhi hazrat jibrail alayhis salaam mut’aeen the, wo uski gaar me tashreef laate aur uska apna haath uske moonh me de deite jisse wo dhoodh aur shahad chusta rehta.
(tafseere qurtubi, jild-7, safa-284)
Baaz ulma ne likha he ki hazrat jibrail alayhis salaam khud apni ungaliya uske moonh me de deite the jisse wo dhoodh aur shahad chusta tha,
Jab aadmi asale khalqat me sa’aadat se mahrum ho to uski tarbiyat karne waalo ke dimaag heiyrat-zada aur usse behtari ki ummid rakhne waale khaaib(na-kaam) wa khaasar ho kar rah jaate he,
wo Hazrat musa Alaihis salam  jiski parwarish jibrail alayhis salaam ne ki, kaafir huwa aur wo Hazrat musa Alaihis salam  jiski parwarish firoun ne ki allah ta’ala ka rasool(bhejaa huwa) he.
(roohul ma’ani, safa-277)
Saamri Hazrat musa Alaihis salam  par bazaahir imaan laaya, magar pakka munaafiq tha.
(attibyaan, safa-201)
(tazkiratul ambiya alayhis salaam, safa-370)

 firon ki kahani story of Badshah firon

Misr ke baadshaaho ka laqab ‘firoun’ huwa karta tha, jis tarah room ke baadshaaho ka ‘qeisar’, faaras ke baadshaaho ka ‘kisraa’, yaman ke baadshaaho ka ‘tab’a’, turk ke baadshaaho ka ‘khaakaan’ aur habsha ke baadshaaho ka laqab ‘najjaashi’ tha,
Misr ke jitne baadshah bhi guzre he koi bhi musa alayhis salaam ke zamaane ke firoun se zyaada bad-khalq, sakht-dil aur zaalim nahi tha,
Hazrat yusuf alayhis salaam ke zamaane ke firoun ka naam ‘rayyaan bin walid’ tha, jisne imaan qabul kar liya tha, Hazrat musa Alaihis salam  ke zamaane me paya jaane waala firoun ‘walid ibne mas’ab ya mas’ab bin rayyaan’ tha, baaz ne uska naam ‘qaabus’ bhi tehrir kiya he, qabilaa e qibtiyaa se tha,
hazrat yusuf alayhis salaam aur Hazrat musa Alaihis salam  ke zamaane me paaye jaane waale firouno ke darmiyaan 400 saal se zyaada arsa tha.
(tazkiratul ambiya alayhis salaam, safa-370, 371)
bani israaeel ke baccho ko zabah karna
Quran me allah ta’ala irshaad farmata he
“aur (yaad karo) jab hamne tumko firoun waalo se naja’at bakshi ki jo tumpar buraa azaab karte the tumhaare beito ko zabah karte aur tumhaari beitiyo ko zinda rakhte aur usme tumhaare rabb ki taraf se badi aazmaaish thi ya badaa inaam”
(surah al baqrah, aayat-49)
Firoun ne ek khwaab deikha ki beitul muqaddas ki jaanib se ek aaag nikli he jisne misr ko gheir liya aur tamaam qibtiyo ko jalaa diya.
lekin bani israaeel ko usne koi nuqsaan na pahonchaya, is khwaab se firoun bahot pareshaan huwa usne khwaab ki ta’abir bayaan karne waale maahirin se puchha ki is khwaab ki ta’abir kya ho sakti he..??
Unhone bataya ki is khwaab se to yahi samajh aata he ki bani israaeel me ek baccha peida hoga jo tumhaari baadshaahi ke zawaal(mout) ka sabab banega,
ye soon kar firoun ne hukm de diya ki bani israaeel me jo baccha bhi peida ho use zabah kar diya jaaye, is tarah uske hukm se hazaaro ki taadaad me unke bacche zabah kar diye gaye.
wo jo zabah kiye gaye unki taadaad 12,000 ya 70,000 thi, itni baat waajeh he ki hazaaro ki taadaad me the.
(jaml bahawaala tafseere jalaalein, safa-9)
Unhe ladkiyo se koi khatra nahi tha is liye unko zinda chhod deite,
Allah ta’ala ne huzoor nabi e kareem sallallaho alayhe wasallam ke zamaane ke bani israaeel ko ye haalaat yaad karne ke liye (quraane paak me) farmaya ki tumhaare baap-daada par hamaare bade inaam the, wo bhi shukr karne ki bajaaye rabb ta’ala ke ahekaam ka inkaar hi karte rahe aur khaaib(na-kaam) wa khaasar hue, tumhe chaahiye ki tum nasihat haasil karo,
“usme tumhaare rabb ki taraf se badi aazmaaish thi ya badaa inaam”
Iske 2 matlab he ki
1ye ki tum jin musibato me giraftaar the wo tumhaari bahot badi aazmaaish thi ki sabr karte ho ya nahi, aur
2ra matlab ye he ki tum par jo allah ta’ala ne inaam kiye ki tumhe firouniyo se naja’at di ye tumhaari aazmaaish thi ki kya tum ne’amato ka shukr karte ho ya nahi…??.
(roohul ma’ani, jild-6, safa-254)
(tafseere kabeer, jild-2, safa-66)
(tazkiratul ambiya alayhis salaam, safa-371, 372)

AAp ki peidaaish se pehle bani israaeel ke haalaat

Bani israaeel ki Hazrat musa Alaihis salam  ki peidaaish se pehle ye thi ki ye loug firouniyo ke khaadim the,
firouniyo ne unko mukhtelaf(alag alag) qism ke kaamo par muqarrar kiya huwa tha, kuchh lougo ko ta’amir ke kaamo par lagaya huwa tha aur kuchh lougo se hal chalaane ka kaam liya jata.
aur kuchh lougo se kheti-baadi ke mukhtelaf kaam liye jaate, fasl ki kaasht(kheti) aur kataai wageira ke kaamo par muqarrar the, gande kaamo par bhi unhe hi lagaya jata, beitul khalaa’a(toilet) ki safaai unhi lougo ke zimme thi, kichad, safaai wageira ke kaamo par unko hi muqarrar kiya jata, patther taraashna aur pattharo ko uthaa uthaa kar lana unhi ke zimme tha,
jo loug ye kaam nahi kar sakte the unpar jizya(tex) muqarrar kar diya jata tha aur jo shaksh suraj ke gurub(dubne/sunset) hone se pehle jizya(tex) na adaa karta uske haath uski gardan se baandh diye jaate.
aur ek mahina tak isi tarah bandhe rehte, aur bani israaeel ki aurato se is tarah kaam liye jaate jeise londiyo(gulaamo) se kaam liye jaate he
(yaani gharelu tamaam kaam unke supurd hote) soot ka tanaa aur silaai banaai wageira ke kaam un aurato se liye jaate the.
(tazkiratul ambiya alayhis salaam, safa-371)

 Hazrat musa Alaihis salam  ki peidaaish

Hazrat musa Alaihis salam  ki waalida par jab wilaadat ka waqt qarib huwa to aapke paas ek daaya aayi,
unme se jo firoun ne bani israaeel ki aurato ke liye muqarrar kar rakhi thi(jo aapki dost thi), jab Hazrat musa Alaihis salam  ki wilaadat hui to aapki dono aankh mubaarak ke darmiyaan se noor ki kirne zaahir ho rahi thi.
jinko deikhte hi daaya ka har jod kaanpne lagaa, uske dil me Hazrat musa Alaihis salam  ki mohabbat daal di gayi,
usne kaha ay aurat(ay is bacche ki maa) mei to ise qatl karne ke liye aayi thi lekin mujhe isse sadeed mohabbat ho chuki he,
isliye tu apne bacche ko mehfuz karle, wo daaya ye keh kar chali gayi, itne me firoun ke jaasus aapke darwaaze par pahonch gaye,
Hazrat musa Alaihis salam  ki bahen ne jaasuso ko aate hue deikh kar kahaa ay maa firouni aa rahe he, aapki maa ko kuchh samaj nahi aa raha tha ki kya kare,
housh wa hawaas jaate rahe, bacche ko darke maare kapde me lapeit kar jalte tannur(tandur) me daal diya,
jab firouni aapke ghar me daakhil hue to jalte tannur(tandur) ki taraf to na gaye aur ghar tamaam chhaan mara koi baccha nazar na aaya,
Hazrat musa Alaihis salam  ki waalida ko deikha to unke rang me bhi koi tabdili nazar na aayi (jo aam tour par aurato ka bacche ki peidaaish par rang pilaa(yellow) pad jata he)
aur aapka dhoodh bhi nazar na aane par puchha ki wo daaya tumhaare ghar kyu aayi thi..?? Aapne kaha wo meri dost thi jo mujhe milne aayi thi,
Jab firouni aapke ghar se nikal gaye to aapko housh aaya aur apni beiti se puchha baccha kaha gaya.
(yaani aapko ye bhi maalum nahi tha ki baccha kaha dala tha) beiti ne jawaab diya mujhe to kuchh pataa nahi, itne me tannur(tandur) se aahista aahista roune ki aawaz aayi.
to aapne deikha ki bacche par aaag thandi salaamat ho chuki he, unhone bacche ko tannur(tandur) se nikaal liya.
(tazkiratul ambiya alayhis salaam, safa-372, 373)

 Hazrat musa Alaihis salam  ko sanduq me rakhna

Quraane muqaddas me allah ta’ala irshaad farmata he
“aur hamne Hazrat musa Alaihis salam  ki maa ko ilhaam farmaya ki ise dhoodh pilaa fir jab tujhe isse andesha(dar) ho to ise dariya me daal de aur na dar aur na gam kar beshak ham use teiri taraf feir laayenge aur use rasool banaaenge”
(surah al qasas, aayat-7)
Hazrat musa Alaihis salam  ki peidaaish se pehle aapki waalida ke dil me ye baat daal kar yaqin karaa diya gaya tha ki peidaaish ke baad tum bacche ko dhoodh pilaati raho,
jab tumhe firoun ke jaasuso se khatra ho ya bacche ke roune wageira se padosiyo se tumhe khatra ho to bacche ko darya me daal do, ham us bacche ki hifaazat karenge aur tumhaari taraf louta deinge aur use rasool banaaenge,
Aap alayhis salaam ki waalida ne aapko darya me daal ne se pehle kitni muddat(waqt) dhoodh pilaya iske baare me ek qoul ye he ki
‘beshak aap 4 maah(mahine) baad roye to padosiyo wageira ke khatre ke peishe nazar aapko daryaa-e-neel me daal diya gaya’.
Aap alayhis salaam ki waalida ko jab ye fikr hui ki firoun bacche ki talaash me puri jaddo-jahad kar rahaa he to aapne bacche ko sanduq me daal kar daryaa me daalne ka feishla kar liya.
kyunki allah ta’ala ne unke dilme pukhta baat daal di thi ki is tarah baccha mehfuz rahega aur ek din unhe waapis mil jaayega,
Aap alayhis salaam ki waalida ek najjar(carpenter) ke paas gayi taaki usse ek sanduq haasil kare usne puchha tumne lakdi ke sanduq ko kya karna he.
to aapne sach sach bataa diya ki apne beite ko isme daal kar daryaa me daalna he, ho sakta he firouniyo se bach jaaye,
sanduq usne aapko beich diya lekin uske dilme bad-niyyati peida ho gayi, wo firouni lougo ke paas gaya.
jo baccho ko zabah karne par muqarrar the ki unhe bata sake, jab wo unke paas aaya to allah ta’ala ne uski zabaan ko band kar diya,
wo haath se ishaare kar raha tha, un lougo ne use(paagal samajh kar) mara aur bhagaa diya jab wo waapas apne ghar me pahoncha to allah ta’ala ne uski zabaan ko uspar fir louta diya,
fir wo dusri martaba un lougo ki taraf gayaa taaki unhe bataa sake fir uski zabaan band ho gayi,
fir haatho se ishaare karne ki wajah se unhone use mara aur use ghar louta diya, fir uski zabaan thik ho gayi,
fir tisri martaba unhe bataane ke liye gayaa to uski zabaan bhi bandh ho gayi aur andha ho gaya, fir uski pitaai hui aur use waapas bhagaa diya gaya,
ab wo sacche dil se touba karne laga ay allah ta’ala agar tu mujhe meri nazar aur zabaan de de to mei kisi ko nahi bataaunga, allah ta’ala ne uski touba ko qabul farma liya aur use zabaan aur nazar de di, Hazrat musa Alaihis salam  ki waalida ne Hazrat musa Alaihis salam  ko sanduq me daal kar daryaa ke hawaale kar diya.
(tazkiratul ambiya alayhis salaam, safa-372, 373, 374)

 Hazrat musa Alaihis salam  ka firoun ke paas tashreef lana

Quraane majeed me he ki
“to use uthaa liya firoun ke gharwaalo ne ki wah unka dushman aur unpar gam ho beshak firoun aur haamaan aur unke laskar khataakaar the,
aur firoun ki zouja(biwi) ne kahaa yah baccha meiri aur teiri aankho ki thandak he ise qatl na karo shaayad yah hame nafa’a de ya ham ise beita banaa le aur wo be-khabar the”
(surah al qasas, aayat-8, 9)
Firoun ki sirf ek beiti thi aur uski koi aulaad na thi, wo apni beiti se bahot zyaada mohabbat kiya karta tha,
wo bhi har rouz apne baap ke paas 3 haajaat(zarurat) peish karti thi, wo bahot zyaada barsh(kodh) ki bimaari me mubtilaa thi, firoun ne iske baare me tabibo
aur jaadugaro se mashwaraa kiya, unhone kahaa ay baadshah ye us waqt tak thik nahi ho sakti jab tak daryaa me se ek insaan ke mushaaba koi chiz na paayi jaaye aur uska loaab(thook) lekar iske barsh waale maqaamaat par mali jaaye.
fir ye thik ho jaayegi aur ye us waqt hoga jab falaa din aur falaa mahina ho aur suraj khub roushan ho,
jab wahi din aagaya to firoun ne daryaa ke kinaare par mehfil sajaai uske saath uski zouja(biwi) aaasiyaa binte mazaaham bhi thi(firoun ki zouja bahot neik aurat thi,
ambiya alayhis salaam ki nasl se thi, garibo aur miskino par raham karti thi) firoun ki beiti bhi apni londiyo(gulaamo) ke saath daryaa ke kinaare par jaa kar beith gayi,
daryaa-e-neel se ek naher firoun ke mahlaat ki taraf aai hui thi, usme firoun ki beiti aur uski londiya(gulaam) nahaane lagi,
unhone deikha ek taabut daryaa ki moujo me hichkole khaa rahaa he jo ek darakht(peid) ke saath aakar ruka he, firoun ne hukm diya ki jaldi se wo taabut meire paas laya jaye, kashti waale lougo ne jaldi se wo taabut firoun ke paas peish kar diya,
Unhone koshis ki ke usko khoule, wo kaamyaab na hue, fir todna chaha lekin todne me bhi kaamyaab na hue, firoun ki zouja(biwi) aaasiyaa ko us taabut ke andar ek noor chamakta huwa nazar aaya.
jo dusro ko dikhaai na diya, jab aaasiyaa ne taabut ko khoulna chaha to khoul liya, jisme ek chhota sa baccha tha, jiski aankho ke darmiyaan ek noor chamak raha tha,
allah ta’ala ne lougo ke dilo me us bacche ki mohabbat daal di, firoun ki beiti ne us bacche ka luaab(thook mubaarak) lekar jab apne barsh waale maqaamaat par lagaaya.
to wo usi waqt thik ho gayi, usne bacche ko sine se lagaya, firoun ko kuchh lougo ne kahaa ki ye wahi baccha na ho jis se ham bachna chaahte he tumhaare darki wajah se use daryaa me feink diya gaya hoga,
firoun ne ye soon kar bacche ko qatl karne ka iraada kar liya lekin firoun ki zouja(biwi) aaasiyaa ne bacche ki bakhshish talab ki aur firoun ko kahaa ki ye baccha pataa nahi kis sar-zameen se aaya he tumhaare liye khatra isi mulk ka baccha hoga,
ye kitna pyaara baccha aur khubsurat he, ye to beita banaane ke qaabil he, ise qatl nahi karna hamaara koi beita nahi he is liye ham ise apna beita banaa leinge,
aaasiyaa ki ye baat firoun aur uski qoum ke lougo ne tasleem karli, allah ta’ala ne Hazrat musa Alaihis salam  ko qatl hone se bachaa liya,
Ek qoul me he ki Hazrat musa Alaihis salam  ki aankh mubaarak me aysi malaahat, khubsurati aur nooraaniyat rakhi gayi thi ki jo bhi aapko deikhta wahi aapse mohabbat karne lagta.
(tafseere roohul ma’ani, jild-9, hissa-1, safa-189)(tafseere kabeer, jild-22, safa-53)(tazkiratul ambiya alayhis salaam, safa-374, 375)
Subhanallah…
Allah ta’ala ne Hazrat musa Alaihis salam  ko qatl hone se bachaa kar apni qudrat dikhaa di ki jis bacche ko khatm karne ki garaz se tumne hazzaro bacche zabah karaa diye ise meine tumhaare paas pahoncha diya he lekin tum use na zabah12 be amal alim or ilm by hadise nabawi se kar sake aur na hi kar sakoge.
Hazrat isa Alaihis salam   story in hindi mojizat
Bani israel par allah ka azab in hindi 14

Hazrat musa alayhis salaam”  or firon

Hazrat musa alayhis salaam”ki waalida aur bahen ki be-qaqaari :
Quraane hakeem me he ki
“aur subah ko Hazrat musa Alaihis salam  ki maa ka dil besabr ho gaya zarur qarib tha ki wah uska haal khoul deiti agar ham dhaaras na bandhaate uske dil par ki use hamaare waade par yaqin rahe,
aur uski maa ne uski behan se kahaa uske pichhe chali jaa to wah use door se deikhti rahi aur unko khabar na thi”
(surah al qasas, aayat-10, 11)
Hazrat musa alayhis salaam”  ki waalida ko jab ye khabar mili ki baccha firoun ke haath aagaya to aapko bahot zyada khouf huwa ki kahi qatl na karde yaa ye ki aapko jab ye khabar mili ki firoun ke haath taabut aagaya.
he to aapke housh ud gaye lekin allah ta’ala ne aapke dil me fir ilqaa’a kiya(dil me daal diya) ki firoun ki biwi ne musa alayhis salaam ko apna beita banaa liya to aapke dil ko tasalli hui.
agar allah ta’ala aapke dil ko dhaarash na bandhaata to ho sakta he ki aap daryaa me feinkte waqt waaveilaa shuru kar deite ki haay meira bacch. haay meira baccha…ki pukaar se loug khabardaar ho jaate.
yaa aapko jab ye khabar mili ki firoun ki zouja aaasiyaa bacche par maherbaan ho gayi us waqt aap khushi se zaahir kar deiti ki meire bacche ko allah ta’ala ne bachaa liya he lekin allah ta’ala ne aap ko zaahir karne se door rakhaa,
Hazrat musa Alaihis salam  ki bahen ka naam ‘maryam’ tha, ‘kulshum’ aur ‘kulsuma’ bhi bayaan kiyaa gaya he magar mashoor ‘maryam’ he,
Aapki waalida ne maryam ko kahaa ki jaao deikho taabut kidhar gaya, kya waaqei firoun ke haath aagaya he.. Unhone bacche se kya suluk kiya.. Maryam door door se deikhti rahi taaki unhe pataa na chal sake.
note :-
Hazrat isa alayhis salaam ki waalida ka naam ‘maryam’ alayhis salaam tha aur unke waalid ka naam ‘imraan’ tha,
Hazrat musa Alaihis salam  ki sagi bahen ka naam bhi ‘maryam’ he aur aapke waalid ka naam bhi ‘imraan he’ baaz hazraat ne waham kiya he.
ki hazrat isaa alayhis salaam ki waalida Hazrat musa Alaihis salam  ki bahen thi, ye galat he in dono ambiya e kiraam ke darmiyaan zamaane ke aytebaar se bahot badaa faaslaa he.
(tazkiratul ambiya alayhis salaam, safa-376)

Hazrat musa alayhis salaam”  ka dhoodh na pinaa

Quraane majeed me allah ta’ala irshaad farmata he
“aur hamne pehle hi sab daaiyaa uspar haraam kar di thi to boli kya mei tumhe bataadu ayse gharwaale ki tumhaare is bacche ko paal de aur wo iske kheir-khwaah he,
(surah al qasas, aayat-12)
Allah ta’ala ne Hazrat musa Alaihis salam  ki tabi’at me apni maa ke dhoodh ke bageir tamaam dhoodh pilaane waali aurato se nafrat peida kar di thi,
firoun ne bacche ki parwarish ke liye daaya bulaane ka hukm diya, jo daaya bhi aati aap alayhis salaam uska dhoodh na pite lekin bhook ki wajah se be-karaar ho rahe the , firoun bhi apni zouja aaasiyaa ki wajah se bacche ki haalat se fikr-mand tha, bacche ko goud me lekar tasalliya de raha tha,
aur keh rahaa tha ki kaash koi aysi daaya mil jaaye jiska dhoodh ye baccha pinaa shuru kar de, is mouqe ko ganimat samajhte hue Hazrat musa Alaihis salam  ki bahen ne kahaa me tumhe ek ghar waalo ka pataa bataati hu.
jo is bacche ki tarbiyat me koi kami nahi hone deinge, jo iski parwarish ki zamaanat deinge, kisi qism ki khayaanat ke murtakib nahi honge, khulush se sab kaam karenge, koi nuqsh laazim nahi aane deinge, aur wo iske kheir-khwaah he,
Jab hazrat “Hazrat musa alayhis salaam”  ki bahen ne ye kahaa ki wo iske kheir-khwaah he to haamaan(wazir) ne kahaa ki ye is bacche ke khaandaan ko jaanti he.
ise pakad lo to khud bacche ke gharaane ka pataa chal jaayega, us waqt Hazrat musa Alaihis salam  ki bahen ne kahaa meira matlab ye he.
ki us gharaane ke loug baadshah ke kheir-khwaah he, chunki wo(Hazrat musa Alaihis salam  ki bahen) khaandaane nabuwwat ki ladki thi uski zahaanat (intelligence)
isi qaabil thi ki usne nihaayat haseen jawaab de kar apne aap ko aur apne bhai ko bachaa liya, uska ye jawaab soon kar firoun ne kahaa achha tum us aurat ko le aao jis ke muta’alaq tum keh rahi ho, wo apni maa ke paas aayi aur unhe le gayi.
(tazkiratul ambiya alayhis salaam, safa-377)

 Hazrat musa Alaihis salam  ka apni waalida ke paas aana

Quraane kareem me allah subhaanahu wa ta’ala irshaad farmata he
“to hamne use uski maa ki taraf feira ki maa ki aankh thandi ho aur gam na khaaye aur jaan le ki allah ta’ala ka wada saccha he lekin aksar loug nahi jaante”
(surah al qasas, aayat-13)
Hazrat musa Alaihis salam  firoun ke haatho me the, bhuk aur pyaas ki wajah se be-qaraar the, firoun aapko tasalliya de raha tha,
jabhi aap alayhis salaam ki waalida pahonchi to maa ki khushbu sungh kar fouran maa ki taraf lapke aur dhoodh pina shuru kar diya,
firoun ne bade ta’ajub se puchha tum koun ho..?? Is bacche ne tumhara dhoodh pasand kiya haalaanki kitni daaiya hamne talab ki kisi ka dhoodh isne nahi piyaa,
Aap alayhis salaam ki waalida ne jawaab diya
“beshak me aysi aurat hu ki mujh se khushbu aati he yaani mei apne aapko saaf-suthraa rakhti hu,
meira libaas saaf-suthraa hota he, mei achhe qism ki khushbu istemaal karti hu aur qudrati khushbu bhi meire jism se aati he meira dhoodh bhi paakiza, achha,
khush-zaaiqa aur khushbudaar he, aaj tak meine jis bacche ko dhoodh pilaya usne zarur meira dhoodh piya he”,
Firoun ne Hazrat musa Alaihis salam  ko aapki waalida ke supurad(hawaale) kar diya aur unka kharch bhi muqarrar kar diya,
Allah ta’ala ne aapke dilme ek wada dala tha ki tum is bacche ko daryaa me daal do mei tumhaare paas ise waapis louta dunga,
us wade ko allah ta’ala ne puraa farmaya taaki aapki waalida ko yaqin ho jaaye ki jab ye wada puraa ho gaya he to ye baccha rasool bhi zarur banega,
aksar loug allah ta’ala ki qudrat aur uski hikmat se be-khabar he wo ye nahi jaante ki uski qudrat ke muqaabil tamaam tadbeere kuchh heishiyat nahi rakhti.
(roohul ma’ani, jild-11, safa-50, 51)
(tafseere kabeer, jild-24, safa-205)
(tazkiratul ambiya alayhis salaam, safa-377, 378)
Hazrat musa alayhis salaam” ki mukammal waqiya in hindi urdu

Hazrat musa alayhis salaam” ka radd e baatil shuru karna

Hazrat musa alayhis salaam” apni waalida ke paas dhoodh pine ke zamaane tak rahe, dhoodh chhut ne ke baad aapki waalida Hazrat musa Alaihis salam  ko firoun ke paas le aayi aur aap alayhis salaam waha palte rahe,
Hazrat musa Alaihis salam  ko roz e awwal se hi apni waalida ke paas rehne aur unki baate sunne ka mouqa mil gaya tha, saari surate haal(haqiqat) se aap alayhis salaam achhi tarah aagah ho gaye,
aap alayhis salaam ko apne jaleelul qadr aaabaa’a-ajdaad(baap-dada) ke mansabe nabuwwat par aagaahi ho chuki thi, aap alayhis salaam ne jab deikha ki firoun khuda ban beitha he.
aur lougo se apni parastish(pujaa) karaata he to aapka touhid-parast zahan us shirk ko zyada arsha gawara na kar saka aur aap alayhis salaam ke jalaal mizaaj ne firoun ko us na-pasand harkat par tokaa aur aapne firoun.
aur firouniyo ki gumraahi ka radd shuru kar diya, bani israaeel aapki baat sunte aur aapki itteba karte aahista aahista iska charcha ho gaya,
firoun ko bhi baraah-raast(direct) khudaai da’we se touk chuke the, is liye qate ta’aluq(ta’aluq todne) tak nabuwwat jaa pahonchi aur aap alayhis salaam ko mujrim aur baagi samjha jaane laga.
(maazallah..), chunanche uske shar se apne aapko mehfuz karne ke liye rupush(chhup) ho gaye aur agar kisi zaruri kaam ke liye aapko shahar me aana padta to ayse waqt shahar me aate ki kaano kaan kisi ko khabar na hoti,
Ek qoul me he ki aap alayhis salaam ke shahar me chhip kar daakhil hone ki wajah ye he ki Hazrat musa Alaihis salam  ne firoun ke saath ikhtelaaf ko zaahir farma diya aur firouniyo ke buto aur firoun ki ibaadat ki mazammat ki to unki taraf se sadeed radd-e-amal huwa jiski wajah se aap alayhis salaam ne apne aapko mehfuz karne ke liye poshida(chhipe) rehne ki raah ikhtayaar ki.
(tafseere qurtubi, jild-7, safa-260)
(tazkiratul ambiya alayhis salaam, safa-378, 379)

Hazrat musa alayhis salaam” ka qibti ko ghunsaa(mukka) maarna

Quraane majeed me he ki
“aur us shahar me daakhil huwa jis waqt shahar waale dophar ke khwaab me be-khabar the to usme 2 mard ladte paaye ek Hazrat musa Alaihis salam  ke giroh se tha.
aur dusra uske dushmano se to wah jo uske giroh se tha usne musa(alayhis salaam) se madad maangi us par jo uske dushmano se tha.
to Hazrat musa Alaihis salam  ne use ghunsaa mara to uska kaam tamaam kar diya kahaa yah kaam seitaan ki taraf se huwa beshak wah dushman he khulaa gumraah karne wala,
arz ki ay meire rabb meine apni jaan par ziyaadati ki to mujhe bakhsh de to rabb ne use bakhsh diya beshak wahi bakhshne wala maherbaan he, arz ki ay meire rabb jeisaa tune mujpar ahesaan kiya to ab hargiz mei mujrimo ka madadgaar na hunga”
(surah al qasas, aayat-15, 16, 17)
Jab Hazrat musa Alaihis salam  shahar me daakhil hue to deikha ki 2 aadmi aapas me dast wa girebaan he ek israaeeli aur dusra qibti,
israaeeli ne aap alayhis salaam ko madad ke liye pukara, aap alayhis salaam aage badhe ki qibti ko dast daraazi(ladne) se manaa kiya,
aap alayhis salaam ne qibti se kaha ki israaeeli par zulm na karo, use chhod do, lekin wah na mana aur bura bhalaa kehne lagaa.
to Hazrat musa Alaihis salam  ne usko us zulm se rokne ke liye ghunsaa(mukka) mara, use qatl karne ka iraada na tha lekin wo mukka jaan-leiwa saabit huwa aur uska qissa tamaam ho gaya(yaani wah mar gaya),
Ek qoul me un 2no ke ladne ki wajah bayaan ki he ki wo qibti israaeeli ko lakadiyo ka ek bhaari gattha(lakdi ka bouj) uthaane ka hukm de raha tha usne uthaane se inkaar kar diya,
chunanche us qibti ne haakim qoum ka fard hote hue zabardasti shuru ki, itne me Hazrat musa Alaihis salam  tashreef laaye aur israaeeli ne aap alayhis salaam se faryaad ki aur Hazrat musa Alaihis salam  ne uski fariyaadrasi ki,
mahaz is liye nahi ki fariyaad karne wala israaeeli tha balki uski wajah ye thi ki har mazlum ki madad karna har deen me farz he,
(tafseere qurtubi, jild-7, safa-260)(tazkiratul ambiya alayhis, safa-379)

 qatl ka raaz zaahir hona

Quraan shareef me he ki
“to subah ki us shahar me darte hue intezaar me ki kya hota he jabhi deikha ki wah jisne kal unse madad chaahi thi fariyaad kar rahaa he Hazrat musa Alaihis salam  ne usse farmaya beshak tu khulaa gumraah he,
to jab Hazrat musa Alaihis salam  ne chaha ki us par giraft kare jo un douno ka dusman he wah bola ay Hazrat musa Alaihis salam  kya tum mujhe veisaa hi qatl karna chaahte ho.
jeisaa tumne kal ek shaksh ko qatl kar diya tum yahi chaahte ho ki zamin me shakhtgir bano aur islaah karna nahi chaahte”
(surah al qasas, aayat-18, 19)
Firoun ki qoum ke lougo ne firoun ko khabar di ki kisi bani israaeeli ne hamaare ek aadmi ko maar dala he us par firoun ne kahaa ki.
qaatil aur gawaaho ko talaash karo, firouni gast karte firte the aur unhe koi saboot nahi mila tha,
dusre din jab Hazrat musa Alaihis salam  ko fir ittefaaq peish aaaya ki wahi bani israaeel jisne ek din pehle unse madad chaahi thi aaj bhi fir ek firouni se lad rahaa tha aur Hazrat musa Alaihis salam  ko deikh kar unse fariyaad karne lagaa tab Hazrat musa Alaihis salam  ne farmaya beshak tu khulaa gumraah he yaani har rouz lougo se ladta hi rahta he,
apne aapko bhi musibat aur pareshaani me daalta he aur apne madadgaaro ko bhi aur ahtiyaat kyu nahi karta, aap alayhis salaam ne khub daant ke tour par irshaad farmaya,
Fir Hazrat musa Alaihis salam  ko us par rahem bhi aagaya ki firouni bade zaalim he,
lihaza uski imdaad karni hi chaahiye, jab aap alayhis salaam aage badhe ki apne aur bani israaeeli ke dushman ki gifat kare.
to us bani israaeeli ne galat-fehmi me khouf karte hue samjha ki aaj shaayad meira kaam tamaam karna chaahte he kaha ki ay Hazrat musa Alaihis salam  aaj tum mujhe qatl karna chaahte ho jeise kal ek shaksh ko tumne qatl kar diya tha…?,
Uska ye kehna hi tha ki raaz khul gaya ki kal firouni ko qatl Hazrat musa Alaihis salam  ne kiya he, jab firoun ko ye khabar mili to usne Hazrat musa Alaihis salam  ko qatl karne ka hukm naafiz kar diya loug aapko talaash karne lage.
(tafseere khzaainul irfaan, safa-465)(tazkiratul ambiya alayhis salaam, safa-381)

 “Hazrat musa alayhis salaam” ka madyan ki taraf hijrat karna

Quraane hakeem me he ki
“to us shahar se nikle darte huwe is intezaar me ki ab kya hotaa he arz ki ay meire rabb mujhe sitamgaaro (zaalimo) se bachaa le, aur jab madyan ki taraf mutawajjeh huwe kahaa qarib he ki meira rabb mujhe sidhi raah bataaye”
(surah al qasas, aayat-21, 22)
Madyan se muraad wo shahar he jahaa hazrat shoaib alayhis salaam tashreef farmaa the, us shahar ko madyan bin ibhraahim ki taraf mansub kiya gaya tha, misr aur madyan me 8 dino ki doori thi,
is shahar par firoun ki hukmuraani nahi thi, isi wajah se allah ta’ala ne aap alayhis salaam ko ishi shahar ki taraf jaane ki hidaayat di, Hazrat musa Alaihis salam  ne ye shahar is se pehle kabhi na deikha tha.
aur na hi iska raasta jaante the, koi sawaari paas nahi thi raaste ka koi kharch apne paas nahi tha, sirf darakhto ke patto par guzar kar ke aap alayhis salaam ne raaste ki doori ko tay kiya,
raasta dikhaane ke liye allah ta’ala ne jibrail alayhis salaam ko muqarrar farmaya, firouni loug aapko talaash karte rahe lekin aap alayhis salaam ko talaash na kar sake.
kyunki madyan ko jaane waale 3 raaste the aap alayhis salaam ne darmiyaani raah ko ikhtayaar kiya aur wo dusre raasto par aapko talaash kar rahe the, jab rabb ta’ala aap alayhis salaam ki hifaazat kar rahaa tha to wo aapko talaash kar bhi keise sakte the…?
(tafseere roohul ma’ani, jild-11, hissa-1, safa-59)
(tazkiratul ambiya alayhis salaam, safa-382)
Bani israel par allah ka azab in hindi 14

Hazrat musa Alaihis salam  ka waqiya in hindi 5 Hazrat musa Alaihis salam  ko khabar deina

Quraane paak me he ki

“aur shahar ke parle kinaare se ek shaksh doudta huwa aaya kahaa ay musa(alayhis salaam) beshak darbaar waale aapke qatl ka mashwara kar rahe he to nikal jaaiye mei aapka kheir-khwaah(bhalaa chaahne wala) hu”
(surah al qasas, aayat-20)
Hazrat musa Alaihis salam  ko khabar deine wala ki wo darbaari loug (firouni darbaari) aapke qatl ka mashwara kar rahe he.
aur firoun ne tumhe qatl karne ka feishla bhi kar diya he wo shaksh aaale firoun se tha, jo momin tha lekin imaan ko chipaata tha.
(tazkiratul ambiya alayhis salaam, safa-381)

 Hazrat musa Alaihis salam  aur hazrat shoaib alayhis salaam ki mulaaqaat :

Quraane hakeem me he ki
“to un dono me se ek uske paas aayi sharm se chalti hui boli meira baap tumhe bulata he ki tumhe ujrat de uski jo tumne hamaare jaanwaro ko paani pilaya he jab uske paas aaya aur use baate kah sunaai usne kahaa dariye nahi aap bach gaye zaalimo se”
(surah al qasas, aayat-25)
Wo dono ladkiya hazrat shoaib alayhis salaam ki beitiya thi, jab wo jaldi apne ghar lout kar aagayi.
to unke waalid ne puchha ki aaj tum itni jaldi keise aa gayi ho… To unhone bataya ki aaj kunwe par ek neik aur bahaadur shaksh tha.
jisne hamaari bakariyo ko paani pilaaya is liye ham jaldi waapish aagaye he ki hame tamaam lougo ke faarig(free) hone aur baaqi bach jaane waale paani ka intezaar nahi karna padha,
Hazrat shoaib alayhis salaam ne farmaya ki jaao aur us shaksh ko bulaa kar laao…
Us aurat ne Hazrat musa Alaihis salam  ko kahaa ki aap ko meire waalid bulaa rahe he taaki tumhe ujrat(mazduri) ataa kare jo tumne hamaare jaanwaro ko paani pilaya he, aap alayhis salaam ne is baat ko na-pasand kiya ki ujrat leine ke liye mei jaau,
Hazrat musa Alaihis salam  ujrat leine par to raazi na hue lekin hazrat shoaib alayhis salaam ki ziyaarat aur unki mulaaqaat ke iraade se chale.
aur un khaatun(aurat) se farmaya ki aap meire pichhe rah kar raasta bataati jaaiye, yah aap alayhis salaam ne parde ke ehtemaam ke liye farmaya
aur is tarah tashreef laaye, jab Hazrat musa Alaihis salam  hazrat shoaib alayhis salaam ke paas pahunche to khaana haazir tha, hazrat shoaib alayhis salaam ne farmaya bethiye khana khaaiye.. Hazrat musa Alaihis salam  ne manzur na kiya aur “auzobillah(allah ki panaah) farmaya…
Hazrat shoaib alayhis salaam ne puchha tumne ye kyu kaha…??
Aap alayhis salaam ne jawaab diya
Hamaare gharaane ke loug apne deen ko duniya ke badle nahi beichte aur kisi bhalaai ki koi qimat nahi liya karte,
(yaani yah khana meire us kaam ka badla na ho jo meine aapke jaanwaro ko paani pilaa kar anzaam diya he, kyunki ham wo loug he ki achhe kaam par ujrat qabul nahi karte)
Hazrat shoaib alayhis salaam ne farmaya (yah khana aapko kaam ke badle me nahi balki) meri aur meire aaaba wa ajdaad(baap-daada) ki aadat he ki ham mehmaano ko khana khilaate he…
Is farmaan par Hazrat musa Alaihis salam  beithe aur khaana khaya,
Khana khaane ke baad hazrat shoaib alayhis salaam ne puchha koun ho aur kahaa se aaye ho…??
Aap alayhis salaam ne bataya mei musa bin imraan bin qaahas bin laawi bin yaaqub hu, fir aap alayhis salaam ne apna puraa waaqiya bayaan kiya,
baccho ka qatl kiya jana aapko darya me daal deina aur daya ka talab karna, aapka apni waalida ke paas parwarish pana,
qibti ka qatl hona aur firouniyo ka aap ko talaash karna, tamaam waaqiya sunne ke baad hazrat shoaib alayhis salaam ne farmaya
Khof zaalimo se tumhe naja’at mil sakti he’..
Yaani hamaare ilaaqe par firoun ki hukumat nahi he.
(tazkiratul ambiya alayhis salaam, safa-383, 384, 385)

 Hazrat musa Alaihis salam  madyan ke kunwe par

Quraane majeed me he ki
“aur jab madyan ke paani par aaye wahaa lougo ke ek giroh ko deikha ke apne jaanwaro ko paani pilaa rahe he aur unse us taraf do(2) aurate deikhi ki apne jaanwaro ko rok rahi he.
Hazrat musa Alaihis salam  ne farmaya tum dono ka kya haal he wo boli ham paani nahi pilaate jab tak sab charwaahe pilaa kar feir na le jaaye.
aur hamaare baap bahut budhe he, to Hazrat musa Alaihis salam  ne un dono ke jaanwaro ko paani pilaya fir saaye ki taraf fira arz ki ay meire rabb me us khaane ka jo tu meire liye utaare mohtaaz hu”
(surah al qasas, aayat-23, 24)
Jab Hazrat musa Alaihis salam  madyan ke ek kunwe par pahonche to deikha ki loug kaseer(zyada) miqdaar me kunwe par jamaa he.
jo apne apne jaanwaro ko paani pilaa rahe he, koi unto ko paani pilaa raha he, koi gaay-bhens ko aur koi bheid-bakariyo ko lekin deikha ki 2 aurate ek taraf apne jaanwaro ko rouk kar khadi he,
wo ye nahi chaahti ki taklif karke aage badhe(unke nazdik lougo se paani haasil karne me taklif karna jahaa buri baat thi wahaa aurato ka mardo se aaazadana meil-joul aur dhakka-baazi haraam thi),
wo apni kamzori ki wajah se door khadi thi ki kunwe se paani nikaalna zouraawar (taaqatwar) mardo ka kaam tha,
is par istemaal hone waale doul(bucket) ko 10 aaadmi mil kar nikaalte the aur kunwe ke moonh par ek patther rakh diya jata tha use dhaankne ke liye aur hataane ke liye 10 aaadmi mil kar hataate,
niz wo(aurate) ye bhi na chaahti thi ki unke jaanwar dusre lougo ke jaanwaro se mil jaaye ki unhe alag alag karne me dushwaari (mushkeli) ho,
in wajah ke peishe nazar wo apne jaanwaro ko alag ek taraf rouk kar khadi thi, lougo ke faarig(free) ho kar chale jaane ka intezaar kar rahi thi,
Hazrat musa Alaihis salam  ne un dono aurato se puchha ki tum ek taraf apne jaanwaro ko rouk kar kyu khadi ho…??
To unhone bataya ki hamaare baap bahot budhe he ham khud paani nikaal nahi sakte is liye ek taraf khade rehte he ki loug apne jaanwaro ko paani pilaa kar chale jaaye.
to jo paani houz me bach jaaye wo ham apne jaanwaro ko pilaa le, Hazrat musa Alaihis salam  ne lougo ko un par rahem karne ke liye kahaa.
lekin unhone ne kaha ki agar tum itne ham-dard ho to khud hi pilaado ye kehte hue unhone mil kar bhaari patther kunwe ke moonh par rakh diya,
Hazrat musa Alaihis salam  ne akele hi us patther ko hataa diya aur 10 aaadmiyo ke nikaalne waale doul(bucket) ko akele hi nikaal liya aur barkat ki duaa ki aur unki bakariyo ko paani ke qarib kiya, wo ek hi doul(bucket) se paani pi kar seiraab ho gayi,
Fir Hazrat musa Alaihis salam  ek taraf saaye me beith gaye aur allah ta’ala ki baargaah me arz ki ay allah mujhe khana ataa farmaa de kyunki aap alayhis salaam 7 dino se sirf darakhto ke patte hi khaa rahe the.
(tafseere kabeer, jild-24, safa-202)
(roohul ma’ani, jild-11, hissa-1, safa-64)
(tazkiratul ambiya alayhis salaam, safa-383)
Subhanallah…
Nabi ki shaano azmat ka anzdaza kijiye ki 7 dino se bhuke lekin 10 aaadmiyo se badh kar zour bhi moujud he, safar ki thakaan bhi aur shakht tapti dhup me, lekin koi chiz bhi rukaawat na ban saki, ham-dardi ki ek azeem misaal qaayam kardi…

 hazrat shoaib alayhis salaam ki musa alayhis salaam ko shaadi ki peishkash

Quraane kareem me he ki
“kahaa mei chaahta hu ki apni dono beitiyo me se ek tumhe biyaah du is mehar par ki tum 8 baras meiri chaakri karo fir agar pure 10 baras karlo.
to tumhaari taraf se he aur mei tumhe mashakkat me daalta nahi chaahta qarib he inshaallah tum mujhe neiko me paaoge,
Hazrat musa Alaihis salam  ne kaha yah meire aur aapke bich iqraar ho chuka mei in dono me jo miaad puri kardu to mujh par koi mutaalba(maang) nahi aur hamaare is kahe par allah ka zimma he”
(surah al qasas, aayat-27, 28)
Hazrat musa Alaihis salam  ka nikah hazrat shoaib kin beti se huwa tha
Hazrat shoaib koi beita nahi tha is liye aap Hazrat musa Alaihis salam  ko saath rakhna chaahte the,
lihaza aapne munaasib samjha ki ek beiti ka nikaah is neik shaksh se kar diya jaaye, Hazrat musa Alaihis salam  ne Hazrat musa Alaihis salam  se mashwara liya.
ki agar tumhaara nikaah in 2 beitiyo me se ek se kar diya jaaye to kya tum mehar ke badle 8 saal tak hamaari khidmat kar sakoge..??
Yaani 8 saal to tum par waajib honge mazeed 2 saal khidmat karna mustahab hoga wo tumhaari marzi par he,
Hazrat musa Alaihis salam  ne ise qabul kar liya aur arz kiya ki in 2 muddato me se jo bhi mei puri karlu mujhe yahaa rehne par mazbur na kiya jaaye,
is tarah dono ke darmiyaan ma’ahida(agreement) tay ho jaane ke baad nikaah ho gaya aur Hazrat musa Alaihis salam  ne mehar adaa karne ke liye.
hazrat shoaib alayhis salaam ke ghar baheshiyat daamaade khidmat karni shuru kardi, hazrat shoaib alayhis salaam ne Hazrat musa Alaihis salam  ko bakariyo ko haakne aur unhe darakhto ke patte jhaad kar khilaane ke liye
Ek asaa diya jo saagoun ke darkht(peid) ki lakdi ka banaa huwa tha jo hazrat aadam alayhis salaam saath laaye the.
aur fir ambiya e kiraam se muntaqil hota huwa hazrat shoaib alayhis salaam tak pahoncha tha, ab musa alayhis salaam ke paas aagaya yahi asaa baad me aapka mo’ajiza ban gaya.
(tafseere madaarik bahawaala tafseere jalaalein, safa-329)
(tazkiratul ambiya alayhis salaam, safa-386, 387)

 Hazrat shoaib alayhis salaam ko beiti ka mashwara :

Quraane hakeem me he ki
“unme ki ek boli ay meire baap inko noukar rakhlo beshak behtar noukar wah jo taaqatwar amaanatdaar ho”
(surah al qasas, aayat-26)
Chunki shoaib alayhis salaam ki beiti Hazrat musa Alaihis salam  ki bahaaduri ko deikh chuki thi ki 10 aaadmiyo ke nikaalne waale doul(bucket) ko aap alayhis salaam ne akele hi nikaal liya.
aur bhaari patther ko akele hi kunwe ke moonh se hataa diya aur aapke taqwe ko bhi deikh chuki thi ki unse sawaal karne me aap alayhis salaam ki nigaahe nichi thi.
aur unke saath chalte hue bhi yahi kahaa ki tum pichhe pichhe chalo mei aage chalta hu tum mujhe pichhe se raasta bataati aana,
Hazrat shoaib alayhis salaam ki beiti ne mashwara waalid se hi kiya kyunki aap jaanti thi ki hamaare waalid apni shariyat ke mutaabiq kisi shaksh ko apne paas rakh kar usse batoure mahar khidmat le kar hamaara nikaah usse karna he.
(tazkiratul ambiya alayhis salaam, safa-385, 386)
Hazrat musa Alaihis salam  hazrat shoaib alayhis salaam ke paas kitni muddat tak rahe..? :-
Bani Israaeel :-Hazrat musa Alaihis salam  ne in dono me se konsi muddat puri ki uske baare me he ki Hazrat musa Alaihis salam   ne aksar muddat yaani 10 saal mukammal khidmat ki thi(kyunki 8 saal to waajib the aur upar 2 saal mustahab the jo paakiza aur zyada sawaab ka zariya the is liye aap alayhis salaam ne zyada sawaab waali muddat ko bhi yaqinan puraa kiya) aur allah ta’ala ka rasool jo kehta he us par amal karta he.
(roohul ma’ani, jild-11, safa-71)
(tazkiratul ambiya alayhis salaam, safa-387)

Hazrat musa Alaihis salam  tuwaa me

Quraane azeem me allah ta’ala irshaad farmata he
“fir jab aaag ke paas haazir huwa pukaar ki gayi meidaan ke daaye kinaare se barkat waale maqaam me peid se ki ay musa beshak mei hi hu allah, rabb saare jahaa ka”
(surah al qasas, aayat-30)
Ek aur jagah irshaad farmata he
“ay musa, beshak mei teira rabb hu to tu apne jute utaar daal beshak tu paak jangal tuwaa me he”
(surah taahaa, aayat-12)
Hazrat musa Alaihis salam  aaag ke azeeb manzar ki soch me gum the ki aap alayhis salaam ko aaawaz di gayi
“ay musa, beshak mei teira rabb hu to tu apne jute utaar daal beshak tu paak jangal tuwaa me he”
Allah ta’ala ne Hazrat musa Alaihis salam  ko apne fazl wa karam se ye ilm de diya ki Hazrat musa Alaihis salam  ne aaawaz ko soon kar samajh liya.
aur yaqin kar liya ki ye meire rabb ki aaawaz he, allah ta’ala ki aaawaz kisi makaan se nahi aa rahi thi wo makaan se paak he us aaawaz ki kefiyat ko bhi bayaan nahi kiya ja sakta,
Hazrat musa Alaihis salam  ne jab darakht(peid) se aaasmaan ki taraf uthne waale noor ko deikha aur usme farishto ki tasbihaat ko soona.
aur aap alayhis salaam ko jab ye aaawaz di gayi to aap alayhis salaam aaankho par haath rakh kar arz kiya labbeik me haazir hu mei teiri aaawaz to soon rahaa hu, tujhe deikh nahi raha, tu kahaa he…??
Rabb ta’ala ki taraf se aaawaz aayi
“mei tumhaare paas hu, tumhaare saamne hu, tumhaare pichhe hu, tumhaara aehaata kiye hue hu aur tum se bhi tumhaare zyada qarib hu”,
Hazrat musa Alaihis salam  ne tamaam was-wasaat ko baalaaye taaq rakhte hue kahaa
Mei allah ta’ala ki aaawaz ko apne upar se aur apne nichhe se aur apne pichhe se aur apne daai taraf se aur apni baai taraf se ayse hi soon rahaa hu jeise saamne se soon raha hu, mujhe yaqin ho gaya ye kalaam makhluq me se kisi ka bhi nahi ho sakta..
“ay Hazrat musa alayhis salaam, beshak mei teira rabb hu to tu apne jute utaar daal”
Ek to iska mashoor wa ma’aruf matlab ye he ki Hazrat musa Alaihis salam  paakiza jagah aagaye he jahaa meiri tajalliyaat ka zahur ho raha he aur mei tumse ham kalaam hu is liye adab ka taqaaza ye he ki tum apne jute utaar do,
Ek aur wajah jute utaarne ki ye thi ki Hazrat musa Alaihis salam  ko jute utaarne ka hukm is liye diya gaya tha ki aap alayhis salaam ke qadmo ko us sar-zamin ki barkat haasil ho jaaye
(tafseere kabeer, jild-22, safa-17)
Ek aur wajah ye bhi bayaan ki gayi he ki
Khwaab me jutaa deikhne se muraad zouja aur aulaad liya jata he ab ma’ani ye hoga ki aap apne dil me zouja aur bacche ka khyaal na rakhe,
unki taraf mashgul na ho, balki khaalis tawajjo meiri zaate kibriyaai ki taraf ho, aur matlab ye bhi ho sakta he ki duniya aur aakhirat ko chhod do goya.
ki aap ko hukm diya gaya ki aap ka dil allah ta’ala ke siwaa kisi ki taraf tawajjo na kare balki mukammal tour par tum allah ta’ala ki ma’arefat me apne dil ko dubaa do.
(tafseere kabeer, jild-22, safa-17)
(tazkiratul ambiya alayhis salaam, safa-389, 390)
Subhanallah…

Hazrat musa Alaihis salam  or hazrat khizr ka waqiya 

HAzrat musa alaihissalam or hazrat khizar ka ye waqiya aage parhe quraane azeem me aage he ki “rahi wah diwaar wah shahar ke do yatim ladko ki thi aur uske niche unka khazana tha aur unka baap neik aadmi tha to aapke rabb ne chaha ki wo dono apni jawaani ko pahunche aur apna khazana nikaale aapke rabb ki rahmat se aur yah kuchh meine apne hukm se na kiya yah feir hei un baato ka jispar aapse sabr na ho saka”
(surah al kahaf, aayat-82)
Is aayate kareema me jo zikr kiya gaya he ki unka baap neik aadmi tha is se pata chala ki aaabaa(baap) ki neiki se unki aulaad par allah ta’ala ki maherbaani hoti he,
Muhammad bin mukandar farmate he beshak allah ta’ala apne neik bande ki neikiyo ki wajah se uski aulaad aur uski aulaad ki aulaad aur uske qabile aur uske ird-gird(aas-paas) rahne waale padosiyo ki hifaazat karta he wo loug jab tak us neik bande ke pados me rahenge us waqt tak allah ta’ala ki hifaazat me honge.
(tafseere mazhari, jild-3, safa-45)(tazkiratul ambiya alayhis salaam, safa-463, 464)

 note :

Kuchh loug wali ko nabi se bada deikh kar gumraah ho gaye aur unhone yah khyaal kiya ki hazrat musa alayhis salaam k
hazrat khizar alayhis salaam se ilm haasil karne ka hukm diya gaya jab ki hazrat khizar alayhis salaam wali he aur haqiqat me wali ko nabi se bada maanna khula kufr he
aur hazrat khizar alayhis salaam nabi he aur agar aysa na ho jeisa ki kuchh ka gumaan he to yah allah ta’ala ki taraf se hazrat musa alayhis salaam ke haqq me aazmaaish he

hazrat khizar aalaihissalam nabi the ya wali :

Is masle me ahle ilm ke har taraf se dalaail moujud he, kuchh hazraat ne wali kaha aur kuchh ne nabi kaha, mohaqqieen hazraat is taraf he ki khizar aalaihissalam nabi the,
Is masle ko bayaan karte hue mufakkir e islaam, mufassire quraan hazrat pir karam shah saahab farmaate he
Jamhur(aksar) ulma ka mazhab he ki ye banda Hazrat khizr alayhis salaam he, inka naam “baliya bin malkaan”
he kyuki jaha ye tashreef farma hote wo jagah sar-sabz(green) ho jaati thi is liye khizr aapka laqab tha aur isi laqab se mashoor ho gaye,
baaz ulma ki ye raay he ki wo wali the lekin allama pani pati aur digar ulma e mohaqqieen ki ye raay he ki wo nabi the kyuki wali ke ilhaam se ilm e zanni haasil hota he
aur usme khata’a ka ahtemaal hota he, ilhaam ki wajah se qatl jeise sangin feil ka irtekaab jaiz nahi ho sakta, is liye aap alayhis salaam ko nabi manna padega aur nabi ka ilm yaqini hota he.
(ziyaaul quraan, jild-3, safa-46)(tazkiratul ambiya alayhis salaam, safa-465)

* kya Hazrat khizr alayhis salaam zinda he…??*

Is masle ko bayaan karte hue mufakkir e islaam, mufassire quraan hazrat pir karam shah saahab tehreer farmaate he
Rahi ye baat ki Hazrat khizr alayhis salaam ab zinda he ya wafa’at pa chuke he isme ulma ke 2 giroh he aur un dono giroho ne apne apne mouqif ko saccha saabit karne ke liye dala
Ail ke anbaar laga diya he,
(jis se kisi ayse natija par nahi pahoncha ja sakta ki ek baat par mutmaeen ho paaye)
Is liye hazrat qaazi shana’aullah pani pati rahmatullah alay ki is tehreer se mutmaeen ho sakte he…
Likhte he ki hazrat mujaddid alf saani rahmatullah alay se Hazrat khizr alayhis salaam ke muta’aliq puchha gaya ki wo zinda he ya wafa’at pa gaye he to wo baargaahe ilaahi me haqiqate haal ke inkeshaaf(numaaish) ke liye mutawajjeh hue
To hazrat mujaddid alf saani rahmatullah alay ne deikha ki Hazrat khizr alayhis salaam unke paas khade he, aapne unse unki haqiqat e haal daryaaft ki
to unhone farmaya ki mei aur ilyaas alayhis salaam zindo me se nahi lekin allah ta’ala ne hamaari rooho ko aysi quwwat bakhshi he jisse ham mujassam hote he aur zindo ke kaam karte he masalan jab allah ta’ala chaahe to ham
gumraah ki rehnumuaai karte he aur musibat-zada ki madad karte he, ilme ladunni ki ta’alim deite he aur jiske muta’alaq allah ta’ala ka irada ho use roohani nisbat marhamat karte he,
hame auliya-allah me se jo qutube madaar hota he uska ma’awan wa madadgaar banaya gaya he, allah ta’ala ne use madaare aalam banaya he aur uski barkat wa feiz se duniya ki baqa’a he aaj kal yaman ke ek buzurg qutube madaar he jo shaafai ul mazhab he ham unke saath shaafai mazhab ke mutaabiq namaaz adaa karte he.
(tafseere mazhari, jild-6, safa-62)(tafseere ziyaaul quraan, jild-3, safa-38)(tazkiratul ambiya alayhis salaam, safa-467, 468)

hazrat musa alaihis salaam ka inteqaal

Ek riwaayat me he ki malekul mout(hazrat izraail alayhis salaam) ko hazrat musa alayhis salaam ki taraf bheija gaya jab wo aapke paas aaye to aap alayhis salaam ne thappad maar kar uski aankh nikaal di,
Dusri riwaayat me is tarah he ki malekul mout hazrat musa alaihis salaam ke paas aaye aur kaha ki apne rabb ta’ala ka hukm qabul karo to aap alayhis salaam ne use thappad maar diya, jis se unki aankh zaya ho gayi
hazrat izraail alayhis salaam waapas allah ta’ala ke paas haazir huwe, arz ki mujhe tumne ayse bande ki taraf bheija he jo marna hi nahi chaahta,
Allah ta’ala ne hazrat izraail alayhis ko aankh fir ataa kardi ya’ni nazar fir louta di aur farmaya jaao meire bande ke paas use kaho ki apna haath beil ki pith par rakhe, haath ke niche jitne baal aayenge umr utne saal badha dunga,
Aap alayhis salaam ne arz ki ay meire rabb, fir kya hoga..??
Allah ta’ala ne farmaya fir mout aajayegi,
Aap alayhis salaam ne arz ki mout abhi aajaye aur sath ye sawaal kiya ki ay meire rabb mujhe beitul muqaddas ki sar-zamin par pahuncha deina.

 faida :

Hazrat musa alayhis salaam ne beitul muqaddas me dafan hone ki khwaaish is liye ki ke wo maqaam ambiya e kiraam alayhis salaam ke dafan hone ki wajah se musharraf tha, aap alayhis salaam ki duaa se waazeh huwa ki fazilat waale maqaam me saaleheen ke qurb me dafan hona mustahab he.
(novi bar sahi muslim, jild-2, safa-267)(tazkiratul ambiya alayhis salaam, safa-472)

hazrat musa alayhis salaam ka qabr me namaaz adaa karna

Hazrat sulemaan tamimi radiallaho ta’ala anho riwaayat karte he ki meine hazrat anas radiallaho ta’ala anho ko kehte hue soona ki rasoolallah sallallaho alayhe wasallam ne irshaad farmaya
Meira guzar musa alaihis salaam se huwa to apni qabr me namaaz adaa kar rahe the,
Ek riwaayat me he kiMe’araaj ki raat meira guzar musa alayhis salaam se huwa,
(muslim shareef, jild-2, safa-267)
Aur ek riwaayat me he ki huzoor nabi e kareem sallallaho alayhe wasallam ne irshaad farmaya
Meine musa alayhis salaam ko namaaz padhte hue deikha, isaa alayhis salaam ko namaaz padhte hue deikha, ibhraahim alayhis salaam ko namaaz padhte hue deikha.
(muslim shareef, jild-1, safa-116)
Khyaal rahe ki hazrat musa alayhis salaam ko qabr me namaaz padhte hue deikha, fir beitul muqaddas me apne saath namaaz padhte hue bhi deikha, fir aasmaano par aap ko marhaba kehte hue bhi deikha, is ki 2 wajah ho sakti he
Ek ye ki huzoor nabi e kareem sallallaho alayhe wasallam buraaq par sawaar the aur buraaq ki raftaar se safar kar rahe the, hazrat musa alayhis salaam bageir kisi sawaar ke apni shaan e nabuwwat se chal rahe the,
is liye aap huzoor nabi e akram sallallaho alayhe wasallam se pehle beitul muqaddas aur aasmaano par pahunch gaye ya’ni raftaar e nabuwwat buraaq ki raftaar se badh kar he,
Dusri wajah ye ho sakti he ki hazrat musa alayhis salaam ek waqt me qabr me bhi tashreef farma ho aur beitul muqaddas me bhi aur aasmaano me bhi.
(tazkiratul ambiya alayhis salaam, safa-474)
share story on instagaram